Nauhak te pakhat cu tlawng a kai nak lai tlawngih a hmaisabik nak nu le pa le saya pawl tongkhawm awk ih tel dingah a nu cu an rak sawm. Ka ra tel tengteng ding tin a nu in a sim tikah a fapa cu a thin a phang.

          Cui puai ah a rualpi pawl le Saya pawl in a nu kha an hmu ih a nu ih a hmuihmel le a um dan ruangah a mah a ning a zak thei. A nu cu a mawi mi nunau a si nan keh lam a biang ah hmasi tumpi pakhat a rak um.

          Nauhak pa te cun a nui hmasi cu ziangruangah a rak ngah ti mi a sut paih lo vekin tong khal a tong paih lo. A nu cu hmasi a nei nan tongkhawm awk nak ah cun mitin in a mah ih a mawi nak le a mi zangfah lainat nak ruangah an rak upat ih an rak sunlawih zet. Asinan nauhak pate cu a ning a zak ih mi thawn a hlat nak ah a rak relh.

          A nu le a saya cu an biakawk rero kha a theih thei nak hmun a thleng ngah hnu ah an ttong mi hmuahhmuah cu a rak thei.

          “Na hmai ah ziangtin hmasi a rak um” ti a saya in a rak sut. A nu ih a sim sal. “Ka fapa a nauhak te laiah a kang mi khaan sungah a rak um. Meisa cu mih a theih nawn lo ding a si ruangah cui khaan sungah zohman an rak lut ngam lo. Ka fapa ih ihnak nausep nak lam ih ka tlan laiah meisa alh pakhat a tlak kha ka hmuh tikah ka fapa hum dingah keimah le keimah kha a par in ka rak kham sak. Meisa in in kang ngah tikah zianghman thei nawn lo in ka rak um. Ka vanthat nak ah meisa that tu pawl an ra thlengih kan pahnih in in rak bawm thei.

          A nu cun meikang ruangih hmasi a um mi a bia kha a tham. “Hi hmasi cu a um ringring ding. Asinan tui ni tiang kan rak tuah ngah mi thu ruangah ziangtik hman ah ka rak sir aw dah lo.” Hi ttongkam a thei ngah tikah nauhak pa cu a relh nak hmun ihsin a suak ih a nui hnen ah mitthli thawn a rak pan. A nu a mai ruang ih a rak tuar mi kha ruat phah in a thin a nuam lo ih a nu kha a pom. Cui ni sunvu te in a nih cu a nu ih kut kha hnget zet in a kai ih a rak uang awk zet.