Duh tak thilri pawl an tam a si le thina bang theih. Can duh mi a tam a si le thinphan a theih. Hngah hlap mi a tam a si le khuaruat har a tam. A tul lo mi thil kha duh tuk pang hlah. Thinphan vansan nak khal tul zat aiin tam ter hlah. A cang hrih lo mi thil kha ruat in vansang lam hlah. Leitlun dan ti mi cu duh lo mi pawl kha ngah a theih. Can duh lo mi pawl khal a cang thei. Hngah hlap lo mi pawl kha ton a theih.
Mah duh mi ngah lo ruangah thinbang hlah. Mah duh lo mi ngah ruangih thinbang tu minung pawl cu hi leilung pi (nunram pi) kha sun nak a pe tu pawl an si. A liam cia ih ngah mi nat nak kha hngilh aw. Asinan cui mi ih sin ngah mi zirnak kha ziangtikhmanah hngilh hlah. Puitlin nak pawl ngah dingah mitthli pawl thawn zuam a tul. Ngaidam thiam nak pawl ngah dingah tuar thiam nak thinlung pawl neih a tul. Theihthiam sak thei dingah mai thinheng nak pawl sup a tul. Remcang tei um dingah mai can duh mi pawl thlahphoih thiam a tul. Minung nunram ih nun caan ti mi cu kedam hruhkhat vek a si. Caan a hung rei tikah leilung in a ei, lungto in a ei, a paa sinsin, a roh sinsin. Cu vek thotho in minung nunram ti mi khal leitlun thilri dung thlun in, nom nak lam tlun phah ah kan bang thluh zo.
Nunram cu a tawi te a si. Huat nak pawl thawn caan cem ter hlah. Leitlun dan ti mi cu mitin ih tong theih mi thil a si. Hlawhtlin thul, sung thul zo hman bangaw in a um ringring lo. Himi hi nunram tin kan ti mi a si lo maw. Nunram ih caan khat te kha kumkhua tin ruat pang hlah.
Hrekkhat nat nak pawl kha harsat nak tumpi a si lo maw tin ruat pang hlah. Hrekkhat nomnak pawl kha a ngaingai ih nom nak tin a ngaingai ah ruat pang hlah.