Spain ram ah Sister Clare Crockett, mithianghlim dinhmun ih khaisang dingah a thuhla pawl zingzoinak on thok.
2016 ih nunnak rak cemtu Iris miphun Sister Clare Crockett cu Spain ram Madrid ih Alcala de Henares Biakinn ah caanserh thawn kan dung zarhpi ni ah an rak tuah.
A kum 33 ah Ecuador ram ah 2016 Linghninnak ruangah nunnak rak cemtu Crockett cu a tu ah Catholic pawlpi in a thianhlimnak kha a hmaisabik ah zoh in “ Pathian ih salnu’ ti mi thu luu thawn an rak tuah.
Bishop Donal Mckeown tel in Ireland ram saklam ih Derry khua pi in minung 100 luan cu cui puai ih tel dingah an feh. Santiago de Chile ih archbishop Fernando Chomali Garib khal a rak tel.
Derry ah live ih thlah mi caanserh zoh dingah minung 500 hrawng Cinema zung pakhat ah an rak pum khawm aw. Derry ih mipi pawl cu a mah hrangah an suangaw zet tiah McKeown in The Irish News ah a rak sim. Crockett ih thuanthu cu thlengawknak a tongtu mi pakhat ih nunram ah Bawi Jesuh hrangih a apaw tu pawl hrangah a hleice ih a langsar mi thah thimnak a si.
Crockett cu Derry ah Nov 14, 1982 ah a rak suak. Duhnungza a si mi le nuamnak a duhtu kum note mi dinhmun in a mah cu lemcangtu dinhmun in laksawng pakhat a rak ngah ih UK ah Channal 4 ah video tuah mi pakhat zuknung hmuh dingah lungkimnak ca a rak ngah ih Nickelodeon ih uar zet mi a rak si dah a si. A mah cu kum 10 vuakvel, tleirawl te a si laiah Party puai ah zuk le hmawmnak pawl khal a rak tuah.
A sinan a mah cu a kum 17 ah Spain ih Holy Week retreat kha 1982 kum ih rak din mi the servant of the Home of the Mother le Eucharist’ Marian thlarau lam thu thawn pehpar mi kha mino pawl hnen a darh aw tikah a mai nunram a rak thleng.
Amah cu Spain ram ih a rak thlen tikah thu ngai ruat lo in a lenglam ah a huatsuak mi nauhak pakhat a si tiah a mai thuanthu ih tetti a khannak thu kha nehhnuah man sal a si. A sinnan Good Friday ni ih thinglamtah upat sunloihnak, Jesuh ih ke hnamnak pawl ruangah a nunram a rak thleng a si.
Thilcang mi pawl hi a cekci cun simfiang daan ka thiam lo tiah a rak ti. Vancung mi pawl ih hla sak aw lole Thuro pakhat kha luanglu in a rungtum kha ka hmu lo nan ka hrangah Bawipa cu Thinglamtah parah a um cu a fiang tuk tiah a mah in nunram thu a rak sim.
Cui zumnak pawl thawn kei cu nasa zetin riahsiatnak ka rak tongih Thinglamtah lampi thlunnak thlacamnak ka rak tuah. Ka thinlung sungah ni dangih a um dah lo mi kha nasa tak in a rung um. Ka hrangih nunnak liamtu hrangah pakhatkhat ka tuahsak ve ding’’ ti mi ruahnak ka rak nei tiah a sim.
Hi mi cu Sister of the Home of the Mother riantuan tu pawl thawn in pawlkom ter tu thlengnak le damnak khual tlawnnak pi ih a thawhnak khal a si tin khal a rak sim.
Lenglam sinak le sualnak ih nunram ih dunglam ih tang dingah a thokah cun a rak um lawk nan a mah cu Spain ah 2001 kum ah religious life (pumpek nunram) ah a rak lut ih 2006 ah a hmaisabik thukam pathum a rak sang ih 2010 ah kumkhua thukamnak a rak la asi.
Amah cu midang pawl a suan in a cawng thei mi lungawinak le a apawknak ruangah mi tampi in an thei ih Spain ram, America ram le Ecuador ram pawl ah Pathian rian a rak tuan tu a si.
Sister Clare cu Ecuado ram Playa Prieta, Tlawng ah music zirhtu dinhmun ih a um lai ah 7.8 magnitude a tam mi Linghninnak in April 16, 2016 kum ah a nunnak a rak cem. Sister tuan dingin zirh thoktu (postulant) minung 5 khal an nunnak a cem a si.
A mah ih thuanthu hngilh lonak zuknung ‘’ All or nothing: Sister Clare Crockett cu you tube ah Spain le mirang ttongin a zoh tu 4 million luan in a thuanthu cu pumpek nunram ah mi a thangphawk ih leilung killi ah zumnak a thuk ter ih a khoh ter a si. hi mi thuthang cu Catholic news agency in kan don mi a si.
