Mithianghlim Eulalia cu AD 290 hrawngah Spain ramih mi hminthang sungkua in a rak suak.

          A nih cu a nauhak lai ihsin a nunnem zetmi thinlung nei tu a si ih Pathian hrangah a thianhlim nak kilhim in a rak duh zet.

          A sinan AD 304 kum ah Rome san lai ih Diocletian in thu a suah ih mipi pawl kha zuklem, pawl a biak ter.

          Cui caanah nauhak te lawng a si lai tu Eulalia cu zuklem biak ding a el.

          A nu in Eulalia in a el ti a thei ih ramsung ah a hruai. Cui caan ihsin Eulalia cu zaan ah luat dingin lamzin kha zamrang ten a hawl ih khua a vanhlanah Merida ah a thleng.

          A sinan Cui zing thotho ah thuthenak zungah kawh a tuar ih Deseyang timi a sual zet tu thuthen tu hmai ah thusuh a tuar. Khuavang pathian kha an biak ter nan Eulalia in duh lo in a rak el.

          Thuthentu in a lem nan a ngah cuang lo a hrinhro khal le a ngah cuang lo bet ah Eulalia cun Khuavang pahtian an pek mi hmuak pawl a paal ih Thuthen tu kha cil a rak phui bet.

          Curuangah thuthen tu cu a thinheng tuk ih amah kiltu pawl kha Eulalia a kaih ter ih a kalhaw mi thingpar ah a tem.

          Cu theh le a ttang kha meivaam thawn an dawt, a ruangpum cu fung thawn an vuak an hrem, cui hnuah a saam kha meisa thawn an ur hnuah a ruangpum zaten a kaang ih a nunnak cem. (Mithianghlim Eulalia cu AD 304 Spain ram ah a nun nak a cem asi.)

          A alh rero lai mi meisa thawn a tang in an ur tik khal ah a naa zet nan au nak aww hnak in kum12 te asi mi nauhak nu te cu thluasuah siar ding lo cun a kaa ihsin ziang aw hman a suak lo.

          Thuanthu vek a sile meisa an ur laiah a kaa ihsin thuro a suak ih par lam ih a zaam lai ah a that tu pawl cu an tih tuk ih a ruak kha an taan ih an tlan tin thuanthu ah langter mi a um. Mithianghlim thuthangthu a rak ngai ih a siar theu tu zate parah lungawinak tampi kan nei.