Veikhat laiah Lekuang tuantu Pa pakhat hnenah Naa pakhat a um. Cui Naa pi cu a fa tet laiihsin Lekuang tuantu Pa ih hnatuan pawl kha a tha neih tawkin a tuan sak ko nan a tar vivo tikah a hnatuan kha thazang thawn a tuan thei nawn lo.

          Curuangah Lekuang neitu pa in Naa kha Naa that tu pawl hnenih zuar dingin thu a botcat. Cui thuhla cu a theih tikah zangfak za a si hi Naa cu beidong zetin hramlak ah a feh. Hramlak a thlen tikah a fim zet mi Sabek pakhat thawn an tongaw.

          Sabek in Naa ih beidong zetih a umdan kha a hmuh tikah “ka rual Naa ziangah beidong zetin na tin mi lamzin na feh rero” tin a sut.

          Naa in a fim mi Sabek ih ttong a theih tikah “Aw… Sabek fim ka bawipa ih sumdawn nak kha kumrei pi thazang suah in ka tuah sak. Tuih ka tar hnuah ka bawipa in sa that pawl hnen ih zuar dingin a ruat. Curuangah keicu a rei hlan ah ka thih thlang ding ruangah thinbang zet in hramlak ih ka suah nak a si” tin a sim.

          Cutikah a fim mi Sabek in “Ka rual Naa… hithu ruangah na thin bang hlah. Nangmah hnen ah thazaang tampi na nei ti kha na bawipa ih theih dingin ka lo bawm ding. Ka ttongvek in reilo tesung thi vekin rak um aw ter aw” tin a ruat dan kha a sim. Naa khal in a fim mi Sabek ih ruat dan a theih tikah cun a lung a kim zetih leilung par ah cun a it ih a thi aw ter.

          Cutikah a fim zet mi Sabek cun hramlak ih ramsa fate pawl nehsawh, deh that rero tu Pawpi sual hnenah a feh ih “Pawpi ee… hramlak ih a laifannakah Naa thi cia pakhat ka hmu. Naa sa cu Pawpi hrangah a harsa ih a tha zet mi sa a si kha ka theih ruangah thu hla ka ra lo sim nak a si. Cui Naa um nak hmun kha ka lo hruai ding i thlun aw” tin a sim ih an feh.

          Rawl duh zetmi Pawpi cu a fim zetmi Sabek ih tongmi cu a zum ih lungawi zetin a thlun. Cuitin a thi aw ter tu Naa hnen an thleng tikah cun a fim zet mi sabek in “Pawpi… Hi hmunah Naa sa ei ding cu a rem lo. Kiosa pawl an ra thlen a si le harsat nak na tong pang ding. Curuangah na um nak hmun ah la in hahdam zetin ei le a tha ding” tin ruah nak a pek.

          Cutikah Pawpi cun Sabek ih ruah nak kha a tha zet. Cui hrang khal ah harsat nak a um lo. Asinan a thi cia mi naa cu ka um nak hmun ah ziangtin ka thiar ding tin a sut sal.

          Sabek in Pawpi cu himi hrangah phanghlah. Ruah nak ka lo pek ding na mei le Naa ih mei kha tem tlangin na um nak hmun ah ol ten na dir thei thlang ding tin a sim.

          Curuangah Pawpi cu a fim zet mi Sabek ih ruah nak a pek mi vekin an mei le mei kha tem tlang theih dingin leipar ah cun a it ter veve. Sabek in Naa le Pawpi ih mei kha a ten sak theh veten a thi aw ter tu Naa ih taw kha na zet in a beng. Curuangah Naa tar pi cu rinlopi a tho ih Pawpi kha a dir ih inn lam ah a tlan.

          Rawlduhtu Pawpi cu rinlopi thil cang mi ruangah zianghman ti thei nawn lo ih a hnuk ciamco. Cutin caan tawk fang a rei hnuah Naa cu inn a thleng. Cuicaan ah Lekuang tuan tu pa cu Pawpi thi ko a hnuk tu Naa tar pi kha a zohih a mang a bang zet. Pawpi khal in rinlopi dirh a tuar nak hriamhma pawl ruangah a thi zik te.

          Curuangah Lekuang tuantu pa cu a fei thawn Pawpi kha veitampi a sun ih a thi. Cui caan ihsin thok in Lekuang tuan tu pa cu Naa kha sa that tu pawl hnen zuar nawn lo in tha zetin a cawm ta.