Mithianghlim Vincent (+304)

          Spain ram ih hmaisabik Mithianghlim a si mi Mithianghlim Vincent cu Saragossa diocese ih deacon pakhat a si.

Kum 304 ah Dacian Siangpahrang ih hrem nak caan sungah Mithianghlim Vincent le a mai Bishop Valerius pawl cu Valencia thawng ah thlak an rak tuar ih rawl le tidai hal nak le harsatnak a phunphun an rak tuar.

          Hringhro nak pawl, thukam nak pawl zing a siar lo thu le mai zumnak hrangah ziang hmuahhmuah tuar dingih an man cia thu Bishop ai-awh in Mithianghlim Vincent in thuthentu hnenah a rak sim.

          Cu tikah Dacian Siangpahrang cu a thinheng tuk ih Mithianghlim Vincent cu hremnak thawn harsatnak a phunphun a rak tuar ter. A mah cu an ih ter ih a taksa pawl cu tengkhit thawn a rak tan theh.

          Cui hnu ah a taksa pawl cu ci te a hnih ih a vaam zet mi thir par ah an ret ih Mithianghlim Vincent cu an em. Netabik ah bel kuai mi pawl darh nak khaan sungih zial par ah an hlon ih cui hmuh ah cun Mithianghlim Vincent cu a nunnak a rak cem.

          An hrem sung hmuahhmuah ah a mai dai ten le remdaih nak a hmu tu thawng kiltu pakhat cu mangbang zet in a sual nak pawl hrangah sir aw in a nunnak a rak thleng.

          A ruak cu dip sungah an thun ih tipithuanthum sungah an hlon ko nain Christian pawl in an rak hawl hmu sal. Cui sin thok in Mithianghlim Vincent upat nak cu Pawlpi sungah a rak karh.

          Mithianghlim Vincent cu a zumnak ruangah hremnak a phunphun a rak tuar ko nain a zumnak thlahphoih lo in a net tiang Bawipai hrangih a rak tuan bangin kan nih khal harsatnak phunkim lak khal ah thazaang in pe aw tiin thlaza cam tlang uh si.