Pope Leo XIV hrilnak thawn pehpar in Hon. Justice Aggrey Otsyula Muchelule ih Hmuhdan
A awn a ring cuci lomi fimnak pakhat a um. Cuih fimnak cun laar a tum lo; in hmu hai seh tin khal a au-kio lo. Daidim ten thuk zet le kumkhua daih in a um hlenhli men. Cuih fimnak cu Catholic Kawhhran ih fimnak a si. Hi Kawhhran cu siangpahrang uknak empire pawl hnakin a san a sau sawn, thentheknak a pahsuak, mualphonak pawl a tuar rero ko nan tuisun ni tiang fek zet le upat tlak zet in a ding hnget ringring thotho.
Hi Kawhhran cu khawvel thil um dan thlun ih feh le mipi duhdan thlun ih feh mi a si lo. Tikcu le caan thawn feh mi a si ko nan, kumkhuadaih thil zuan in, Pathian thu ngai ih a feh rero mi pawlkom pakhat a si.
Leitlun mi pawl cun Pope ih hriltlin tlak tiih an ruah mi Cardinal pawl phorhsuah in le ramkhel lam thil umdan khaikhawm phah ih a leng rero mi ruahnak a phunphun thawn zobik Pope ah an hril pei timi thu ih an buai rero lai ah, Pope hril dingih a tongkhawm-aw mi Cardinal pawl cun lamzin dang an rak hril sawn. Leitlun awn-au an dungtun san men. Khawvel ih duhnak zin an pialsan mai. Hmun thianghlim sungah an vung lut khawm ih zohman ih ruah dah lomi Leo XIV timi hmin thar pakhat an hun suahpi. Himi hmin latu pa cu mipi ih rel hluaihlo mi ah a tel lo, thuthang zemdarhnak thulu ih tarlang mi khal ah a tel lo. Hipa hriltlin a sinak cun thu umdaan thlir thiam pawl ih kaa a ciip ter ih Pathian ih cangvaihnak a run nemhnget ta.
Hi hrilawknak ih thil cangmi hi tikcu dengaw ih cang mi men a si lo; Pathian ih cangvaihnak nemhnget tu a si.
Vatican ih thil a tuah mi hi Pope hrilnak men a si lo. Leilungpi hrangih tlangau aw pakhat sawn a si. Pathian cu khawvel thil fehdan thlun tu si loin a remthat tu sawn a si timi, leitlun mi hmuahhmuah hrangah ralrin peknak a si. Hruaiawknak dik cu langhngan ah hmuh a si dah lo timi siseh, a caancaan ahcun tuanvo thupi bik phurtu hi, leitlun ih ruahsan mi si loin van lamih lungkimpi mi an si sawn theu timi in mangsal tertu khal a si. Hi hrilawknak cu dai zirziar ten thlacamnak le upat tlak thuronkhawmnak thianghlim thawn tuah mi Pathian ih nemhnget mi pehzom-awknak ih thuthuk pakhat khal a si.
Kei hi Catholic Kawhhran sungtel ka si lo. Asinan, nikhat hnu nikhat a rung liam ih, ziangruangah hi pawlkom hin upat loih um thei lo ding khopin in tuah ringring timi fiang zet in ka hmu thlang. Cuih upat tlak a sinak hi a sungtel pawl mifamkim hlir an si ruangah a silo. A hruaitu pawl an palh thei lo ruangah khal a silo. Catholic Kawhhran ih upat tlak a sinak cu, a sungah minung ih famkim lonak a phunphun um ko hman sehla, a sangsang ten a kaikhuah-awmi ukawknak le thlarau lam nun siamnak si-kaan tha zet parih a thum-awmi pawlkom a sinak ruangah a si.
Caan reipi tiang ziangtin a feh zom vivo ding timi fiang zetih a thei tu pawlkom khal a si. Tuisun ni tiang sansau teih a din thei tla hi, minung ih lungkimpinak ruang men ah si loin Pathian ih nemhnget mi pawlkom a sinak ruangah a si.
Ziangvek kawhhran hman an famkim lo. Palhnak nei lomi pawlkom ti khal a um cuang lo. Catholic Kawhhran khal cuti thotho a si ve ko. Hi Kawhhran sungah a thianghlim deuh le thianghlim lo deuh, mitha deuh le thalo deuh tin famkim lonak a phunphun neimi nunau le mipa tampi an um ko. Asinan, hi famkim lonak a phunphun lakah, thlarau lam zawngin thuk zet ih a kaihnget tu a siat thei lomi thil pakhat a um. Hi Kawhhranpi ih hruangkulh sungah daidim zet, tangdor zet le thatho zet in thlarau le thutak thawn Pathian riantu tampi an um. Pathian an tihzahnak le biaknak lam ih an teimaknak hi midang hmuh dingih tuah men an si lo. An zumnak khal fashion men a silo, an hringnun hrimhrim a si.
Pope Leo XIV hrilnak ih a cangmi thil hi ramkhel, asilole, kawhhran thawn pehpar ih a cangmi thil men a silo. A dang Christian zumtu hmuahhmuah hrangah kan sinak in hmu ter tu thlalang pakhat a si. Himi thawn tahthim ih thlir tikah, tulai santhar kawhhran tampi, ahleicein Pentecostal unau pawl lakih a leng mi hnokbuainak pawl a rung langfiang sinsin. Hi pawl lakih hrekkhat kawhhran tla ahcun thlacamnak hnakin thuneih duhnak an thupit sawn ih hmun thatha co dingih ih tumtahnak/zuamnak thuai ah hriakculhnak khal phil hlo a si men. Hruaitu sinak khal thilri men bangin ro ih tan-awk a si. Hotu hrilawknak cu maih hlawknak hrangih tuah mi men ah a cang. Pulpit cu nunram siamnak hnakin kutke cangvaihnak hmun ah hman a siih biaktheng khal hmunthianghlim tiih kawh tlak lo ah kan can thluh.
Unau tiih kawhmi pawlkom lak hmanah duhdawtnak a ziam vivo. Kan hlawkpi ding mi par lawngah kan rin-um ih unau duhdawt awknak cu hmuh ding a um tuk nawn lo. Hotu hnatuan sawngawknak ah tla maihhrang ruat lo, thlarau lam lawng ruat in, mi zovek khal ih theihpi thei dingih tuahmi hrilawknak a um thei lo mi hi, Pentecostal kawhhran tampi hrangah riahsiat za thil pakhat a si. Maih rongbawlpi va bom hman khi sinak cuh duh ih bom ah ruah a si. Lungrual teih hruaiawk theinak ding ruahnak suahpi ding hnakin zuamawknak le zumawk lonak in kan khat sawn. Upat tlak a thiangmi thil hnakin hlawhtlinnak sawn hril a si.
Hmansehla, tuini ah Catholic Kawhhranpi in kan hngilh mi thil thupi a um timi ralrinnak in pe zo. Pathian uknak timi hi laar duh ih au-kio le pholang awknak ah si loin thianhlimnak le daan fumfe thawn kekarnak ah a thum-aw sawn timi in zirhfiang a si. Tuitum thil cangmi hin Pathian cu kan hnenih țong dingah caan kan pek taktak ahcun kan zum lomi le a thup teih daiziar ih ummi mi pakhatkhat a hril sawn theu timi khal in mangter sal a si.
Pope Leo XIV hrilnak cu Kawhhranpi hrang ah siseh leilungpi hrang khalah siseh thiltha zirhtu pakhat a si. Daan le dun fumfe neih ih thupit zia, van lam thawn pehtlaih awknak ih thupit zia le thlarau ih kaihhruainak thawn thuthluknak tuah ih thupit zia pawl khal in ruat ter.
Pawlkom pakhat hi ziangtluk tar hman sehla san a man lo tiih hnon a theih lo zia siseh, hlanlaipi ihsin rak um zo mi si hman sehla tuih san thawn a mil-aw ringring mi a sinak khal siseh, sankhat hnu sankhat a fehpi ciami nunphung le daan a thlun rero ko nan, a țhangso rero mi pawlkom a si thotho timi langter tu tetti khal a si. Himi cu fimnak ih cangvaihnak a si.
Tuitum Pope Leo XIV hrilnak ih a cangmi thil cu kumkhua a nung mi Kawhhranpi ih fimnak a si. Pathian ih remruah daan thuthuk pakhat khal a si. Thianhlimnak ih huham khal a si. Cule, thudik le diklo thleidang theilo ding khopih a buaihnok celcel mi khawvel nun ah, thuh theih loih a vang mi tleunak pakhat tla a si ve.
Theih theinak hna a neimi hmuahhmuah in ngai uh. Khua hmu thei mit a nei mi hmuahhmuah khal in hmufiang hai sehla himi theihthiamnak thinlung a neimi hmuahhmuah in nunnak lamzin ih in hruaitu lamzin hlun zawhsal cio hai seh!
Ataktak ahcun, Pathian cu Africa lam hrilawknak ih kan hmuh țheu mi vekih dekcok theih a silo. Pathian cu kumkhua in a hmun rkngring mi Pathian a si.
NB: 👇
Himi ca hi amah Aggrey in mirang ih a nganmi a cang thei tawkih kan run leh mi a si ruangah famkim lonak tampi a um ko ding. In rak theihthiam sak dingin zangfah kan lo dil a si.
