Zangzel Pa ih thuanthu tawi

          Voikhatlaiah khua pakhat ah nu le pa nei lo hngaktah pate pakhat a um. A zangzel tuk ruangah an khua mi zaten mi zangzel pa tin hmin an pek.  Nu le pa a nei lo ruangah a farah zet.

          A khuapi pawl in an zangfak ih Caw khalh an fial.  Cule a tawl zet mi caw tla laksawngah an pek. Cutin mi zangzel pa cu khua ihsin a suak ih a khuapi pawl ih Caw kha a khalh sak, nuam teten khuapi pawl ih caw cu an tawl deuhdeuh ih a mai Cawtawl te kha a thau deuhdeuh.

          A khuapi pawl in an zum lo ih an bihthup tikah zangzel pa cu rawl um nak a thlen veten a mai Caw lo hmuahhmuah cu thingkung tang ah a hreng ih a mah cu a it that.

          Zaanlam a kim ih Caw pawl thawn khuasungah an tlung thlang. Cutawk ah a khuapi pawl in thah an duh zet.

          Khua bawi in zangfah nak tum bik thawn a Caw kha khua in that seh tin thu a suah. Cutikah zangzel pa in “Caw cu nan thah khal le a phaw cu i pe uh” tin a dil.

          Khuapi pawl khal in a phaw cu a tangkai nawn lo ih an pek. Zangzel pa khal cawphaw cu longgyi (a hni) thawn a tuam ih khua ihsin a suak. Zin cu a zawh vivo ih ramlak a lantheh hnuah khua a thim.

          Cutik ah a naibik mi hmuangkung pi par ah a it. Zaan a thim thlang ih a it nak thingkung tangah mi burkhat an um kha a hmu. An sim dan vek cun cui hmun kiangkap ih a um rero tu Damiah (rukru) an si. An lak mi pawl zem awk phah ah zuu an inn. Zangzel pa in a tih tukih a ih nak cawphaw cu Damiah (Rukru) pawl par ah a tla.

          Damaih (rukru) pawl in Hmuangkung cu mithla um ah an ruah ih zianghman lak loin an tlan.  Zangzel pa cu mal te a rei deuh in Damaih pawl ih an ei bang mi pawl a ei ih an ruk mi thil ih a hrek kha a lak, a hrek cu a cawphaw thawn a tuam ih a phum ih khuaah nihnih hrawng a um hnuah a tlung. Khuapi pawl in an hmuh ih an mangbang.

          A taksa par ah ngun, sui pawl in a khat. Cutik ah an um thei lo ih an sut. Zangzel pa khal in ka Caw in that sakih ka lungawi tuk. Khi NePyeTaw lam ah Cawphaw man a tha tuk. Cawphaw pakhat te lawng asi ih hi zat lawng ka ngah. Khuadang pawl cu cui thu an thei ih an zuar ciamco an khuapawh in milian ah an cang theh. Hi khua pawl cu nan aa tuk tin a ti.

          A khuapi pawl in a thu cu an zum ih caw pawl an that ih NePyeTaw lam ah an zuar thlang. Khi lam ih minung pawl in mi aa ah an ruah ih an rak dawi hai.  Khua mi pawl cu thinheng zet in an tlung. Khua an thleng ih zangzel pai inn an ur sak. Zangzel pa in inn nan ur mi ih a vutcam cu i pe uh tin a dil.   Khuami pawl khal in an pe. Zangzel pa cun vutcam cu a longyi (a hni) thawn a tuam ih khua ihsin a suak. A hlan ih thilri pawl a phum mi kha a lai sal ih nithum a rei hnuah khua ah a ra tlung lala.

          Tuitum khal sui le ngun in a khat lala ih khuami pawl in an sut. Zangzel pa khal in nisuah nak lam nithum sung khual tlawn asi le cu tawk ah TayaKung timi khua a um. Cui khua ah inn ur mi vutcam kha ka zuar.  An khua ah thing, rua pawl kha sii lam ah hman a ngah lo ih khuadang ih inn ur mi vutcam kha an lei theu a si. An sii cu a cak ih an zuar cak ruangah milian ah an cang.  Khua dang pawl khal vutcam an zuar ih an lian theh. Vutcam pawl lak hman ah ka vutcam hi a tha bik tin ati. Curuangah man khung in ka zuar. Cu hman vutcam kha mal te lawng ka keng ruangah tin a ti. Cutin khuami pawl khal an inn an ur ih vutcam pawl kha leng par ah an ret ih an va zuar.  A hlan vek thotho in thinheng zet in an ra tlung.

          Khua mi pawl thu an rel khawm thlang. Hi zangzel pa ruangah fial ding mi caw pawl an thi, inn pawl khal kan nei nawn lo ruangah hi pa thih nak cawhkuan kan pek ding tin an khua kiangih tiva ih nga sio nak ah an tar ih khua ah an tlun san. Ti a thang sile tidai sungih tla cih ding in an ti. Tui tum cu zangzel pa khal ka thi thlang ding tin a thinhar rero lai ah a dang khua ih mi pakhat in a mit khatkam tha lo naa a khawr rero tu in a hmu ih hey…minung pa zo pawl in cutin a lo tem tin a sut.  Zangzel pa in ka khuapi pawl panteh. Ka duh lo cing in khua bawi in tuan ter ka tuan paih ka ti ih hi tin in tem a ti. Cu pa khal in kan dinhmun thleng aw men sehla ka duh khua bawi tuan tla cu ka mang hman ah ka man dah lo a ti. Zangzel pa khal in thungai maw silecu ol te si, kan dinhmun kan thleng aw pei cu khua mi pawl hi thuhla sim a tul a ti ih cu pa cu a mah an tem nakah a tem ta ih a mah cu Naa kha a dir ih khua sungah a lut sal. Cui Naa nei tu cu ti a tan caan ah tidai in a fen.

          Khua mi pawl cu zangzel pa kha a thih lo hlei ah Naa pakhat thawn an hmu ih an mangbang tuk ih an sut.

          Zangzel pa in khai tiva kha ti luan a cak tuk. Nan nih cu voikhat hman khua leng nan suak dah lo ih ziang nan thei ding ih ati.  Tiluang mi in Naa pawl a run fen ih tiva kha a kau ih a Naa kha a lai ih a thlen le a tum sinsin. Ti thuk nak ah in tem lo ih hi Mit khat lam tha lo mi Naa lawng ka ngah. Khua mi pawl in an zum ih a hlan ah nga sio nakah an tem aw hai. An khua pawh ten tithuk le a tha sinsin a ti tikah zangzel pa in tili a lai ah a tem hai. An Nupi pawl le nauhak pawl cu tiva kiang in an hngak. Ti a thang lala ih an zaten hmuh man lo in tidai in a fen theih hai.  Zangzel pa in pasal ra tlun dingih a hngak tu nupi nu pawl kha a hei auh Tluak nei lo pawl cu an liam theh zo. Nan zaten tuisun ihsi thok in ka nupi nan si. Ka hrangah hnatuan thlang uh a ti. Thuanthu cu hizat asi.

          Voikhat bum tuar sile bumtu ih sual, Voihnih bum tuar sile bum tuar tu ih sual asi.  Curuangah bum tuar lo dingin Facebook hmangtu pawl caa siar nak thawn theihkauh nak pawl ngah dingin ka lo fial duh. Caa siar tu zaten upat nak thawn.

Credit: