Mithmai nei tu pawlih hmai ah hmeh ha a tam.
Veikhat ah khua pakhat ah Ko Dii ti mi mipakhat a um. Nikhat ah Ko Dii cu khual a tlawng phah ah zin a hlo ih a keng mi a paisa a cemih rawl khal ei ngah lo, a hnipuan pawl kha a tlek thluh. Cutin “ka pumpuartak ah tawk zo” ti vekin rilrawng zet in a nai nak khua fate pawl ah innkhat lut, innkhat suak tin raw lei ding a dil.
“Ei ding malte tal in do uh khual ka tlawng phah ah ka lamcaw a cem ruangah” tin a dil. Minung pawl in a mai a tlek ih a hlun mi a hnipuan pawl kha an zoh ih hipa cu mi aa tin an rak ruat. Inn khat ah cun a mah kha “hlapi ah feh aw”tin au phah in an rak dawi. Curuangah sunvu ten Ko Dii cu ziang te hman a ei lo.
A thaizing a thlen tikah milian pa pakhat in lamzin ih a tawivak rerotu Ko Dii kha man a nei zet mi hnipuan zun khat kha a pek. Man a nei zet mi hnipuan thar pawl kha a hruk ih a hlan vek thotho in Ko Dii ei ding ka ngah pang ah tin a dil lala. Mizaan ih an rak kawk nak inn a thleng tikah Ko Dii khal “Tuisun ka dil san thotho ding” tin a ruat ih “Ei ding malte tal….” Tin a tong a cem hlan ah inntek in a hnipuan hruh dan kha a zoh ih “Ra lut aw ziangah sangka ah na ding… innsungah lut aw” tin tihzah zet in a ti ih ei ding pawl thawn a rak hmuak.
Cabuai parah tihang phunphun ….., rawl phunphun a khat… Ko Dii khal hmaisa bik ah thla a cam ta ih hmuk pakhat kha a kut thawn a lak ih a hnipuan pawl cu a rak do.
“Ei … ei …ei”
Inntek cun Ko Dii ih um tlan dan kha a hmu tikah … “Si lo ee hnipuan in cu ziangtin a ei ding, ziang ruangah na do” tin a sut tikah Ko Dii cu a mit thil a tlak in a rak sim.
Hi hinpuan a thar tuk ih man a nei zet ruangah tuini ei mi ka rak ngah a si.. Mi zaan ah hi inn ah rawl malte ka ra lo dil laiah uico dawi vekin in rak dawi… curuangah hi hnipuan pawl par ka lungawi tuk ruangah a mah thawn a tlak mi rawl pawl kha ka do nak a si” tin a ti.
In zirh duh mi cu mitamsawn cu mipakhat ih a lenglam thuam awk kha zoh in sinak an thleidang theu “mithmai neitu pawlih hmai ah hmeh ha a tam” Ti mi kha hi ca te thawn ka lo hlawm.
