Ramsa pawl an tong thei lai can ah sia pakhat cu Tuukhal tu pakhat ih hmuansung ah a um. Sia cun tuukhal tu ih hnatuan kha a bawm. Tuukhal tu khal in sia kha thaten a ret.

          Nikhat ahcun Tuukhal tu cun Sia kha rawl um nak hmun ah a khal. Cui caan ah cinghnia pakhat cu a rilrawng tuk ruangah “khi Sia cu ka sunrawl tha asi a kiang ih munung hi ka dawi ding” tin a ruat ih tuukhal tu le Sia hnen ah a feh.

          “Thu ka lo sut hai ding nan phi thei lo asi le Sia kha ka ei ding ah i pek ding” tin a ti. Tuukhal tu le Sia cun Cinghnia ih ttong mi cu an lungkim.

          “Sia nang cu a hriam zet mi kii na nei ih ziangah hi pai hna na tuan sak ciamco” tin a sut. Sia in “ A lo kha ka tuan sak ruangah keimah kha thaten i cawm si” tin a sawn.

          “Aw a si Tuukhal tu teh  sia kha ziangah na cawm rero na kut sung ih thirfung maw” tin asut. Tuukhal tu in Cinghnia ih suh nak sungih sia a cawm nak thu kha sawn lo in a kut ih a keng mi thil kha dawi thirfung a si lo thu fim nak a si thu kha a sawn. Tuukhal tu ih a sawn mi fimnak ti kha Cignhnia in a theithiam lo.

          “Fim nak timi cu ziang asi ka lo sut mi na sawn hrih lo” tin a ti. “Hi fim nak le sia kha Inn ah hruai duh le hruai theih”. Tuukhal tu ih sim mi fim nak kha Cinghnia in a thei paih sinsin thlang. Curuangah “ Fim nak timi thil kha ka thei paih tuk thlang” tin Cinghnia in a ti.  Tuukhal tu in “kei cu fim nak ka si lo, na thei duh a si le caan tawk fang in fim nak ti mi kha ka lo piah thei” tin ati.

          “ Ziang vek dinhmun a si”. “ Fim nak ka ra phurh tiang hi thingkung ah ka lo tem ding, Sia harsat ton lo nak ding hrangah”  Cinghnia khal fim nak ti mi a thei paih tuk ruangah tuukhal ih ttong mi cu a lungkim. Tuukhal tu cun Cinghnia kha thingkung ah a tem ih fim nak phur ding in a suak thlang.  Sia cu Cinghnia a zoh ih a hni. Sia ziangruangah a hni ti cinghnia in a thei lo. Cinghnia cu tuukhal tu a rat ding kha nazi reipi a hngak.  Cui caan ah tuukhal tu cu thingkuang pakhat kha a phur ih a ra tlung.  Tuukhal tu cun thingkuang cu a ong. Cinghnia cun thingkung pi lawng kha a hmu ruangah “ hi cu fim nak maw khui tawk ah ken teh na ra keng ngai maw” tin asut.

          “ Fim nak maw fim nak cu a sung ah khi a kap ah na hmu thei lo le na hri ka lo phoih sak ding,  lut in zoh aw” tin Tuukhal tu in a ti. Cinghnia cu fim nak kha a hmu duh ruangah thinkuang sungah lut in a zoh.  Cui caan ah Tuukahl tu in Thingkuang sin kha a khar.  “ Ziangsi i ong aw, i ong aw ka lo ti” tin Cinghnia cu a au rero.

          “ Fim nak ti mi cu thinlung sung lawng ah a um, nang cu thil man khung hawl vek in na hawl si”. Cinghnia cu thil um dan a fiang thlang ih “ midang kha  olsam tak in ka ruat nawn lo dingin ka lo kam, thinlung tha nei in fim nak nei ding in ka zuam ding” tin thu a kam.   A sinan Tuukhal tu in Cinghnia ih cinken ding in thingkuang sungah nikhat hrawng a khum. A thaizing a kim ih Tuukhal tu le sia pawl cu zirnak thaten a ngah tu Cinghnia cu thinkuang sung ihsin an suah thlang.

          Cinghnia khal tuukhal tu le Sia kha lungawi thu a sim ih a tlan thlang. Cuisin thok in Cinghnia khal a dang ramsa pawl thawn thaten an um tlang ih zohman a ngainep ngam nawn lo. Thuanthu cu hi zat lawng asi.

          Thuanthu ih in pek mi zirnak cu mah kha midang pawl hnak in fim nak ka  nei tin ruat aw ih tahrat in midang kha ngainep tikah midang in mah hnak in fim nak an rak nei ti mi a si.