Elizabet Ann Seton cu a danglam tuk. America ram ih hmaisabik Mithianghlim pakhat a si. Protestant sungtel a rak si dah.
A nauhak lai nunram
Elizabeth Ann Seton cu kum 1774 ah New York ah a rak suak. A pa cu British ralkap ah siibawi pakhat a rak si. America ram zalennak thuthan hlan kumhnih a duh ah a rak suak. A pa cu British ralkap hrangah siibawi nunram in rian a tuan rero ih British Siangpahrang ih thukamnak a rak lak. Khatlam ah khal America ram ih zalennak lam cangvaihnak ah taima zet in an parah khal zaangfahnak a nei.
Zalennak hrangah tampi’n an rak cangvai. Tanrualnak pawl tu le tu thlengawk laifang a si. Elizabeth cu a kum thum ah a nu in a rak thihsan.
Elizabeth cu a kum 16 a kim tikah sumdawnnak a tuah tu William Magee Seton thawn an duh awk. Cui hnu kumthum a rei ah Trinity Church ah New York khuapi ah an rak thitawk. Cui Pawlpi hotu saya cu Doctor Henry Burg a si. A mah cu thunei zet tu a si ih a pawlkom sungtel pawl upat zettu a si. Cui rei lo te ah Doctor Henry Burg in Elizabeth Ann Seton ih thlarau lam lamhruaitu ka si tiin a mah le a mah a ruat aw.
A Pa cu minung pawl thatnak hrang tuahtu pakhat a si. Asinan, a mah cu din mi biaknak lam pawlkom lam a peih lo. A fanu pawl ih biaknak lam hnatuan dodal in a sim theu.
Elizabeth le William an thitawk hnu in Pathian in fapa pahnih le fanu pathum a pek. Elizabeth cu minung pawl thatnak hnatuan ih rikhiah ih sambaunak pawl a diriam thei lo. Curuangah a mah in biaknak lam hrambun in Doctor Henry Burg duhdawtnak pe thei mi hnatuan tuan a duh. Curuangah a mah cu Doctor Henry Burg cu a mai hnatuan a zuamnak ruangah a lungawi zet. Doctor Burg in a zuamnak pawl cu tha a pek.
Elizabeth Ann Seton cu 1789 ah hmaisabiknak American President George Washington President ih nemhnget puai ah rak tel tu a si.
Innsang a neihnak kumkua a kim kum ah an innsungsang ah harsatnak an rak tong. A pasal ih sumdawnnak a tlaksiat ih hlei ah a harhdamnak a tha lo. Cu vek in harsatnak an ton cu a hlan ih a rualpi hlun pakhat, sumdawnnak lam ih a hnatuanpi a si mi Italian miphun Antonio Felichi in a rak bawm. Antonio Felichi cu Lighun innsungsang in a si ih Italy ram ah a um.
Rundamtu
A rualpi hlun sumdawnnak lam ih a hnatuanpi (Antonio Felichi) in hi vekin a rualpi a sumdawnnak a tlaksiat cu a rak zoh men thei lo. Curuangah a rualpi William, a nupi Elizabeth le a fanu upa sawn Anna pawl a ko. An mai cem dingih kawh mi a si.
Felichi ih tumtah mi cu Italy ramthen ah William te’i innsungsang cu a hnen an thlen tikah sumdawnnak cu a hlan vekin tha zet in a tuan sal thei ding ti mi ruahsannak thawn a kawhnak a si.
Felichi ruangah William tei innsang cu Italy ram ah harsatnak um lo ten tluang zet in an rak thleng thei. Harsa zet mi innsungsang pawl Italy ram ih an umnak thlaruk lawng a si lai. An pa William cu a nunnak a rak cem. William tei innsungsang cu an harh sinsin. Felichi innsungsang pawl cu Catholic Kohhran ah an cang. Biaknak lam ih zuam zettu pawl an si. Cu tiin nuhmei dinhmun ih a thleng tu Elizabeth innsungsang pawl ih tumtahmi le an hmuhton mi cu harsa zet ah a cang.
Catholic Kohhran mipi pakhat ih zaangfahnak timi cu……
Felichi in a rualpi a hlan ih a hnatuanpi a si mi William tei innsungsang a ti thei tawk in a bawm ih a tuamhlawm ko nan an harsa tuk thotho. Asinan, a beidong men lo. Pathian ih thluasuah, Pathian ih duh mi cu ‘milai ih ruahnak, Pathian in tuah’ ti a si. Tangdor ten Pathian ih khawkhan mi cohlan a tul. Cu tiin Felichi in Elizabeth le a fanu upabik Anna pawl cu America ram ah a kuat.
Felichi tei innsungsang pawl thawn Elizabeth innsang pawl cu Italy ram ah caan malte sung an um laiah Felichi tei innsang ih Catholic Biaknak ah an hngetkhoh daan, an nuncan daan cu Elizabeth tei innsang pawl in an uar zet.
A hleice in a hlan ihsin Biaknak lam a rak zuam zet tu Elizabeth tei innsungsang hrangah cun thlaruk sungah an thinlung sungah Catholic kohhran mipi pakhat vek ah an cang. Pathian ih thluasuah cu Bawipa a duh tu pawl parah ziang tluk in thluasuah an co ding ti cu khatlam zawng in hmuh a theih.
Elizabeth le a fanu upabik Anna pawl cu Felichi a mah rori in a suahnak khua America ram ah a kuat ih riahsia zet in a tangta mi a fanu pali pawl a hmu. Cu vekin New York ih a thlengsal tikah sungkhat, rualpi pawl thawn lungawi aipuang ten an tongawk. Hnemnak an pek.
Elizabeth cu innsang nunram thawn kumkua hrawng a rak khuasa. Fate panga a neih hnu rei lo te ah a pasal in a thih san. Elizabeth in a mai pumcawmnak lam hrangah ruah a tul. Pasal ka nei sal pei maw, nuhmei nunram thawn ka um ding saw? Dinhmun a hnok deuhdeuh. A mah cu (Episcopal Church) Pawlpi thawn hlat dingah dinhmun in a pek. Ziangah tile Catholic Biaknak ih luh a cuu zo ti a theih fiang zo ruangah a si. Thungai ih sim a si le hi cangvaihnak cu a ngaingai a bang lo. Nunnak run in Elizabeth dinhmun in Catholic Biaknak ah a luh ding a si le (Episcopal Church) Pawlpi ih (Episcopal Church) sungtel an si ruangah mai sungkhat pawl an thin an heng ter ding.
A rualpi pawl ihsin thok in an tlansan thluh ding. Hi vek a si le a nunram khuasaknak hrangah harsatnak a tong ding. Tipithuanthum luan in Europe continent ihsin America continent ih a thleng tu Biaknak khat le khat rualrem lo mi ruahnak, thlun mi pawl khal a cem tiang ti vekin a thlun. Cu lawng si loin cu lai ah America continent ah Catholic mipum zateek an mal tuk ih thuneihnak khal a rak um hrih lo. Asinan, protestant pawl cu mipum an tam zet ih mi uktu dinhmun ah an um ih thu an nei zet.
Cui hlei ah Henry lam cun Elizabeth ih sinak kilhim ding tuanvo a nei ih Epizcopal Pawlpi ah rin um ten um a tul ti khal thei tu a si. Asinan, Elizabeth cun a thinlung a sup awk thei lo. A mai paih mi Catholic Pawlpi lawngah a thinlung a caam ih Bakalay lamzin ih um mi St. Peter Biakinn ah a khawm theu. Antonio Felichi cu sumdawnnak dinhmun ih zir in America ram ah thla malte um phah in Elizabeth cu Catholic Pawlpi ah a hiip thei mi ca uk pawl le protestant khohhran sungtel pawl a dodal theu tu pawl a sim mi pawl a sim suak theu.
Catholic Biaknak cohlan cun….
Elizabeth in kumkhat sungah a thubohcat mi a rak pek. Cu tiin Elizabeth cu 1805, March 04 ah St. Peter Biakinn ih Parish Puithiam, Fr. Mattheo Bryan hnenin Baptism a rak lak.
Harsatnak thawn hmaitonnak
A mah cu tu ah cun Catholic Biaknak sungah a luh vekin a sungkhat, rualpi pawl ih relsiatnak a tong. Nunram khuasaknak ah khal nuhmei a si mi Elizabeth a rak bawmtu a sungkhat, rualpi pawl ih duhdawtnak, duhsaknak thuhla a cem. Nu Episcopal Pawlpi ihsin a zum tu kohhran mipi pawl lakah Khrih ih duhdawtnak a cem.
Catholic Biaknak sungah luhnak cu Elizabeth Ann Seton hrangah sualnak tumpi tuah mi vek, Elizabeth ih sungkua, sungkhat pawl lak ah Satan, khuavang ih hnaihnoknak cu zateek kim in a hlawhtling. Hi mi Satan ih hnatuan cu kan mah zumtu pawl lakah a thathnemnak a um mi a si ti cu ca siar tu mipi pawl ruahter a duh. Elizabeth vekin tui Kawlram hmun hrekkhat ah hi vekih a can rero cu Yangon khuapi ah tahthimnak pakhat dinhmun in Tedim peng, Vantuai khua mi Nu Lucy Luan Za Ning cu a ngaingai ah 2008 ah hmuh a theih cu riahsia za zet a si.
Cu a si ruangah Elizabeth in sungkhat pawl in a hlan Pawlpi pakhat ih an rak um tlang lai ah nuhmei ih sungkhat pakhat cu nunram khuasaknak hrang thilri bawmnak cu misual pawl ruangah a rak cawl. Biaknak a bangawk lo ruanah sungkhat khal a hla deuh deuh ih hnon a rak tuar. Asinan, zaangfah lainatnak thawn a khat mi Pa Pathian in nuhmei pakhat ih harsatnak thei lo, zoh lo in na um men ding maw?
A tul le ruat, tidaan ngah…..
Elizabeth cu a nauhak lai ihsin fimthiamnak lam ih peih zet tu a si. Khatlam zawng ih sim a si le a Pa ih rothil ti a theih. A pa in Elizabeth tha a rak pek. A hleice in Elizabeth in mi hminthang zet mi France mifim Rusu ih zirh mi a duh zet. Rusu ih Biaknak lam a ruahnak a duhlo. Asinan, fimthiamnak lam a upatnak a cohlannak a si. Rusu ih ruahnak ah cun mi tin ih neih mi thiamnak hmuhdaan le cu mi la in hman tul mi ti mi cu a duh menmen mi lawng a si.
A mah bawmtu Antonio Felichi ih lungkimnak thawn tlawng sayamah hnatuan a hawl. Cu tiin tlawng phuan dingah an lungkim tlang. Asinan, cui rei lo te ah an hlawhtling lo. A veihnihnak an zuam sal. A veihnihnak cu an hlawhtling ding a bang. Hi hnatuan cu America ram ah thupit in Catholic tlawng phuan ding an rak tum. Neta ah America ram ih mi zaangfah thiam tu Sr. pawl (Sisters of Charity) congregation ih hrampi ah a rak cang.
Baltimore khuapi ihsin Sulpicius kaing hruaikaitu Fr. William Burg ih sawmnak vek a si le Paca lamzin ih um St. Mary Puithiam tlawng kiangah nunau pawl hrangah tlawng an phuan. Cui tlawng ah mi harsa pawl hrangah man la lo in an zirh. A pe thei tu hnen lawngin zirh man an la.
Rei lo te ah Philadelphia mi Cecilia Olune in a rak bawm. A mah thawn an reltlang ih Sr. kaing din dingin an rak rel. Bishop thawn kaing din dingah an rak rel tlang. Bishop Caryawa le Fr. Duburg pawl khal in hi thuhla pwl thawn pehpar in an rak rel tlang zo. Cui hnu kumhnih a rei hnu ah hi ruahnak cu a taktak ah a rak cang.
Sr. tlawng dinnak
Bishop Caryaw le Fr. duburg pawl ih lungkimnak an ngah ih Elizabeth le Cecilia pawl in Sr. tlawng pakhat an rak din tlang. Baltimore khuapi ih nitlaknak lam peng 40 hla ah inn pakhat le leiram pakhat an lei.
Elizabeth le Cecilia tei mang ah a dang pathum pawl tla an rak paih ve. Minung panga kom aw in pawlkom thar pakhat an rak din. Hmaisabik ah timtuah ih hmang dingah a si. Cu ti an lungkim hnu ah St. Joseph ih zaangfah lainatnak Sr. pawl tiin thukamnak an rak tuah.
Zaangfah lainatnak Sr. pawl ih uniform
An angki cu Elizabeth nuhmei a si hnu ih a rak hruk daan vekih hruh dingah a si. A dum ih angki a um lo mi angki a si. Puan thaan thawn thit mi lukhuh cu a zim ah bilin hridum thawn an ten.
Hlawhtlinnak pawl
Nehhnu kum 14 ah Elizabeth cu Felidiphia le New York khuapi ah nu le pa nei lo tu pawl hrangah tlawng an rak din. A dang Sr. kaing pawl an din mi pawl thwn tahthim cun Elizabeth ih din mi tlawng ih mipum an mal sawn. Nu le pa nei lo tlawng pahnih le tlawng men men pahnih lawng an si. A mai hrangah thinbang ding a um lo. Ziangah tile a mah a biak tu pawl in college tlawng pawl, sunloihnak tlawng pawl, phunhra tlawng pawl, siizung pawl, cuapnat tuamhlawmnak siizung pawl, technology tlawng pawl nurse tlawng pawl, vun tuamhlawmnak siizung pawl, nauneihnak siizung pawl, mi dam lo pawl tuamhlwamnak inn pawl, nauhak mi kim lo umnak tlawnginn pawl, sun nauhak umnak inn pawl, American ram mi Indian misen tlawng pawl, thinlung kim lem lo pawl umnak tam deuh in an rak sak. Tu ahcun thawng za leng lo mi Sr. pawl in thlanglam le saklam America continent pawl, Italy ram le a dang ram pawl ah rian an tuan rero.
A dang nunphung thawn pehpar mi tlawng pawl
Nunphung thawn pehpar mi thuhla pawl thawn a pehpar ahcun Elizabeth in a mai a thlun mi hlanlai daan larzet mi pahnih a rak nei. A mai pu, Richard Chartan cu New York khuapi, Trinity Episcopal Pawlpi ah Curate tiih kawh mi Puithiam pakhat a si.
Amah cu New York khuapi ih um midum pawl ca zirh dingah a mah le amah ap awk tu asi. Khaan pakhat lawngah kiangkap khat le khat zuamawk in mirang le midum pawl cazirh tu a si. Elizabeth ih pa cu New York khuapi ah hmaisabik nak harhdamnak lam mifim pakhat ah a rak cang. Amah cu milian pawl hnakin mifarah zonzai pawl thupit sawn in a rak tuamhlawm ih ramsung lut tu Irish miphun pawl tuamhlawm phah in a hnen in vun aihre nat suan a tuar ih a nunnak tiangin a rak liam.
Mino nuhmei a si vekin Elizabeth cu New York khuapi ah nuhmei pawlkom pakhat a rak din. Cui pawlkom cu khuapi sungih um nuhmei pawl le nu le pa nei lo pawl kilkhawi phah in ei in le hnipuan pawl thawn a rak bawm. A mah le a mo a si mi Rebecca thawn ziangkim an bangawk. Thatnak tuahnak ah khal an bangawknak cu mi tampi in an pahnih in Protestant mi zaangfah thiam Sr. pawl tiah an ko theu.
A mai ……a thih tikah a fate paruk a rak cawm. A mah cu a tirhsiang zet tiin a hminthang zet. Curuangah miharsa pawl, mina pawl, thawthawt har pawl in bawmnak an dil theu.
Curuangah a din mi kaing thar kilhimnak ah a san a rak um ruangah a rak tuahsuak. Elizabeth hnenih ca a kuat mi ah ‘na theih vekin kei cu dinhmun a bang aw lo mi nauhak pawl thawn a khat mi nu ka si. An zaten bangraan ten duhdawt thei lo mi a tuah duh mi bang aw lo mi nauhak pawl an si. Asinan, an mah duhdawt a tul. Zirh a tul. Zate hrangah nuamnak tuahsak a tul. Hmunkhat ih an um ruangah pakhat ciar ruah a tul. Tumtah mi pakhat lawng hnenah thatnak a si lo le thatlonak a phunphun thlaceem hnuai ah kilkhawi a tul tiah a rak ngan. A ca kuat mi zoh nak in a thinlung um tu daan zaten hmuh a theih.
A mai fapa pahnih pawl ih hmailam an nunram hrangah khal a ti thei tawk in a rak zuam. Antonio ih bawmnak thawn a fapa pahnih pawl ih fimthiamnak cu (George thawng) ah a ret. A fanu pawl tla cui pawlkom ah an um. An upat tiang fimthiamnak an zir. Kilkhawinak an lak. Nu tinkim vekin Elizabeth in a fapa William hrang a sehreh. A mai bank a hnatuan tuan dingah Lighun ah hnatuantu dinhmun in Felichi thawn an ret nan an rak hlawhtling lo. A mah cu a remcang zet ih innsang a nei. A fapa pakhat cu neta lam ah Archbishop pakhat ah a rak cang.
Elizabeth Ann Seton cu kum 45 a ti kum, 1821 ah a nunnak a rak cem. A mai a rak tan mi cawn ding pawl cu leilungtlun ah duhdawtnak le minung khat le khat thatnak hrang tuah ding a si le Pathian ih duh mi le minung ih duh mi hnatuan a si. Cui hlei ah Khrih Jesuh thawn thinkhat lungkhat ten um tlangnak cu duh um zet mi a si.
Catholic Pawlpi in Elizabeth Ann Seton cu 1975, September 14 ah Mithianghlim ah a rak pom hnget. A mai puai ni cu January 4 ah tuah a si theu.
A hnenih cawn ding mi pawl:
Thinlung tha a neitu cu Pathian in ziangtik hmanah a tanan lo ti mi zir tlang uhsi.
Italian miphun, Antonio Felichi tei innsungsang pawl ih zohthim tlak zet mi Catholic innsungsang pawl ih umtudaan cu Elizabeth Ann Seton ih thinlung a dainak thawngin Catholic Biaknak sungih thleng dingah thlaici a rak um. Cu tiin nuntu ziaza thawngin Bawi Jesuih uknak ram simnak a si. Nang mah thawn the ziang tin si?
Elizabeth Ann Seton cu Catholic Biaknak sungih a thawn vekin Episcopal pawlkom sungtel pawl a si mi a sungkhat pawl ih an tansannak man a tul. Hi tiin Khrih zum in a duhdawtnak dodalnak cu satan ih hnatuan a si.
