Vancung mi pawl thu
Pathian in a mawi ih a tha mi Vancung mi pawl tampi a rak sersiam a si. An mah pawl cu Vancungah nuamnak thawn um dingah Pathian in a rak duh. Asinan Pathian in an mah pawl cu hniksaknak a rak tuah. Pathian in Vancung mi pawl kha thu kham thlun ding pakhat a rak pek. Lucifer ti mi Vancung mi in Pathian ih pek mi thu a rak thlun duh lo. A hrekkhat Vancung mi pawl cu Lucifer ih dung an rak thlun. An mah pawl cu a thalo mi vancungmi pawl an si. An mah cu khuavang pawl tiah kawh a si. Pathian in a thalo mi vancungmi pawl cu hell ram ah hremnak a rak pek. Khuavang (Khuasia) pawl in kan mah pawl cu mi tha lo mi sual cang dingah sual in sawm a si. Minung pawl kha Hell ram ih thleng dingah an tuah a si. A sinan Pathian in kanmah pakhat ciar hrangah a tha vancungmi pakhat ciar in ret sak a si. Kan mah in kilkhawitu Vancungmi pawl in kan mah kha in kilkhawi. Vancung ram cu kan mai inn ngaingai a si thu kilkhawitu Vancungmi pawl in ralrinnak in pek. Kanmah pawl kha mitha cang dingah in bawm a si. ( Thuphuan 12:7-12, Suahlannak 23:20-22, Mt 18:10, Saam 91:11, Lk 16:22 ( CCC 362-373)
Thlacamnak – Pathian ih fial mi kanmah in kilkhawitu Vancungmi kha duh thei dingin in zirh hram aw.
Nitin nunpi dingmi – Harsatnak phunkim kan ton tikah Vancungmi pawl cu kan mah thawn an um thu mangsal ding zuam ding.
Thusuhnak – Pathian in kan mah bawm dingah zo so a ret?
Asawnnak – Pathian in kanmah pakhat ciar bawm dingah kilkhawitu vancungmi pakhat ciar in ret sak a si.
Pathian in kanmah kilkhawi dingah——————————- pawl a rak sersiam.
