Lourdes khuapi ih Bawinu (February-11)
Mithianghlim Bernadette Soubirous cu France ram, Lourdes khuapi ah 1844 ah mi harsa sungkua in a rak suak. 1858, February 11 ni ah a rualpi nunau pahnih thawn Gave tiva (the Gave River) tluan ih thingro sar dingah an rak feh.
Massabielle lungkua an thlen tikah a rualpi pawl in Bernadette cu an tan ih an rak tlan san. Rin lo pi in thli nasa zet in a hrang ih lungkua sung cu tleu nak in a rak khat.
A hun zoh tikah a raang yawng kawrfual par ah a pawl yawng taikhap a khap ih Rosary a kut ih a keng tu a mawi zet mi nunau cu a kehram ah sui hninsi pahnih thawn a rak hmu.
Bernadette in zuam zet in Thinglamtah hminsinnak a rak tuah ko nain a kut pawl an thia rero ih a rak tuah thei nawn lo. A rang yawng kawrfual hruk tu nunau cun Bernadette cu a vun hnihsan hnu ah a mah thawn Rosary cam dingah a rak sawm.
Nithum a rei hnu ah lungkua ah cun Bernadette a rak feh sal ih a rang yawng kawrfual thawn nunau pakhat a rak lang sal. A mah in Bernadette cu ni ruk tiang sual nei tu pawl an sual sir dingih thlacam sak dingah le Puithiam pawl in cui hmun ih Biakinn fa te pakhat sak sak dingih sim dingah a rak cah.
Cui hlei ah a kiangkap ih um tiva in lang nak a um mi tidai in dingah a rak sawm. Bernadette cu ni 15 tiang cui hmun ah a rak feh ih thawng za leng lo minung pawl in a dung in an thlun ko nain zohman langnak hmu dingah thluasuah an rak nei lo. Bernadette in cui nunau nu ih hmin a rak sut ih “Kei cu sual hram nei lo ih a seem mi Bawinu kan si,” tiin a rak sim.
Kum 1866 ah Bernadette cu Nevas khuapi ih um zaangfah lainat nak Sr. pawl ih tlawng ah a rak thleng. A mah thawn a um tu a rualpi pawl cun tangdornak le tai maak suah theu tu a mah cu an rak upat zet.
Nikhat ah a rualpi pawl in langnak thu an rak sut ih Bernadette in “Bawinu in leivut phiat tu hmunphiah pakhat vek in I hmang. Hnatuan theh hnu ah hmun phiah cu saangkaa dung ah ret a si theu,” tiin a rak sim fiang.
Kum 1879, a kum 35 ah Bernadette cu a thianghlim mi Rosary a cam lai ah a rak thi. 1980 ah a taksa siat lo ih um nak le a hmur cu Vancungram ih a par mi pangpar vek in hni siam si ten a um kha hmuh a si.
1933 ah Pope Pius 11 nak in Bernadette cu Mithianghlim ah a rak nemhnget. Kum tin ten minung tampi cu Lourdes khuapi ah thlacam ding, mangbangza a um mi tidai in dingah le Pathian hnenin thlarau le taksa hrangah thluasuah ngah thei nak dingah an feh theu.
