Zinghnam pakhat cu fang a khat ih um mi bel pakhat sungah rin lo pi in a tla. A tlak ve ten zinghnam khal a lung a awi zet.

         Fang fang pawl kha a ei ih a pum zut phah in a di a riam zet. Leitlun ah a mah ai ih famkim an um nawn lo ding tin khal a ruat. A ei, a it in a khuasa.

         Cutin fang pawl thaw zet in a ei bel taw deng a thlen zik thlang tikah fang a cem zik thlang zinghnam te khal a mang a bang.

         Hi mi bel thuk pi sungin zingtin a suak sal thei ding ti kha a ruat ih nasa tak in a sir aw.

         Nungram ah thang phunkhat a um. Hahdam nak an ti.

         Mah harsat tuar ih zuam a theih lai caan ah hahdam nak kha hril ngah pang lo ding a tul.

         Harsat nak a um lo ti mi cu a tum bik mi harsat nak a si.

         Mah in zuam duh nak thinlung a um lo a si le mah ih tum tah nak le zum nak pawl a siatsuah ih a dolh tu ding tihnung za le harsat nak pawl cun in kulh ringring ti kha thei aw.

         Mah ih nungram kha tu vek ih feh ding a ol tla si mei thei. Hlawhtlin ding cu a har tuk a si. Curuangah hahdam nak kha duh in hahdam nak hmun ah reipi ding hlah. Harsat nak ti mi cu a thlengaw mi hlawhtlin nak a si.