Mithianghlim Callistus cu Rome khuapi ih sal pakhat a si. A Bawipai paisa hloh nak ruangah a thin a phang ih Rome khuapi ah a rak tlan. Vansiatnak ah Asteria khuapi ih tangphawlong cawlh nak ah kaih a rak tuar ih Sardinia tat tuh khur sungah an kuat ih cawh kuan a rak tuar.

          Cui hnu ah ram uk tu Siangpahrang Commodus ih a kom bik mi a rualpi tha bik Marcia ih zaangfah dil sak nak thawngin tat tuh khur sungin a luat ti hnak in paisa hloh nak ruangah tattuh khur sungin a rak luat.

          Kum 199 ah Deacon si nak cu Pope Zephyrinus ih kuthnuai in a rak ngah ih Appian lamzin par ih um Christian thlaan hoha tu ah tuanvo an pek. Mithianghlim Callistus ih leihnuai thlaan tiih tu ni ih kawh mi cui hmun cu Pope pawl ih ruak vui nak leiram a rak si ih cu mi cu Pawlpi ih a hmaisabik leiram khal a si.

          Aposkit khuapi uk tu Siangpahrang Julian in a ruah nak sual mi zuk biaktu Puithiam pawl tiih a ruah mi pawl hnenih a kuat mi ca cu “Christian pawl cu midang parih duhdawtnak an neih nak le an mah pawl ih a thi zo mi ruakvuinak cu an upat ruangah an hmin a thang,” tiah a rak ngan.

          Kum 217 ah Pope ah hril nak a rak ngah ih Callistus in khuavang tha lo pawl khal a rak do neh. A mah cu mi pakhat ih nupi le fa sualpuhnak le mi thah nak tel in a dang sual  nak zaten a ngaidam tu tidan a rak din thok.

          Kum 222 ah Mithianghlim Callistus cu Pathian hrangih martyr ah upat tlak zet in thah a rak tuar. A ruak cu Arium lamzin par ah an rak phum a si.

          Mithianghlim Pope Callistus cu zumnak tha lo le khuavang lam ih ruahnak tha lo pawl a rak do neh tu a si vek in kan nih khal kan nitin nun ah thil tha lo a neh tu kan si ve thei nak dingah in run bawm hram aw tin zaangfah bom nak dil tlang uh si.