(Theresa of Child Jesuh) (October-1)
Naute Jesuh ih Theresa
(Theresa of Child Jesuh) (October-1)
Pathian hnatuan tu pawl bawmtu mithianghlim Theresa cu kum (1873) ah France ram ih Alancon khuapi ah a rak suak. Kum (1886), Christmas hmuah nak an tuah niah Naute Jesuh ih a thuk zet mi lang nak a rak ngah. A kum hleinga kum ah Pope ih lungkim nak in Lisieux ih um Carmelite Sr. tlawng ah a rak lut. A mai moto ih a hril mi cu “Duhdawt nak lawng in thil kan tuah thei sal” ti mi a si. Sr. tlawng ih a um kulh sung ah ziang vek thil danglam mi hman a rak tuah dah lo. Nitin a tuah tul mi a tuanvo lawng kha danglam zet in le tha zet in a tuan theu. A mah cu cathianghlim siar nak in hnem nak a hawl theu ih harsat nak ziangvek a si khal le zum nak thawn a rak cohlang.
Sr. a cang duh tu pawl hoha tu upa ih an hril hnu khal ah Sr. cangtu ding pawl kha thinniam nak le thianhlim nak nei dingah tongkam in siseh, a tuah nak in le cawn tlak nun in a rak zirh. A mai ngan mi “Thlarau ih thuanthu” ti mi thlarau thawn pehpar mi thuanthu ih a hmuh mi cu “Kei cu thilri fate lawng ih Pathian hnenih ap nak ziang hman a si lo mi thlarau fate men ka si” tiah a ti.
Pathian thu phuan duh nak thinlung taktak a neih ruangah a nun nak cu thlarau pawl rundam nak hrangah le Pathian uk nak ram a kau ih a karh thei nak dingah a rak ap. A rak tong mi cu “Kei cu mithianghlim Agnes ih in hmuh mi vek in ka ngah duh tuk” ti hi a si. Cui thil cu ruah nak thawn a cang thei lo le duhdawt nak in a ngah ding” tiah a ti. Kum (1897) a kum (24) ah a nun nak a rak cem. Pathian thuthangtha karh nak ding hrang Pathian hnatuan nak ah thlacam nak le tuah tuan nak pawl cu pakhat le pakhat an pehtlaih awk thu a hmuh duh ah (1927) kum ah Pope Francis Xavier vek in ram hla zet ih Pathian hnatuan tu pawl kilkawi tu mithianghlim ah mithianghlim Theresa cu an run nem hnget.
Theresa ih a tong mi pakhat cu “Kei ka theih mi cu Pawlpi ti mi ruangpumpi cu taksa then tampi thawn kom ih din mi a si. Cu mi sungin duhdawt nak meisa a alh rero mi thinlung pakhat tla a tel a si. Ka rak theih mi cui duhdawt nak cu Pawlpi sungih um pawl an mai tuah tuan nak ah lamzin a rak hmuh. Curuangah cui duhdawt nak mei alh cu mit tahrat in a hlo khal sehla, dungthluntu pawl khal Pathian thuthangtha an sim nawn lo ding. Cu vek thotho in Pathian thu ruangih thah nak a tuar tu pawl ih thi pawl tla rel a tul nawn lo ding” tiah a ti.
