“The Letter” thulu thawn Laudato Si kha hrambun ih tuah mi lemcan pakhat kha Yangon, Kantaya donhleisang ah sawm mi mi khual pawl kha May 26, zing lam nazi 9:30 ihsin sun tiang an zoh ter.

         Mual a liam zo tu Pope Francis, May 24, 2015 kum ih an rak suah mi a veihnih nak “Hmun khat ih kan um tlang nak leilungpi kha kilhim nak” timi Laudato Si capi kum 10 kim kum khal a si vekin May 24 ihsin 31 tiang Laudato Si nikim ti khal in an ngemhnget. Hi caanserh zaten Yangon KMSS pawlkom le CBCM pawlih hoha nak ih tuah mi a rak si.

         Cui caanserh ah Catholic pawlpi ih Assitant Bishops pawl, khrihtian Councils pawlkom ih Bishops pawl, hla sa nak ih laksawng ngah tu pawl, Judges pawl, CBCM sungih RVA, OSC, Youth Commission, CRCM, KMSS pawlkom pawl le upat tlak zetmi mikhual pawl an ra tel.

         Cardinal Charles Bo a tel ve thei lo ruangah a aiawh tu His Excellency Bishop Noel Saw Naw Aye in thu a cah nak ah Laudato Si kha hrambun ih “Hi record mi film cu ramthen panga kha hrambun ih langter mi a si. Mizapi ih ram a si an ti vekin dun le daan pawl re lo in leilungpi that nak ding hrangih tuah tlang dingthu, thlacam nak le a ngaingai ih tuah nak cu an pehzom awk thu le puai cangsuak thei dingih tawlrel sak tu pawl khal lungawi thu a rak sim.

         KMSS program Manager Daw Mary Khin khal in Kawlram ih KMSS hnatuan nak pawl cu Pope Leo XIV ih lamhmuh mi “Remdaih nak, dinfel nak le thudik par ah hrambun nak, mi harsa pawl nehhnulam tiangih an remcang nak ding hrang, thingkung pawl phun nak, duhdawtnak le zangfah nak pawl hrambun ih tuahnak, hi Jubilee kum ah baksan ih um nak ihsin luatsal nak tuah ding a um thu khal a rak sim.

         Hlasak zuamawk nak ih a tel tu pawl in hla an sak sak theh hnuah laksawng a ngah tu pawl, khual lian pawl laksawng pek nak an rak nei. Caanserh cu Rev. Fr. Dominic Zabinus, Director of KMSS Yangon pawl ih lungawi thu sim nak in an caanserh an rak cem ter.

Hi thuthang cu RVA Sgaw Karen thuthang ihsin a tawi zawn ih kan leh mi a si.