St. Genevieve thuanthu tawi.

Genevieve ih nulepa cu France ram ih Lothlo mi an rak si. A nauhak lai in thlacamnak nak lamah tikcu caan a rak pek tamtu a si ih Bawi Jesuh thawn naih niam aw in midang  pawl hnenah Pathian ih thatnak a hmuh theutu mithianghlim a si.

Genevieve cu kum 7 a si ah Bishop Gemanus in a mai Tuukhal dinhmun in Genevieve tei khua a rak tlawng ih mitampi lakah Bishop in Genevieve ih um daan a zoh tikah a rak thei thiam ih Bishop in neta ah Genevieve ih thianhlimnak thu kha a rak sim cia.

Genevieve ih duhnak vekin Bishop in Biakinn sungah a ko ih Biakinn sungah nunau thianghlim si dingah Genevieve cu thu kam a rak sang. Cui hnu Nikhat ah Bishop in Genevieve cu a rak sut. Mizan ih na thukam mi na mang lai maw tiah a sut ih Genevieve in a man sal thu a sim ih ka thu kam mi parah ka kim ter ko ding tiah a rak let.

Cutikah Dar thawi tuah mi zuk pakhat kha Genevieve ih hngawngah a orhsak ih Pathian hmai ih a thukam mi mang ringring dingah tiah Bishop in a rak sim. A dang sui le ngun pawl parah duhnak nei lo ding khal ah a rak cah.

Bishop Germanus ih tha peknak in Genevieve cu a  nunram kha thlacamnak, upat sunloihnak le a sualnak parah sualcawh kuannak pawl a tuah ih a nunram a rak ap.

A kum 15 ah Parish ih Bishop hnen ah Sister tuan dingah a rak dil ih a rak ngah. Cuisin thokin a  mai a rak ap mi nunram hminsinnak ah zarhkhat ah veihnih lawng rawl a ei ih rawl ul thlacamnak thawn a tik cu a rak hmang a si.

A nulepa an thih hnuah a pi thawn an rak um ih khual a tlawng ih zumnak pawl a rak hlawm hnuah zaangfahlainatnak hnatuan pawl a tuan ih a dam lo tu pawl vehvai phah in a rak nung.

A apawknak nunram ah Thiangthlarau Pathian in hna a tuan ih mangbangza langnak pawl thawn a rak khat. A thianghlim mi a mah vek fala thianghlim pawl ih nunram cu vancung mi pawl le mithianghlim pawl vekin a rak hmu theu.

Mangbangza langnak pawl a hmuh mi thu kha midang hnen ih a sim tikah midang pawl in a mah cu an doral ih a mah cu mi banglo tiah an ti ih zumnak sual tu nu tiah an rak soisel theu. A ngaingai ah cu midang pawl in Genevieve cu meisa alhpi sungah nam thlak hman an tum mi a si.

A sinan Bishop Gernanus in Genevieve kha sual a puhtu pawl kha a rak remsak ih a mah hrem dingin a zuamtu pawl khal an rak dai theh.

Bishop in a mah cu thianhlimnak thawn a um tu nunau pawl kilkhawitu dingah tuanvo a rak pek ih rinum ten a rak tuan ih a dang fala note pawl khal in Pathian thawn an rak naihniam aw ih hi ti vekih a sunglawi mi nunram kha Genevieve in lam a rak hmuh thei a si.

Genevieve in Parish a rak do ih a nehtu Siangpahrang Gaul (Childeric) parah thu a rak  nei thei ih Parish khuapi ih paam a tlung ih harsat an tuar laiah Genevieve in Troyes ah khual a tlawngih vainim thawn a khat mi Long pawl kha Parish ah a feh ter. Siangpahrang cu zumnak sual fehpitu a sinan Genevieve parah rinsannak a rak nei zet. A mah upatnak ah Thawngthlak tuartu pawl khal Genevieve ruangah Siangpahrang in a rak thlah ih mitampi an rak luat.

Genevieve in Siangpahrang Clovis ih upatnak a rak ngah ih a mai ruahnak pawl kha Siangpahrang in a rak ngai ih a mai dilnak vekin Thawngtla pawl tampi a rak thlah.

Nikhat ah Siangpahang Attila le a mai Huns pawl thawn Parish khuapi long dingin an rat laiah Parish mipi , Christian pawl in tlan dingin an timtuah nan Genevieve in inn ah um uhla thlacamnak thawn um uh tiah a rak ti. Rawlul ih thla kan cam a sile Pathian in in humhim dingih a minung pawl a finkhawm ding ih Attila in rinlo pi ah lamzin a her dingih Parish kha la lo in a kirsal ding tiah a rak ti.

Genevieve cu a kum 89 January ni 3 ah a nunnak rak cem a si. A mai thlacamsak nak ruangah thil lamdang zet tla a cang theu a si. A hmin thannak bik cu Khuapi zaten an taksa, khuasik ih an um ih Siibawi pawl hman in an dam thei lo laiah a mai nunnak cem zo mi ruangpi biakinn pi sungih an rak luh pi laiah a mah a dai ih a tongtu pawl zaten damnak an rak ngah tiah kan thei a si. Mithianghlim Genevieve kan  mah hrangah thla in cam sak aw.