Ka fapa heh “Hi Namte hi va taat ta aw, hriam dingin taat aw maw” tin a fapa cu a ti. Afapa fa in ka pa” Ka pa khal le hi hlok (kaihnak) a nei lo mi naamte cu ziangah i taat ter sipei hman le a ngah nawn lo. Naam a thar pawl an um ko mi rori “Ka pa naam ka taat theh hriam zet ding in ka taat zo” tin a ti.

“Na taat theh zo le dunglam hmuan ah feh awla thing va tan”. “hi naam thawn maw? ka Pa” “Aw tu na taat mi naam thawn” Ka pa ka tih ih ka sim ngam lo ruangah hlok (kaihnak) a nei lo mi naam thawn ziangtin thing cu tampi ka hau thei ding? Hi Naam kha thaten kengin hramlak ah ka feh tul.

Nikhat timi lawng a cem thing tampi ka ngah lo ka kut pawl khal an durh ih an kek theh. Zaanlam a kim ih thing cu ka pu ih innsung luhnak kekar pawl cu nidang vekin phur nak a um nawn lo. Ka pa in in kawk ding le ka phang. “Ka fapa na ra tlung zo maw?” “Aw ka pa” “Na thing cu mal te lawng maw si” “Naam hi a hlok um loih hau khal le a hlen ngai lo ka pa, ka kut pawl khal an durh ih an kek theh”. “Ka hnen ah ra ta aw na kut i hmuh hnik aw”.

I kawk lo cu ka nuam awk sawn nan ka ruah thei lo mi cu ziangah hi Naam thawn thing i lak ter ti mi hi a si” a ti. “Hei ka fapa Naam thar pawl a um ko nan ziangah a bul zet mi naam kha lo taat ter in thing ka lo lak ter? Naam hlok le a um lo. Ka lo fial hrim mi asi ka fapa, na kut a naa zet ding ra aw sii ka lo hnih sak ding” a kuai theh mi a kut sii hnih rero tu a pai hnen in “Ka lo sim ding ka fapa tha ten ngai aw maw.

Hlok a nei lo mi naam cu hriam dingin ka lo taat ter cule thing ka lo lak fial na duh zat in thing na ngah maw ka fapa?” “Ngah lo ka pa” “ Ziangah saw ka fapa?” “Naam te lawng a hriam ka hau duh mi thingkung kha olsam ten hau a ngah lo. Cule a hlok um loih kaih a har tuk. Curuangah mal te lawng ka ngah. Ka kut pawl khal an naa theh” “ Cu mi cu na thei ko ti” “ Aw ka pa” “ Tu nang cu mifim cathiam na si ih buaih pawl fimthiam nak pawl timi cu a buul zet mi naamte kha naam taat nak lungpar ah ret ih hraim ding ih taat ciamco thawn a bang aw.

Culawng ah na tuan duh mi hna, na zawh duh mi lamzin sinpi tak in na zawh thei ding. Cu tin zawh thei ding khal in tlawngih na zir mi fimthiam nak, tuah thiam nak pawl kha minung pakhat hnen ih um ding mi nuncan ziaza pawl timi Naam hlok thawn na kilhim thei lawngah na nunram a mawi dingih mi hlawhtlin na cang ding. Ka lo sim mi na theithiam maw” “Aw ka pa”.

“Cuti silo ih na neih mi fimthiam nak pawl, hngal ih puarthau rero khal le zaangfah lainat nak timi a um nawn lo. Nuncan ziaza timi pawl kha an siatral thei. Hlok a nei lo ih ret mi Naam vek in na duh ih na tumtah nak hmun thleng dingin a harsa ding. Na kut ih hriamhma na ngah vekin na nunram khal hriamhma pawl ah an cang thei.

Ka ti duh mi cu hngal hlah ka ti duh mi si lo. Hngal ko aw, cu mi hngal nak kha midang harsatnak pek ding a si lo. Mah le mah humhim nak hrangah asi ding.

Sile ziangah hi mi Naam thawn Thing ka lo lak ter ti na thei thlang maw” “Aw thei thlang ka theithiam thlang” “ Aw na bang tuk kha tak kholh awla cawl thlang aw” “ Aw ka pa” Hi thuanthu ih in sim duh mi cu kan neih mi fimthiam nakin midang nunram kha siat ter lo in midang hrang ih tangkai ter sawn tu si ding in asi.