Veikhat ei dahnak ih lungawinak hngilh hlah.
Voikhat laiah a nuam zet mi ramlakpi pakhat sungah a tum zet mi thingkungpi a um. Cui thingkung par ahcun tlangak pakhat a um. Cui tlangak te cu Tlangaak dang pawl thawn bang aw loin thinlung tha a nei zet.
Nikhat cu tlangak rawl hawl dingin a feh ih hmun pakhat ah a dam lo ih tawl zet mi Ramui pakhat a hmu. Ramui cu rawl a ei lo ruangah tha te khal in a feh thei lo. Tlangak in Ramui cu a zoh ih a zangfak tukih a kiangah a va cawl.
“Ka rual Ramui ka lo zoh ih ka thin nuam lo na dam lo maw si?” “Aw zianghman ka ei ka inn lo ruangah ka tha dawn tin” a ti. “Cu mi hrangah zianghman thinphang hlah rawl ka hawl ding ih ka lo pek ding tin” Tlangak in a ti ih rawl a va hawl. Tlangaak cu Vunnel lakah nga a thi mi a hmu ih a kaa in a rak keu ih Ramui cu a pek.
“Ka rual a thaw maw tin” tlangak in a sut ih “Ni reipi rawl ei lo in ka um ih na hawl mi nga cu pumpuar nak a tlak lo” tin a ti. Tlangak cun rawl a hawl sak lala ih zinghman a thi mi thiar thei ngai lo in a rak thair ih Ramui cu a pek lala. Ramui cu tlangak ih a ken mi a thimi sa pawl cu ei in a tha a kim vivio thlang. Tlangak in nitin vekten Ramui hrangah rawl a hawl sak. Cutin Tlangak ih hawlsak mi rawl a ei ih tha a kim zettu Ramui cu a hlan ih a thinlung siatnak kha a suak lala.
“Nitin a thicia mi sa lawnglawng ka ei, tu cu tlangak kha tharhlam zetin ka ei si le ka tha a tam sinsin ding tin” a tha lo mi a thinlung a suak ih “ka rual mizaan ih i hawl sak mi nga kha ka ei ih a ruh ka dang ah a tang, na hmurzum mi khan i run lak sak aw tin” a ti. Tlangak in ngaingai ah a ruat ih ramui kiang a naih ih a kaa a aang ter. A dangah ziang hman a hmuh lo ruangah tlangak cun Ramui ih thinlung that lo nak kha a kai ngah thlang. Cui caan ah thluak thawn a nung tu Ramui cu tlangak ih hngawng kha a keu. Ramui ih khuakhan a thei tu tlangak cu zamrang zet in a zuang.
“Hey Ramui na san sung ziangtik hman ah rawl khopkham in na ei ngah nawn lo ding. Lungawi hna thiam lo in na hrang ih that nak lo tuah saktu par ah na sual ih thah na tum. Har nak na ton khal le zangfak tlak na si lo” tin tlangak in a ti ih a zam. A zam vivo ih ramlak pakhat a thleng ih a it mi minung pakhat a hmu. Ramlak ih mit aa in lamzin a hlo ih rawl a ei lo nak a rei ruangah a ngal mi a si kha a thei. Tlangak cun minung pa cu a zoh ih a zaangfak. Harsat nak a pek thei lo ti kha a thei ih minung pai liang par ah a to. Minung pa cu a mangbang tuk ih a hung to vukvi. Cui hnuah langak in thingrah pawl a hawl ih minung pa kha a pek ih a tha a um deuhdeuh. Nikhat cu tlangak rawl a hawl phah ah ramlak ah nam pawl fei pawl thawn mibur pi kha a hmu ih a au phah ah minung pai um nak lamah a hruai hai. Siangpahrang fapa le miburpi pawl cu an hmu aw sal.
“Tlangak in Siangpahrang fapa kha rawl a hawl sak. Siangpahrang fapa bawmtu asi” tin Miburpi pawl cun an ti. Tlangak minung pa ih liangpar a to ah minung pa in tlangak kha a tangah a pom. Tlangaak te cu Siangpahrang fapa pawl thawn Siangpahrang inn ah an hruai. Siangpahrang fapa in Tlangaak kha a mah bawmtu ah a nemhnget ih a hmuan sungah a ret ih rawl pawl a pek. Lungawi hna a thiam lo tu Ramui cu rawl ei ngah lo in a tha a cem ih a thi. Curuangah kan par ih that nak a tuah pawl parah lungawi thiam lo in hrolhrawl le depde in kan rulsal a si ah cun zianghman hlawknak kan hmu lo ding asi. Casiartu zate parah kan lungawi.
