June 8, 2025 ni cu Pawlpi thawhkeh ni a si. Ziangruangah Pawlpi suahkeh ni tiah kan ti thei? Penticost ni cu Jesuh thlan in a thawhsal hnu zarh sarih nak zarhpi ni a siih a ni cun ni 50 a kim ni kha Penticost ni tiah kawh a si. Cui Penticost ni cu Pawlpi a thawhkehnak a sivekin Catholic Pawlpi ih suah ni khal a si. Mitin in suah ni kan nei ih Penticost puai ni khal Catholic Khawhhranpi suah ni a si. Cui nithok in Khrih cu a mai thiangthlarau kha a mai taksa ruangpi a si mi Nu Pawlpi hnenah a rak pe a si. Cutik ah Jesuh ih dungthluntu (Tirhthlah) pawl cu leitlun kil li ih minung pawl hnenah an feh ih Thuthangtha an sim ih Khrih ih hnatuannak an rak thok a si.
Thiangthlarau Pathian cu Dungthluntu pawl hnenah Pathianthuthangtha sim dingah an tul sam mi laksawng pawl khal a rak pe a si. Penticost ni ah Thiangthlarau burhnak a rak ngahtu Peter cu a hmaisabik thlacamnak le Thuthangtha simnak a thok ih minung thawngthum in an thinlung an thlengih Baptism an sang ti khal cu Bible sungah kan hmu thei a si. (Tirhtlah 2: 41)
Curuangah Penticost Puai ni cu Pawlpi ih suah ni tiah an rak ngamhngetnak a si. Hi mi lai ih Baptism a sangtu mipi pawl cu Catholic zumtu pawl lole hlan lai Christian pawl tiah kawh a si ih Peter cu Catholic Pawlpi ih a hmaisabik Pope a si. Catholic Pawlpi ih kaih hruainak ah Thiangthlarau a um ringring a si. Bible thlunghlun ah Pathian in Moses hnenah Thukham 10 kha sal sungih an luatnak dingah Sinai tlangah ni 50 a kim hnu lawngah luatnak an rak ngah.
Thlungthar ah cun Khrih Jesuh a thih ih a thawhsal hnu ni 50 nak ah Thiangthlarau Pathian cu inn khan sungih a um mi Bawinu Maria le Dungthluntu pawl hnen ah thlah a si. (Tirhthlah 2:1-4)
Thiangthlarau Pathian hnen thlacamnak
Aw Thiangthlarau Pathian a sannak hmun ihsin kan thinlung sungah rung tum aw. Kan thinlung mit kha tleu ter aw. Kan mai hmuh theinak mit cawtnak pawl kha run sun hram aw. Aw Thiangthlarau Pathian a cem thei lo mi daihnak kha kan hnen ah in pe hram aw. Amen.