Thil fatete parah ngaihsak aw
Veikhat laiah hramlak pakhat ah Vom pakhat a um. Cui Vom cu a duhham zet. Ziang thil khal ah a tum bik kha a duh ringring.
Nikhat ah cun sun ih a ihthatnak ihsin a thang tikah a pum ihsin a ring zet mi a awn pakhat kha a thei.
Cutikah Vom cun “Aw.. ka rilrawng” tin a ti ih rawl hawl dingin thu a botcat.
Nikhua a that ruangah Vom in “Oh… tuini cu nikhua a tha zet si, nga pawl tamzet an um ding” tin a ruat.
Curuangah a nih cu tikap ah zamrang ten a feh. Tiva a zoh tikah a lung a awi zet. “Nga pawl tampi an um. Tuisun cu nga tamzet ka ei ngah ding” tin a ruat.
Vom cu tiva ih ngate pakhat kha a kai.
A kai mi nga cu a zoh ih “Hi nga te cu a fate tuk. Ka pum a puar lo ding. Hi ai ih a tum mi ka hngak hrih ding.” tin a ti ih a kaihngah mi nga cu ti sungah a hlon sal.
Cutin nga te a kai, a kaih mi nga cu a fate tuk tin a ti ih ti sungah a hlon, vei tampi nga te pawl a kai, ti sungah tu le tu ka thlak sung tin neta bikah cu a nih cu zianghman ei ding a nei nawn lo. Anih cu Nga te pakhat hman ngah lo in rilrawng zetin a rat nak zin vekin a tlung sal.
Hi thuanthu tawi siar tu zaten zirnak pakhat tal kan ngah ding tiah ka zum.
Tahthim nak ah
Fimthiam nak lam ah a sile… camibuai on duh a si le tahnak pakhat tiangcu ca kha zoh a tul. Camibuai on dingah nemhnget mi ca zate kha veikhat te ih zoh ding a rem lo.
Pakhat ngah hnu lawngah pakhat zoh ding cu a remcang sawn. Culawngah hlawhtlin thei nak dinhmun pakhat tiang co a theih ding a si.
Sumdawn nak lam ah a sile… minei nung hlawhtlin nak ngah tu si na duh a sile a hnuai dinhmun ihsi thoh cu a tha. A ngaingai ih hnatuan tumpi kha tuan thok caan ah thiamzet le nal zetih tuah thei cu a har theu. Cu a si ruangah a thok ihsin thaten zir ding kha a tul. A thok ih thaten tuah lawngah mai hnatuan a thangso ih a hlawhtlin ding a si.
Pawlkom nak lamkhal ah a sile mitampi thawn nel awk ding hrangah caan khat te sungih tuah a thei lo. Mipakhat pahnih kha a hmaisa bikih nel ding kha a tul. Cui tin mipakhat pahnih in nuam teten mitampi thawn nel awk ding a si.
Cutivekin thu phunphun ah thil tenau pawl kha ngaihsak a tul. Thil fatete pawl kha fingkhawm ding. Thil fatete pawl in thok ding. Thil fatete pawl kha kil him ding. Mai ruah san mi thil cang suak thei nak ding hrangah a thok ihsin thok ding.
Thil fatete ihsin thoh ding. Thil fatete pawl cu caankhatkhat ah thil tumpi pakhat ah a cang thei.
Thil fatete in thok aw. Nikhat ah cu cui thil fatete cu a tumzet mi pakhat ah a cang leh ding asi. RVA ih kan thlah mi ca in rak siarsak tu zaten Pathian in thlasuah lo pe hram seh.
Credit:
