Herkkhat Nu le pa cu nauhngak lai ihsin pakhat le pakhat duhdawt aw dingin an zirh.  Hrekkhat Nu le pa cun an thei lo maw olten an biak men maw cu thei lo. A upa sawn cu a fel ih a nau ta sawn cu a fel lo. A upa sawn cu caa thaim ih a nau sawn cu a U tluk in thluak tha lo. A nau sawn cu umdaan thiam.  A u sawn cu mi um dan zoh thiam lo tivek pawl an sim theu.  

    Zangfah ten  a  u sawn cu a fim a nau sawn cu a sual cuti vek pawl a U hnak in a nau sawn kha a mawi sawn a nausawn kha duh men ding ti vek pawl, Nauhak pawl thinlung dang ter ding mi tong ziangtik hman ah tong hlah.

    Nauhak laiah lek tlangih upa hnu ih ral ih cang ti vek tla a um thei.  Nauhak lai ih a tha lo mi lek nak kha an upat tikah tih a nung zet ti kha nu le pa in an thei lo ruang ah asi. Unau veve an ral awk cu nu le pa ruangah asi.  Mah khal hi fale par ah dingfel a si ti kha langsar zet in pawlkom aw. Na tesin fa pawl rualrem ter lo mi a tum bik ih atha lo mi cin le daan cu lungrual lo nak dingih ziaza sia bik kha khat le khat  zuam awk rero kha a si. Nau hak lai ah rem sak an tul a si.

   Unau an tum hnu lawngah ka fapa ka fanu pawl an duhdawt aw lo maw si tin na ti hlan ah pakhat le pakhat duhdawt aw dingin na rak zirh dah maw.  Nauhak pakhat le pakhat kha tu le tu tahthim in nun na sim maw? Ruat aw.  Thei lo ih tongngah pang sile nauhak pawl hrangah rem sak aw. Unau duhdawt aw ding ih zirh ding cu nu le pa ih tuanvo asi.

    Innsang pakhat ah U le nau ziangtluk an duhdawt aw ti kha   Nu le Pa ih tongdan umtlan dan pawl ah tampi a thum aw.  Unau an duhdawt awk lo hi Nu le pa in an nauhak lai ah thaten an zirh lo ruangah asi.  Pakhat le pakhat duhdawt aw dingin zirh aw. Zo sual deuh, hman deuh a U in a nau kha nehsawh a nau in a U kha a el sal ti vek pom sak hlah, lungkim pi men hlah.

   Nu le pa in cu vek pawl a um sile voikhat voihnih men si pam tin ruat men hlah, a thok nak a um ahcun  tong thok nak a um zo ruangah nehhnu khal tihzah nak a um nawn lo ding.

   U le nau kha  Nang ti mi hmin in ko aw ter hlah.  Ka U ka nau tin kawh awk ter an tul a si. Hi pawl hi an upat hnu ah zirh a ngah nawn lo. Nauhak veve duhdawt aw dingin tuah a ol nan Upa veve duhdawt ding ih tuah cu a har thlang a si. Casiartu zate parah lungawinak tampi kan nei.