(827-867, 826-885) February-14
Mithianghlim Cyril le Methodius
(827-867, 826-885) February-14
Mithianghlim Cyril le Methodius tei unau hnih ih suah nak cu Greece ram ih um Thessalonica khuapi a si. Cyril cu Constantinople ah fimthiamnak a rak zir ih kum no ten Puithiam pakhat a rak cang. A u pa Methodius cu Yatih pakhat cang dingah Gausikhiyon ih ruah sak nak a um zet mi ram hnatuan a rak cawl.
Kum 863 ah Constantinople ih Bishop in Moravia ram ah unau hnih te cu Pathian rian tuantu pawl dinhmun in a rak thlah hai. A hmaisabik an taunvo cu Slam tong (the slav language) cu Pathian thu sim nak ah siseh, dungthluntu hnatuan tuan nak ah siseh hmang thei dingah cafang ih h man mi tong ih leh nak a si.
Cui tongfang cu Cyrillic tiin an ko. Unau hnih te in minung tampi Christian Biaknak ah an rak hruai suak thei. Asinain, Biakthawinak pawl ah Slam tong hman nak Puithiam pawl ih lungkim lo nak le Puithiam pawl hriakculh pek dingah Bishop um lo nak ti vek harsatnak pawl an rak tong.
Rome khuapi ah an mai rian tuan nak thu simfiang dingih an feh lai ah Pope Hadrian II nak in Bishop si nak a rak pek. Cyril cu 869 ah a thi ih Methodius cu a mah te lawng Maravia, Bohemia, Poland le a kiangkap ram pawl ah Pathian thuthangtha sim dingin a rak tang ta.
Methodius in Barbarous tong (Barbarous language) tong nak hmun ah Slam tong Biakkhawmnak ih hman a lungkim lo tu Bishop pawl ih kaih a rak tuar. Kumhnih a rei hnu ah Pope in Methodius cu luat nak a rak pek ih Slam tong cu Pathian thu sim nak lawngih hman thei nak caan a rak pek.
A nunram ih netabik ni pawl cu Methodius in Cathianghlim cu Slam tong ah a rak let thei. 884 kum ah a rak thi ih a u an phum nak Rome khuapi ih um Mithianghlim Clement Biakinn ah a nih khal an rak phum ve.
