Uico tarpi le a bawipa thuanthu tawi
Veikhatah a fimvar zetmi sa dawi tu (ui tarpi) pakhat cu sakhi cang pakhat kha a kai.
Asinan ui tarpi cu tha a nei lo, ha pawl a neih nawn lo ruangah cui Sakhi cang cu a cang thei nawn lo ruangah a thlah.
Cuicaan ah a bawipa in a ui tar pi cu nasa zetin a thawi. Asinan zangfah zazet a si mi ui tarpi ih a tanglam vekih a ttong mi ruangah a bawipa in a tawi kha a cawl.
“Cawl thlang aw ka bawipa… Ka ralthat nak le ka thinlung ngam nak cu a um lai ti cu na thei bik. Asinan ka thazang le ka ha pawl cu a um nawn lo. Cu pawl khal na hna ka tuan phah ih cemral mi an si ka bawipa.” tin ui tarpi cun a bawipa kha a sim.
Hi thuanthu kha zirphah in zirnak ziang pawl na ngah.
Kan kiangkap ah a cang theu mi thil pakhat cu hi thuanthu thawn a kaih aw. A lenglam dinhmun pakhat kha thaten zir ta lo in sa dawi tu ui tarpi ih a bawipa vekin thu an botcat theu. Mai hmundan pakhat lawngin zir ta lo, ruat ta lo ih thu botcat a si le sual nak a tel theu.
Saya/mah pawl khal nauhak pawl ih sualnak, tawhawk nak pawl thaten cek fel lo in cawhkuan nak pek cih dan a si lo. Veikhat veihnih ah hrekkhat tlawngta pawl cu hro lawngah thusim an ngai a si lo. Mah ih nunsim mi tongkam a that a sile nauhak pawlin an thlun ding a si. Thil pakhat kha thaten zingzoi ta lo in cawhkuan pek hnuah thuhla hman kha theih a si le remsal a theih lo mi sualnak khal ton a theih. Curuangah hringhro nak pawl hman ding hnakin a thum ih a tha mi tongkam hman a sile a tha deuh ding a si.
Nu le pa pawl khal in mai fa le pawl sual nak an tuah ngah pang a si le kawk ding, hro ding, thawi ding cuvek cin le dan pawl kha hlonhlo ding kha a tul thlang. Hrekkhat nu le pa pawl cu mai fale pawl kha sual nak an tuah ngah pang a si le thil cang mi kha ruat ta lo, sut ta lo in kawk, hro, thawi tin hmakhat teah sual puh cih ding a si lo. Veikhat veihnih ah mai fa le cu ziangvek sual nak an tuah ngah pang a si khal le a thum zet mi tongkam pawl thawn nunsim a tul le nun sim ding.
Kan mah mino pawl khal hmuh ngah mi thil, ruah ngah mi thil tinkim khal kan ruah dan vekin nemhnget cih lo ding kha a tul. Nunau le mipa an feh tlang a si le “An nih cu cuvek khivek an si zo” tin khal nemhnget lo ding. Nelawknak/komawknak ruangih feh tlang tla an si thei. Bawm tul ruangih feh tlang tla an si thei. Pawlkom awk nak sung khalah mah thawn pehpar nak a um lo tikah “Tuihrawng in kom duh nawn lo vek a bang” cuvek ruah nak pawl khal ruah lo ding kha a tul. Ruah nak a sual a si le nelawk nak pawl a siat thei. Curuangah thil si dan ruangah a hman lo mi thu botcat in mi zate ih theih dingin tarlang hlah.
“Rual nak a sual a si le pakhat le pakhat komawk nak khal rei a daih lo ding a si”
“Ruahnak a hman lo a sile nat nak pawl hleice in tuar a theih.”
Thil um dan pakhat kha zingzoi theh hlan cu thu kha botcat cih lo ding kha a tha bik” tin ka ruat.
#crd
