US Vice President JD Vance le State Secretary a si Marco Rubio cu Vatican ah May 18 a ra lai ding mi Zarhpi ni ah Pope Leo XIV ih Pope tuannak apnak Missa raithawinak ah an tel ding tiah white house in sim thannak a rak nei. An nupi a si mi Usha Vance le Jeannette Rubio pawl in an thlun ding.
Vance cu Vice President dinhmun in a hmaisabik Catholic a sivekin April 20 ah Pope a rak tong ih April 21 ni Pope a thih hlan deuhah Pope Francis thawn khal an rak tongaw.
Chicago khua mi Cardinal Robert Prevost cu a luancia zarh khat laiah Pope dinhmun ih hril a si. Cardinal a si lai ah Prevost cun Republican policy ih Twitter thu ah a rak sawisel, a sinan White house lam cun zianghman a sim fiang duh lo. Pope Leo XIV in Pope Francis vekin farah harsa mi le ramdang mi pawl hnen ah zaangfahnak a nei ding tiah zum a si. Francis in a mah te policy a nei mi le Trump a cozah ih policy an dang aw. Pope Francis in mivai pawl hnonnak policy cu a rak soisel.
