Kan dung ni malte sungah hriamkaibu pawlkom cu Syaria ram hmuntin ah rin lo pin an luhhnawh ih an lak thei ruangah leitlunpi ah launak a um.

Zarhpi ni ah hriamkaibu pawl in Damascus an lak thei ih Assad sungkua ih kum 53 rei uknak an cem ter thu an than.

Assad a cozah in Biaknak lam mi malsawn kha tuletu humhim vekin a tiaw ter theu ih hriamkaibu pawl ih nehnak thu thawn pehpar in a tumbik mi thusuhnak cu Syria ih mimal sawn a si mi Druze, Ismailis, Christian pawl, Kurd pawl le a dang pawl hrangah duhsan tampi a nei.

Christian pawl in acozah tlaksiatnak kha ziangruangah an tuah ti a sile Alepo’s Latin Puithiam hna a rak tuan dahtu Franciscan Puithiam Fr Bajhat Karakach in Vatican thuthang ih a simnak ah Christian pawl cu Syria pawl uknak tangih an umnak ah an bangtuk zo thu a rak sim. Thansonak zianghman a um lo, sumdawnnak lamah zianghman thansonak um lo mi acozah a si thu an sim. Hi mi cu kan nung silo in thaw kan thaw tinak tiah thupit in a rak sim.

Vatican ih simthang theinak a neitu Alepo ih Christian Puithiam Hanna Jallouf khal in thisen luannak um lo in thuneihnak in ap sak tu Pathian hnen an lungawi thu a sim.

Fr Lufti in Assad cu minung tampi thihnak le a thlaksiat mi sumdawnnak pawl ih dungah a tang ih a tu caan cu Syria ram a thar ih hrinsalnak kha sunloihnak caan a si tiah a rak sim. Hi mi thuthang cu a tawizawngih kan ngan mi a si.