January 14,2025,                                                                    Simtu Saya John No Mang,

Zawnruat tu

Nan zaten kumthar cibai, Zawnruat tu ti hmang in Pathian thu ron lo hawm ka duh hrih. Kan bible ca siar ding mi pawl cu Heb 2:5-12, Ps 8:2,5-9 le Gospel cu Mk 1:21-28 sungta pawl an si ding.

Milai hi ziangtin so a siih na seherh ringring mihring tak ko hi. Ziangsaw a siih a zawn na ruah?

          Tui kan siar mi ih milai na seherh ih a zawn na ruah a timi ah hin, Pathian in Zesuh milai a si nak parih a zawnruah nak thu kan hmu. Thu cu minung ah a cang. (Jn 1)

          Filip 2: 6-11, Minung ah a cang ih minung pian zia in a piang. St. Paul cun Zesuh cu mi hmuahhmuah ai ih a thih ding ruangah caan tawi te sung van mi hnak ih niam deuh ah a tuah a ti. Hi mi ah Zesuh hi van mi hnak in a niam deuh ti nak a si lo. Zesuh milai can nak a la ti a rel duh nak a si sawn. Khirh Zesuh Pathian sinak a nei ringring. Filip 2:6, 1Tim 3:16 ah a mah cu minung taksa in a suak. A dik mi a si thu thlarau in a lang ter. Cule vancung mi khal in an hmu. A thuhla cu mi phunza kip hnenah phuan asi ih leilung khuazakip ah an zum. Cule sunlawi nak ah lakso a si ti kan hmu bet.

Sile kan thupi ah kan lut dingih Pathian in Zesuh hi ziangtin a zawn a ruat. Zesuh thlen inn a tong lo vek nan Pathian in special khan a ruahsak. Herod kut in a luat tin. A zawn ruat in a tlanpi ih a zawnruat in a kirpi sal a thi nain a zawn ruat in a nung ter sal. Cu tivek cun Pathian in Zesuh milai sinak nei parih a zawnruah nak kan hmu thei.

          A veihnih nak ah Zesuh milai in zawnruah nak kan zoh pei. Milai hi ziangah saw na seherh ih mi hring men hi an zawn na ruah. Natnak tuar pawl an zawnruat in a dam ter. Mitcaw, kezeng, kephar, thiput, tong thei lo, minaa tampi, an zawnruat iin a dam ter. Thih reiding in siang lo. Nuhmei nu ih fapa, Jairu ih fanu le Lazarus ti pawl a thi tui zawnruat le a nung tui zawnruat in a nung ter sal. Rawl pe uh a ti. Kan rilrawng ding in siang lo.

Tahthim nak – Naute faphir zawn a ruat,Rilrawng tihal an zawn ruat in rawl a pe. Mi 4000, Mi 5000 lamzin ah an tamsawl pang ding a ti kan rilrawng ding in siang lo. Jerusahlem a luh ih a laak to mi a nei t u zawnruat in Khirh sal ding thu a cah. Mk 11:3 a lo khirh sal cing ding vati ih a ti. Khal tu nei lo tu kan si laiah kan zawn in ruat.

“A mah rori in kan nat nak cu a lak ih kan dam lo nak pawl cu a phur hlo asi” Mt 9:38. Tulaifang kan din hmun tla hi cu Pathian hin kan zawn in ruat lo teh asi pang kemaw ti pang a ol te. Ral tih ah hmuntinramtin kan thleng. A sinan Pathian in kan zawn in ruat ih inn le lo hrangah thlen inn in zem, Rilrawng tihal ih kan um laiah ti le rawl in in rak hmuak. Puansin ding nei lo hrangah zansin puan in pe. Zesuh cu thangthat siko seh.

Hi hi kan Pathian ih zangfah nak le zawnruah nak ih rah asi ih hi tivek ih ral tlan bom nak in rak pe tu le in rak zoh tha tu nan zate par khal ah lungawi nak tampi ka nei. Pathian in nan sian nak parah mal lo sawm hram seh. “ Thilrit a phur tu le zonzaih a tuar tu pawl ka hnenah ra uh colhdam nak ka lo pe ding” Mt 11:28.

U le nau leuh khuitawk hmun kan thlen le ziangvek ih harsat nak mangbang vansan kan ton hman ah kan zawn in ruattu Zesuh Pathian kan nei ti hngilh hlah uhsi.

Kan zate hrangah Pathian in a thar in thluasuah nak in pe hram seh.Amen.