Voikhat laiah zinghnam pakhat cu a nuam awk tuk. A nuam nak bik san cu a tlaitluang.

          Nitin in hi zianghnam hnen ihsin a tong theih theu mi tong kamkhat te a um. “Kei cu Ni…..ka nei” tin  a ti theu.

          A hmuh mi a dang ramsa pawl khal hi zianghnam in Ni cu ziangtluk in a manhlat thu, Thingkung pawl hrangah ziangtluk in a thupi, A mah ruangah hlum nak, tleu nak pawl kan ngah thu le a mah a um lole a cang thei lo thu pawl a sim ringring ruangah an mit kem.  Hi van par ih a um mi Ni kha ka neih mi asi tin a ttong ih Nii a porh rero tu zianghnam kha mi aa tin an hmu thlang. Curuangah a zoh thei lo tu pawl in an ttong ve.

          Ni ih man a neih hi a danglam lo. A sinan nangmai neih mi a si lo. Nangmai neih mi a si lo mi kha nangmai neih mi na ti cu nang cu mi aa na si tin sual an puh thlang.

          Hi vekih an ttong khal le zinghnam cun  ziangkhal ah a siar hlei lo a nuam awk tuk thotho. Zo pawl in ziang vek an tong khal le Ni cu a mai neih mi a si ti lawnglawng. Zo in a nei ih zo in a neilo ti kha a ruat nawn lo. Nii kha zo in man a re ih zo in man a re lo ti kha a hnatuan a silo tin fiang ten a sim. Nitin a tuah theu mi cu ziangtin in nitlang ai ih Nisuah zoh ding, sun ah hrampi lakah lek ding, zaanlam ah Ni  ih a liam kha hni siamsi ten zoh kha a tuah theu mi asi.

          Mi aa tin an ti khal le tuah ding a neih mi te cu a tuah thotho ih nuam tak in a um kha an zaten an sim khal le ziang khal ah siar lo in tuah ding a neih mi kha nuam zet in a tuah.

          An kalh aw. Zinghnam ih um nak hramlak ih Kiosa pi cu a thinbang tuk. A dang ramlak pi kha ngah dingin a dang Kiosa thawn an do aw tikah a sung ih tuar thei lo in a um ih mah le mah that aw ding in a ruat.

          Kiosa pi cu that aw dingin lamzin a phunphun a ruat nan a remcang lo ih a thinhar sinsin,  a thin bang tuk thlang.

          Hi do awk nakah a sun ruangah midang pawl kha mithmai a piah ngam nawn lo tiang a ningzak ruangah tidai sungih dawp dingin le a mah vek Kiosa bawi  pawl in an ei ding le a phang. Horkuam sungih dawp ding in le a ruak kha theekderh aw thluh ding kha a phang.

          Khi vekih thi ding le a cang lo hi vek ih thi ding le a cang lo ih thinhar zet in a thih ding dan a ruat rero phah in a feh phah vivo ih nuam aw zet tu zianghnam kha a hmu.

          Zinghnam cu nitlak ding hngak phah in Ni kha sunlawih nakah tin hla pakhat a phuah ih a sak phah in Kiosa  a hnen a ra thleng.

          Kiosa khal in a mah cu thizik in a thinbang ih zianghnam cu a nuam awk tin, tha a ti lo. Curuangah thinheng zetin zinghnam te kha a hngawng in a dir ih a theih duh mi kha asut.  “Ziangah hi tluk in na nuam awk keimah hi ziangsiar lo in na um maw sim hnik” a ti.

          “Man a nei zetmi thuhla ka ruat rero ih ka nuam awk men asi. I that hlah aw” tin a ti.  “Na man hlat mi te cu ziang asi, tu rori i phorh sak, si lole ka lo keu ding” tin a ti ih zianghnam te in “Ka hnen ah ziang man nei hman a um lo keimah te lawng nuam ten ka um men” tin tih zet in a sawn sal.

          Kiosa khal in a duhsan sim lo tu zianghnam kha a zoh ih a thinheng sinsin.  “Na nuam rero hi thuhla pakhat khat cu a um, tu rori i sim” tin a thing.  “Kiosa ih tong mi nuam nak ti mi thu cu ka thei lo. Kei cu nitin in Ni kha ka zoh ih ka nuam rero mi hi ka neih mi a si. Kiosa ziang na tul ti ka thei lo nan kei ka neih mi cu hi Ni lawng asi” tin ati. Zinghnam te ih ttong mi a theitu Kiosa  kha malte a khuaruah har.

          “Ni ti mi cu mitin ih neih mi asi, nang mai neih mi asi lo” a ti. “A si Ni cu mitin ih neih mi asi. A si nan Nii a um kha mitin in an theih pi lo Ni ih that nak kha  zohman in ziang an rel lo.  Nikhat Ni a um lo pang le Kiosa teh na ruat dah maw. A sawn mi a theih in Kiosa khal a mangbang. Ni a um nawn lo sile a ruat dah lo vekin Ni a um khal hi voikhat hman ka thei lo. Ni ih that nak pawl ruat ding cu a hla tuk. Nikhat hnu nikhat khui tawk hmunram tiang ka la ngah pei mitin ih upat tih dingin ziangtin ka tuah ding timi lawng ka ruat ringring ih ka thinhar tuk.

          Curuangah Kiosa khal Zinghnam ih nuam nak hrambik a thei thlang. Hi vek in lamhmuh tu Zianghnam te kha lei par ah dim ten a ret phah ah lungawi thu asim. Nuam le nuam lo nak ti mi cu tidan thawn a pehpar aw lo.  Um thiam ding le thinlung thaten um thiam ding lawng atul.

          Kan ngah thei lo mi kha ruat in nuam awk thei lole hi hnakih a tha deuh mi ngah dingin karlak ah thin a har tuk. Thil hrekkhat pawl cu ngah thei nak caan a um nawn lo sile ngah cio zo mi fate pawl kha manhla zet in ruat aw.