RVA ihsin thuthangtha a rak ngai tu duhdawtmi nu le pa u le nau pawl, nan dam hai cio ko maw? Kan Bawipa Jesu Khrih ih zangfahnak, Pa Pathian ih duhdawtnak le Thiang Thlarau ih pawlkomnak cu nan hnenah um hram sehla, nan tuahtuannak kipah hlawhtlinnak hmu in nan umnak hmun cio ah hnangam daihnak in lo zel cio hram seh ti’n thlaza cam in cibai ka run lo buk hai a si.
Kan kiangkap leitlun khawvel umdaan thlir tikah kan bei in dong tertu le in hnaihnok tu thuthang siava tampi theih ding a um. Cu laiah kan sunglam nun in siam mawi thei tu thuthangtha ngai ding kan neih theu mi hi lungawi za ngaingai a si. Pathian ih in umpitnak langter tu khal a si.
Tu hrawng ih Cathianghlim kan siar mi pawl kan zoh tikah, Thosal Caan sungih um lai kan si vekin,
Dungthluntu pawl le an hnatuanpi pawl ih cangvaihnak thuhla, Kawhhranpi ih hramthawh daan le a karhzai daan pawl ngankhumnak Tirhthlah sungta lawnglawng kan siar mi hi kan thei ding.
Tuini a veikhatnak ih kan siarmi Act 16:1-10 sung khalah, Paul le Silas le Timothy teih cangvaihnak thuhla kan thei a si. “Khua pakhat hnu pakhat an thleng vivo ih Jerusalem khua ih Tirhthlah pawl le kawhhran upa pawl in an relcatmi daan pawl kha zumtu pawl hnenah an sim vivo ih thlun ding khalah an forh” a ti (v. 4).
Hitawk zawn ih Tirhthlah pawl le kawhhran upa pawl in an relcat mi daan a timi hi tui zarh sungih kan siar rero mi Act 15 sungih Jerusalem Council pi ih thurorelnak ihsi relcat mi daan a ti duh mi a si. Himi kan zoh tikah, Christian zumtu hmaisabik pawl san lai ihsin Kawhhran sungah duun le daan ziangtluk in an rak thupit timi kan hmufiang thei a si.
Paul in Rome khuami pawl hnenih ca a kuat mi ah Moses ih pekmi daan thlunnak in rundam kan si lo; Jesu Khrih kan zumnak sawn in rundam kan si a timi ruangah Christian zumtu tampi cun daan a thupi lo ti’n duun le daan an hlon thluh ih duun le daan fekte thawn a feh rero mi Kawhhran tla an rak zawmtai theu ih a poi nasa.
A ngaingai te cun tuini ih kan siarmi (v.5) ih kan hmuh mi ah, Jerusalem ih an relcatmi daan pawl thlun dingin Paul le Silas le Timothy te pawl ih an forhnak ruangah kawhhran pawl cu zumnak lamah an cak deuhdeuh ih nikhat hnu nikhat minung an tam sinsin a ti sawn a si.
Hitiih duun le daan felte thawn Pathian an biak le mipi an riannak ruangah zumtu hmasa pawl cu mi ih upat khal an rak hlawh a si.
Tui kan san dinhmun kan zoh tikah, minung in zalennak zalennak ti’n zalennak zuan in ziangvek duun le daan hman hai nawn loih hlon thluh duh tu kan karhzai vivo mi hi kan hmu cio ko ding. Zalennak timi aupi tahrat in midang hrang ruat nawn tum lo’n maih duh zawng hlir ih tlanlen kan tum tikah society timi khawtlang a siatsuah vivo ih a poi nasa.
A poi sinsin mi cu Christian kawhhran hrekkhat in santiluan thlun ih hruaiawknak an fehpi mi tla hmuh ding a um phah mi hi a si. Kan rundamnak hrangah daan le duun hnakin zumnak hi a thupi sawn rori ko. Asinan, cuih kan zumnak hi sankhuk daih tiang finkhawi in sankhat hnu sankhat tanta awk vivo ding cun cuih zumnak kilkhawi dingah daan le duun fek zet kan tul.
Daan le duun um lo’n maih duh daandaan hlir in rak hruai aw thluh bang ta sehla, kan Christian biaknak hi ziang kan bang pei? Midang ih zohthim tlak kan si thei pei maw? Daan le duun zianghman ih rel lo mi biaknak timi leitlun ah a um lo.
Tuitum Pope hrilawknak thawi pehpar in a laar zet mi thu pakhat cu Kenya ram ih upat tlak zet mi thuthentu Aggrey ih nganca hi a si. Anih hi Catholic zumtu a si lo nan, tui tum ih thil cangmi thu ah Catholic Kawhhranpi hmangih Pathian ih cangvaihnak a hmuhfiang mi a tarlang mi a si.
Pathian cu leitlun minung ih duhdaan le thil fehdan ih cangvai mi si loin, thil fehdan remthat tu sawn a sinak hi tuitum Pope hrilawknak in a langfiang ter ti’n anih cun a hmu. Himi thu ah Catholic Kawhhran ih daan le dun thawn hruaiawknak a fehpi mi a thupit zia le a tul zia khal a tarlang cih.
Leitlun khawvel nun kan zoh tikah, kanmaih duhzawng in santiluan ih in hruaitu ding hi kan duh theu.
Nitlaknak lam ram thangso pawl ah santiluan in hruaiawk theinak Daan hrampi tiang nemhnget an si rero zo.
Culai ah Kawhhranpi cun, santiluan ih duhdaan men in mipi hruai lo’n Pathian ih duhdan ih in hruai tikah, khawvel ih donak tampi a tong. Ahleicein, thuthang zamnak media hmangin an do rero.
Hiti ih donak a tongtu hi Catholic Kawhhran le a member pawl lawng si loin, Pathian ih duhdan vekih nun ruangah santiluan thlun lo tu pawl khal khawvel mi pawl ih do kan tong cio. Tulai kan laimi lakih thubuai rero khalah remawknak ding lam zawngih nun in sim tu le lamzin in hmuh tu pawl hi huat an tong rero sawn ih mangbang a thlak nasa.
Himi khawvel ih huat le do kan ton rero ruangah thinnau hlah uh si! Tuini Gospel kan siarmi Jn 15:18-21
sungah kan Bawipa Jesu Khrih in, “Nannih hi leilung in a lo hua a si ahcun keimah I hua hmaisa zo ti kha cing ringring uh” in ti kha.
Mi ih huatnak hmuahhmuah lakah khawvel ih huatmi si hi kannih zumtu pawl hrangah cun uan-awk tlak bik mi huatnak pakhat a si. Ziangvek huatnak le donak tong rero hman sehla, Pathian ih in khihhmuh sak mi lamzin parah daan le dun te thawn fek zetih feh thei tu si kan zuam cio pei!
