Mithianghlim Farncis de Sales
(1567-1622) January-24
Bishop Geneva hmin nei mi Mithianghlim Francis de Sales cu France ram, Savoy khuapi ah 1567 ah a rak suak. A nauhak lai ih ap awk nak nunram lam ih a peih zet tu a si vek in kumkhua thianhlimnak thukam a rak tuah ih a mah le mah Thianghlim Nu Maria ih bawmnak thuai ah a rak ap aw.
Paris khuapi ah kum reipi fimthiamnak a zir hnu ah a kum 24 ah Padua phunsangtlawng ah upadi lam thawn pehpar mi professor buaih a rak ngah.
1593 ah a Pai lungkim nak thawn Puithiam cannak a rak ngah hnu ah dodal tu Protestant pawl ih huap nak hmun a si mi Geneva tlang thuai lam ih um tih a nung zet mi Chablais Pathian riantuannak khualtlawnnak cu a mai thinlung duh nak thawn a rak cohlang.
Zaankhat ah savom pakhat ih donak a rak tuar ih thingkung parah kai tahrat in zaanvar a nunnak a rak hum. A thaizing zinglam ah a thi zik te mi Mithianghlim Francis de Sales cu “Pathian ih hril nak a ngah tu milai pawl cu thluasuah thawn runnak an ngah ding” ti mi ruahnak a cohlang tu pawl in an hmu ih an rak tuamhlawm.
Mithianghlim Francis ih duhdawtnak le a fimthiam nak thawn a thusimnak ruangah cui ruahnak a nei tu pawl cu Catholic zumnak ah an rak thawn. 1595 sungah a mah that dingih a tum tu mi that tu ih do nak voihnih rori a tong nain thih nak ihsin mangbangza thawn a rak luat.
A mai dungthluntu hnatuan pawl karlak in tikcu remcang hawl in Pawlpi ih thuzirh mi pawl a karhzai nak dingah thuthannak ca pawl, ca uk pawl a rak ngan.
Mithianghlim Farncis a thlen caan ah kohhranpi 20 hrawng lawng an rak um ko nain, cui hnu kumli a rei hnu ah cun mipi thawng za leng lo in Pawlpi sungah an rak lut.
A mai dungthluntu hantuan a hlawntlinnak ih a hrampi an suh tikah Mithainghlim Francis de Sales in “duhdawtnak cu hamisa ah ret in thu a zirh tu cun buainak tongkam kam khat te hman a tong dah lo nain ruah nak hman lo pawl a zirh thei,” tiah a rak sim.
Kum 1602 ah Geneva Bishop ih hril nak a ngah caan ihsin thok in Mithianghlim Francis de Sales cu Pathian thuzirhnak, thusimnak le Sualthlahnak ngai sak nak pawl thawn thatho zet in hna a rak tuan.
A mah cu tangdor nunnem zet mi a si ih tirhsiang zet tu a si ih hlei ah mi tinkim zaangfah nak a rak hmuh. Pathian ih duhdawtnak thu a simfiang nak ah “duhdawtnak tahfung cu tahnak rikhiah a um lo mi duhdawtnak a si” tiah Mithianghlim Francis de Sales in a rak ngan.
Martin hmin nei mi hnaset mi pakhat cu a inn ah a hruai ih takpum cangvaihnak tong daan thawn Christian zumnak a rak zirh. Hi mi ruangah Mithianghlim Francis de Sales cu hnaset pawl ih rinsan mi Mithianghlim pakhat ah a rak cang.
Kum 1610 ah Mithianghlim GinFrancis Chante ih bomnak thawn “Bawinu Maria in Elizabeth hnenih a len nak kaing” a rak din.
Mithianghlim Francis de Sales cu “Jesuh” ih a ka in tongphah in Lyon khuapi ah kum 1622 ah a nunnak a rak cem.
Mithianghlim Francis de Sales in Pathin hna a tuan nak ah harsatnak tampi a tong ko nan beidong loin Bawipai hrangih a ttuan nak cun Christian sungih a rak hruai thei vekin kan nih khal kan kiang kan kap ih a umtu pawl Bawipa hnenih a hruai theitu kan si ve thei nak dingah Bawipai hnenah thla in camsak aw tiin thlacam tlang uhsi.
