A aa zet mi ram Ui ih thuanthu tawi.

          Ram Ui pakhat cu Ar hmuan pakhat a hmuh tikah hmuan sunglut ih Ar deh dingin a ruat.

          Asinan a ruangpi cu a thau tuk ruangah hmuansung kha lut ding a ngah lo. Ziangti vekin a pah a si khal le a ngah lo ih rilrawng tuar ih lut ding kha a ruat ih nithum sung rawl ei lo in a ruang fatet lawngah hmuan sungkha a lut thei ding.

          Asinan Ar a deh ih a pum a puar hnu ah suak sal a tum tikah a pum a puar tuk ruangah a suak thei sal nawn lo.

          Cutikah neta nithum rawl ei lo ih a um hnu lawngah ar hmuan sungin a suak thei sal.

          Netabikah cun Ramui khal a ruat ngah, mai aat nak ruangah mai dinhmun kha kan thleng aw ngah pang theu.

          Neta bikah cun ziang thathnem nak khal a um lo ti kha a si. kan nunram pawl kha cuvekthotho a si ziangngai hman a dang aw lo.

          Kan suah laiihsin taklawngin kan suak ih kan kir sal caan khalah kutlawngthawn kan tlung sal, ziangthil khal ken a ngah lo.

          Zo khal in hawl mi Hlawnthil le sunsaw pawl kha an ken thei dah lo.

          Kan no lai caan ah zuam in paisa kha tithei tawkin an rak hawl ko nan cui paisa pawl thawn kan no lai caan pawl kha lei a theih nawn lo. Lungawi nak pawl kha paisa thawn an rak thleng ko nan cui paisa pawl thawn lungawi nak le caan pawl kha leisal a theih nawn lo.

          Leilung pumpuluk ih um mi thilri pawl thawn khal mai nunram kha lei sal a theih nawn lo. Curuangah hnatuan caan ah tuan aw. Cawlh caan khal ah cawl aw.

          Hnatuan phah in khal nunram ih lungawi nak pawl thawn man neih ding pawl khal lak thiam a tul.

          Mai hnen ih a um mi man kha hawl hmu thei hram uh. Mai hnen ih duhdawt nak pawl kha kilhim in ngaih sak thiam hram uh.

          A cem ral mi nikhat hnu nikhat khal lungawi nak pawl ngah hram tum uh si. Ziangtitluk ih man a nei mi innpi a si khal le nang khal itkhun pakhat par ah it thotho a si.

          Mottaw ziangtitluk ih man a khung mi le ziangtitluk in a tha a cah khal sehla, khuapi sung motor tamtuk nakah cun a tang thotho ding a si. Cak pi ih mawng a si khal le cawh kuan lala ding a si.

          Ziangtitluk ih a tha in a man khung mi bag a si khal le san a theih mi cu palastic lawng a si.

          Mi nupi ziangtiktluk a mawi a si khal le nikhat ah cu a tuak a par dingih a hna a set dingih , a el a kun ih a tar ding thotho asi.

          Mi pasal ziangtluk a lian a si khal le nangmah kha rinum zetin a lo duh tu mifarah pasal cu a tluk thei lo.

          A cang thei lo mi thil hrangah hawl tum pang hlah. Kan ngah mi lungawi nak lem pawl kha rak tanta aw. Ziangruangahtile a ngaingai ih lungawi nak hman ti mi cu hmun tinkim caan tinkim ah a pawt in a suak thei. Mah le mah lawng “Mai si tawkih lungkim thiam” dingin mah le mah kan ralrin thei ding a thu pi sawn a si.  

          Zalennak ti mi cu mitin hrangah a cang thei. Mah in kan hril dingmaw? ti mi par ah a thum aw.