Kawlram ArchBishop in thlarau thazaang ngahnak hrangah Bible cathianghlim siar dingah forhfial
ArchBishop Basilio Athai in Kawhhranpi pawl hnen thlarau thazaang ngahnak hrangih Bible cathianghlim siar dingah Sep-28, Jesuh thianghlim thinlung Hmaw-Bi Parish khuaih an rak tuah mi Bible Cathianghlim ni caanserh ah a rak forhfial.
“Na thlarau thazaang ngah nak hrangah Bible cathianghlim kha siar aw” tin Bible Apostolate Commission ih hotu Bishop a si mi Arch Bishop Basilio in tha a rak pek.
Arch Bishop in khawm a ra zawh tu zate in Bible Cathianghlim kha hna ih ngai ding, mit ih siar ding, ruahnak pawlih siar dingle thinlungih siar dingin a rak sawm.
Taunggyi ih Arch Bishop in “Bible Cathianghlim cu zumnak a hngetkhoh ter. Bible Cathianghlim cu thin thanau nak kha a hlo ter” tin hleice in a rak sim.
Yangon Archdioces ih Assistant Bishop Francis Tan Htun in khal Pathian Bawipa cu Pathian ih ttongkam in kan mah pawl kha in biak” tin a rak sim.
Bible Apostolate Commission ih sungtel a si mi Mawlamyine ih Bishop Maurice Nyunt Wai in khal Bible sungih nunnak thingkung thu kha a rak sim.
Seemtirnak sungah nunnak thingkung le a tha le a sia thleidan theinak thingkung tin thingkung pahnih a um. Minung cu mah duh mi thingkung kha zalen zetin hril a theih. Minung pawl in nungnak thingkung thu cu kan rel tuk lo.” tin Bishop Maurice in a rak sim.
Bible Apostolate Commission in National Director Fr George Shwe Htun le a sungtel pawl in hi caanserh kha hoha in an rak tuah. Nihnih sung an rak tuah mi hi caanserh cu Yangon Catholic Archdiocese ih a vei (14) nak Bible Cathianghlim ni caanserh asi ih Bible Cathianghlim thu ah mifim/ mithiam a si mi mithianghlim Jerome ih puai khal sunlawih in an rak tuah.
Mithianghlim Jerome cu Bible Cathianghlim kha Greek tongin Latin tongih rak let tu a si.
Hi caanserh cu Bible Cathianghlim sunlawihnak caanserh in an rak thok. Puithiam pawl, Sister pawl, Pathian hnatuan tu pawl, Minor tlawngta pawl le kawhhram mipi pawl an rak tel. Bible Apostolate Commission ah kum (10) rei a rak tel zo tu sungtel pawl kha sunlawih nak capi an rak pek.
Sep 29 ni, zinglam nazi 11:30 ah Missa raithawinak in Bible Cathianghlim ni caanserh cu an rak cem ter.
By RVA Sgaw Karen, September 30, 2024.
