Miphun hmuahhmuah hnenah va feh uhla ka dungthluntu va si ter uh; tihnimnak va pe uh; ka thu pek mi thlun ding in va zirh uh (cf. Mt 28:19-20) tiih Jesuh ih a dungthlun tu pawl hnen ih a thucah mi cu Catholic Kawhhranpi in tuini tiang nasa zet in a ttuan a si. Jesuh ih thucah mi hi biaknak
tampi, mifarah tampi le nunphung tampi umnak hmun a si mi Asia ramah teh ziangtin kan ttuansuak
thei ding a si timi thu thawn pehpar aw in Asia ramih bishop pawl le Pathian thu thiam (theologians)
pawl in a tanglam vek in an hmu a si.
Asia ramih bishop pawl le Pathian thu thiam pawl in Jesuh ih thuthangttha phuan
(evangelization) tikah biaknak thu ruahkhawmnak phunthum a thupi a si an ti. Cumi phunthum pawl
cu: biaknak dang pawl thawn thu ruahkhawmnak (dialogue with religions), farah pawl thawn thu
ruahkhawmnak (dialogue with the poor), le nunphung thawn ruahkhawmnak (dialogue with cultures) a si. Hivek ih khat le khat thu ruahkhawmnak hi Asia ih ummi zumtu pawl ih thuthangttha phuan daan a si tiah India bishops pawl in an sim. A tawi zawng in von zoh uh si.
Pakhat nak: Asia ramih um tu bishop pawl in Khristian a si lo tu pawl hnen khal ah rundamnak thu thawn pehpar aw in thilttha tampi a um ve a si, an ti. Khrih zum lotu pawl ih biaknaksung ah rundamnak lamzin thawn peh par aw mi thittha tampi a um ve a si tiah India bishop pawl inan sim. Curuangah rundamnak ngah theinak hrang ah tthat hnemnak lamzin tete pawl cu hi Khrihzum lotu pawl ih biaknak daan ah an um ve a si, tiah an sim bet. Korea bishop pawl khal in Khrih zum lotu pawl ih biaknak thuanthu le daan pawl tthatei kan zoh a ttul a si.
Ziangruangah tilen rundamnak ngah theinak ding hrangah tthat hmemnak mi an pe a si, an ti. Cu vek thotho in Philippine bishop pawl khal in kau zet le tangdor zet in hlanlai biaknak pawl zoh sal ding in le ziangvek in Khohran ih Jesuh ih thuthangttha phuannak ah ziang vek in hmual a nei ter timi zoh fiang a ttul a si, an ti.
Cun Japan le Vietnam bishop pawl in Khrih ih thu kan sim le kan phuan daan hi a fiak tuk deuh tiah an sim. Pahnihnak: Farah pawl thawi thu ruahawnak thu thawn pehpar aw in Asia bishop pawl in hitin an sim: mi farah tampi umnak le mi farah pawl nautatnak tuar ttheunak hmun Asia ram ahcunmi farah pawl thawi feh thlang lo ahcun Jesuh ih thuthangttha cu tthaten kan phuang thei lo ding a si an ti.
India ram ih Khristian pawlkom cu farah pawl ih Khohran si ding ih kawh mi kan si tiah Indiabishops pawl in an sim. Ahleice in nunau thlen dannak um lo ding in Kawhhran le acozah in ttuanvo an nei a si tiah an sim bet.
Pathumnak: Nunphung thawn pehpar aw in Asia ramah Khristian biaknak cu ramdang biaknak (Western or foreign religion) a si tiih ruahnak a um ttheu ruangah Asia bishop pawl cu anthin a nuam lo. Curuangah Khristian zumnak cu kan nunnak ah, a bik in Pathian kan biaknak le kan zumnak ah tuh lut (inculturate) a ttul a si an ti.
Sri Linka bishop pawl in Pathian kan biaknak, puai kan tuahnak le kan nunnak ah nitlaknak lolen ramdang nunphung ih in khuh tuk mi hi remtthat a ttula si. Asia nunphung khal Pathian kan biaknak ah telh ve a ttul a si an ti.
A tawi zawng ih kan sim a silen Asia ramih Jesuh ih rundamnak thuthangttha phuan tikah biaknak dang pawl thawn thu ruahkhawmnak, nunphung upatnak le farah pawl bomnak pawl tuah attul a si. Kawlram khal ah a tlunih kan sim mi biaknak thu ruahkhawmnak phunthum pawl hi an
thupi zet a si.
Sirhsanmi:
– Phan, Peter C, ‘The Asian Synod: Texts and Commentaries’ Maryknoll, NY (1998) pp. 17-18.
Angantu – Rev.Fr Lucas Tha Ling Sum
