Voikhat laiah Tivapi kap ah haikungpi pakhat a um. A hnah pawl cu mawi zet le a tteek pawl khal an tum zet. Cu mi Haikung ah Laileng pawl cu bu sak in an um. Haikung in an mah pawl kha a thlum zet mi Hai pawl a pek ruangah Laileng pawl cu nuam zet in an um. Thaal a kim tikah Haikung ihsin Hai tampi a rah. Laileng pawl cu nitin Hai rah ei in an nuam awk zet.

Cumi Haikung tangah Sihte vuunpi pakhat aum. Cumi a vuun sung ah Sihte cu a tingthawng in an um. Thaal a hungkim tikah Hai tang ih a tlak mi pawl ei in an nih khal an nuam awk zet. Hi mi cu an hrangah a tha bik mi dinhmun te asi.

Nikhat cu Laileng pakhat cu Haikung par ih a bu ihsin Tivapi kha a zoh rero. Rinlopin ah Sihte pakhat cu tidai ah tla in a pil kha a hmu. Sihte cu tikap lam ih leup ding in a zuam rero nan tiluan dan kha a pin tuk. A sinan Sihte cu beidong lo in a zuam rero thotho.

Laileng in Sihte cu a zangfak. A hmur in tinghnah pakhat a lak ih tiva lam ah a zam. Cule thinghnah cu tiva sungah a thlak. Sihte cu ti par ih a phuan rero mi thinghnah par ah a kai ih a thlun. Thinghnah cu tiluan dan vekin tikap a thleng ih Sihte cu run a si.

Sihte cu laileng ih a run nak thu cu ziangtik hmanah a hngilh dah lo. Laileng kha that nak lehrul ding in caantha kha a hngak ringring. Cutin caantha khal rang zet in a thleng.

Nikaht cu sadawi tu pakhat cu Haikung ah Laileng tampi an um kha a thei ngah. Sihte cu rawl thiar phah in a um nak lam a tlung phah ah Sadawi tu pa in a thal thawn Haikung lam kap ding ih a tuah kha a hmu. Sihte cu mangbang tak in Haikung lam a zoh ih a nun nak runtu Laileng kha Sadawi tu in kap ding in tim a tuah rero kha a hmu. Tu cu Sihte ih run can a kim thlang.

Sihte cu a thupten sadawitu ih ke ah a kai in a luu lan ah a feh. Sadawitu in a thal sai ding in a tuah ah Sihte in a mit kil a keu. Keu a tuar ruangah sadawi tu cu naa ati ih a ruah nak pawl kha a thal ah a um nawn lo. Sadawitu ih au aw kha lekuang pawl ah (echo) ruangah Haikung par ih Laileng pawl buainak a um ti an thei ih an zaam.

Laileng khal run a si. Sihte in ziangtin a run ti Laileng in a thei lo nan Sihte cu a nuam awk tuk.

Kan nih khal that nak tuah cu midang hrangah that nak a si vekin mai hrang khal ah that nak asi.