(1182-1229) October-4
Siangbawi tlawng rak din tu Mithianghlim Francis cu kum (1182), Italy ram ih um Assisi khua ah a rak suak. Kum 1201 ah Fancis cu raldonak ah a rak tel ih khatlam ral pawl in an kaih ih thawng ah an thlak. Kumkhat a rei hnu ah thawnginn in a suak ih inn ah a tlung sal. Ralbawi si duh ah raldonak ih feh a tum sal. Asinan, lamzin a feh lai ah ‘na nun ih na zir ding le na tuah tuannak ding hmun a si mi Assisi ih um na inn ah tlungsal aw’ tiin Pathian ih sim mi aw thawm a thei. Inn a thlen hnu ah Francis in a man nei zet le mankhung zet mi paisa hman ih lei thieh lo mi a caan sunglawi zet cu man lo men ih a rak hman kha a vung thei aw sal.
Cui hnu in a nunnak cu Pathian hrangih hmang dingah a ap. Cui hlei ah a hnipuan pawl le paisa pawl khal mifarah pawl a pek theh. Curuangah a pa cu a thinheng tuk ih a neih mi a thilri hmuahhmuah a dil thluh sal. Francis khal in Bishop tlawng hmai ah a hnipuan a hlit ih ‘hi hnipuan pawl hi ka pai ta hlir an si, a hlan ahcun ka pa cu leitlun ih ka pa tiah ka ko, asinan, tu ahcun Vancung ih um mi ka pa lawng ka ko ding’ tiah a rak ti.
Francis cu midang pawl hnenih dil cawp mi hnipuan tha lem lo a hruk ih a tai ah hridai tawn a tawn. Cui hlei ah kedam hruk lo in thlacamnak le sualthlahnak in a nun a rak thok sal. Kumhra a rei hnuah mipa (5,000) in Francis ih hnipuan an rak hruk ve. Ziangah tile Francis ih angki cu sui ih tuah mi angki hnak in a sunglawi sawn ruangah a si. A tlu thlang ding mi Pawlpi bawm rero tu Francis cu a mang ih a hmuh mi Pope Innocent III cu kum (1210) ah Friar Minor tlawng rak din tu a si.
Francis in Deacon a ngah hnu ah siar cawk lo mangbangza a rak tuah. A mah cu Pathian thu thawn pehpar mi farahnak le duhdawtnak ti mi tahthimnak thawn Pawlpi a rak din sal. Tisa lam ih sualsawmnak a phunphun do dingah tlawngpit caan ah hnipuan tel lo in hling lak ah a to.
A fehnak saklam Africa ih um Muslim pawl lakah a zumnak a rak hmuh. Christmas caan, Bawi Jesuh a suahnak caw rawlkuang tuah mi duhnung zet mi ziaza cu Grechio khua ah Francis in a rak tuah thok. Francis cu “Lady Poverty” ih ralbawi a sinan, ei ding rawl khal mi hnenin a dil. Francis cu a fehnak tinkim ah midang pawl thawn an el awk ih Francis in an sual sir in Pathian hnenih kir sal dingah a fial.
Cui rei lo te ah minung tampi in, Francis in Pathian ziang tluk in a duh ih Pathian thawn ziangltuk in an naih awk, ti an theih ruangah a dung an thlun. An mah cu khui tawk hmun si khalsehla mifarah pawl le mi naa pawl hnenah Pathian thu an sim. Mithianghlim Francis cu Bible ih zirh daan vekin le Pathian nun daan vekih nung ve dingah a rak zuam.
Sersiam mi hmuahhmuah tlun ih a duhdawtnak ruangah Pathian in Francis ih a kut, a kee le a hnak ih a hriamhma pawl a pek. Cu mi cu kum 1224, Francis a thih hlan kum hnih a duh ih thilcang mi a si. Francis cu a kum 44 ah Porziuncola khuapi ah a nunnak a rak cem. July 16, 1228 ah Pope Gregory IV in Francis cu Mithianghlim ah a run nemhnget.
Mithianghlim Francis cu leitlun thilri pawl in thinlung diriam nak le nuamnak in pek lo timi hminsinnak thawn a nunnak a rak hmang. A dik mi nom nak cu Pathian kan duhdawtnak in le a mah Bawi Jesuh hnen in kan hlan awk nak in a ra asi tiah Francis in in sim a si. Bible thawn in ziangtin kan nung ding tile ziang vek lungnomnak thawn kan nung ding ti khal Mithianghlim Francis in lam in hmuh ih in zirh a si.
