Catholic pawlpi ih mirang miphun pakhat a si mi mithianghlim Bede cu kum 673 ah England ram, Jarrow ah a rak suak. A thianfai nak ruangah “Upat tlak mi” tin a hmin a rak thang. A kum sarih ah Wearmouth ih um St. Peter le Paul tlawng ah a rak lut. Tlawng hotu upa Benedict ih kilhim nak thuai ah a um ih kum 702 ah Puithiam can nak a rak ngah. A dang Puithiam tlawng ah voikhat voihnih a leng nak in a nun nak cu thinsau nak tlawng ih thlun ding daan pawl thlun nak, a thianghlim mi Bible cu zingzoi nak pawl thawn a caan a rak hmang.

          A mai san lai ah ruah nak tha zet zet a nei tu ti ih mi ih rak hem-hnget mi a si. A mah cu Cathianghlim thawn peh par mi thuanthu lam ih hminthang zet mi ca uk pawl a rak ngan. A nun khua sak nak ih a neitabik ni 40 ah mithianghlim John ih Cathianghlim cu Mirang tong ah a rak let. A netabik a si mi Cathianghlim a let theh ah “Ziang hmuahhmuah a famkim theh zo” tiah a ti ih a khaan fa te ih zial par ah a nun nak a rak cem a si.