March thla hrang Pope in Harsat nak thawn tongtu innsang pawl hrangah thlacam tumtah.
March 4 ni ih suah mi video pakhat ah a mawi mi innsang, a famkim mi innsang nei dingah kan tumtah cio a sinan kan hawl mi vekin a hlawh tling lo theu tiah Pope in a rak sim. Innsang tin ah mangbangza in nuamnak le buainak pawl a um theu.
Innsang sungtel zaten a thupi tuk ziangah tile cui sungtel cu midang ai in an danglam hleice tiah Pope in a sim. A sinan hi lamdannak cu ruahdaan bangawk lonak in thinnatnak pawl a can ter thei theu.
Hi mi thinnatnak pawl dam ter theitu hrangih Siivai tha bik cu ngaithiam nak hi a si. Ngaithiamnak ti mi ih duhsan cu a dang caantha pek nak hi a si. Bawipa cu ziangtik lai khal ah kan mah thawn a um. Pathian ih thinsaunak cu a cem thei lo. A mah in in ngaidam ih a sannak ah in cawisang ih a thar mi pakhat ah in thok ter theu tiah Pope in pehbet in a rak sim.
Pope in ngaidamnak in innsungsang a thar ter sal ih ruahsannak thawn hmailam zoh thiam dingah in tuah tiah zumtu pawl ralrinnak a rak pek. Kan nuamnak pawl a cem thei kan ti hmanah ngaithiam aw thei dingah thazaang in pek ziangah tile a naa in a kha zet mi le riahsiatnak sungin in luat ter asi tiah a rak sim.
A thlacam a cemnetnak ah a thenthek mi Innsang pawl ngaithiam awknak, an mai hriamhma pawl a dam theinak dingah le an bangaw lonak pawl a dang laksawng pawl in a khahsilh theinak ding hrang, thlacam sak dingin a rak sawm. Hi mi thuthang cu CNA thuthang in kan don mi a si.
