Kilkhawi tu vancung mi thu (Saam hla bu 91:11) (Suahlannak 23:20) (Hew 1:14)
A lo kilkhawi tu vancung mi kha tu le tu na hlam thiam maw. Kan mah pakhat cio ah a mal bik kilkhawi tu vancung mi pakhat ciar Pathian in a ret tin Catholic pawlpi in in zirh.
A lo kilkhawi tu kha ko ding hnilh hlah. Kikhawi tu vancung mi in na tong a lo ngai ih nangmah kha lam a lo hmuh ringring a si.
A lo kilkhawi tu in na thlarau rundam nak hrangah a thupi bik in tuanvo a lo lak saktu a si vekin na par ih Pathian ih duh nak, remruat mi le thlasuah pawl kha na hnenih a rak keng tu khal a si .
A lo kilkhawi tu vancung mi kha a hleice ih na mang ding mi nipawl cu nihnih ni, mai suah ni, thla ih a hmaisa bik ni pawl ah an si.
St. Padre Pio ih sim mi ah “Vancung ram thawn a pehpar aw mi kan thlarau hrangah kilkhawi tu vancung mi in tha ten in kil khawi in um pi ti mi theih nak cu ziangti tluk in thin hnangam za so a si. Kilkhawi tu vancung mi in satan do nakah hleice in huham a nei. A mi duhdawt nak cu ziangtik hmanih a cem lo vekin humhim ding khal ah ziangtik hman ah a pelh dah lo ding.
Nau sep nak sung ihsin thok in thih nak khursung tiang lam in hmuh in kilkhawi ringring ih rualpi, u le nau vekin riahsiat nak kan ton caan ah a lo hnem ringring tu a lo kilkhawi tu vancung mi kha mang in hlam ringring thiam mi a mawi mi ziaza kha nei aw.”
St. Therese of Lisieux ih sim mi ah “Bawipa Jesuh in na kiang nai ih a lo kilkhawi ringring tu dingah kilkhawi tu vancung mi kha in ret sak. Na ke in lungto kha sit ngah lo dingah kilkhawi tu vancung mi in a kut thawn thawnding ah a lo bawm.
Na hmu lo nan a nih in sual nak sung ih tla lo dingah na thlarau rundam nak a ngah thei nak dingah a lo zoh ringring tu a si.”
St. Faustina ih sim mi ah “Nikhat ih biak khawm nak tuah rero lai caan ah riatsiat nak pawl a tam ih tap lo in ka um thei lo. Cui caan ah ka kiang ah a mawi zet mi kilkhawi tu vancung mi cun “Tap hlah… Pathin in a lo ti” tin i sim.”
St. John Bosco ih sim mi ah “Nangmah ah rualpi vek, kiltu vek, rualpi vek in a lo um pi tu kilkhawi tu vancung mi a um ti kha hnilh hlah. Khuavang sualsawm nak na tong caan ah a lo kilkhawi tu vancung mi ko aw. Lo bawm ding ah man cia ih a um vekin khuavang pawl cu a lo kilkhawi tu vancung mi pawl hmaiah tih in an khur ih an tlan hlo ding.”
St. Gemma Galgani ih sim mi ah “Zaan lam hruang ah dam lo nak kha nidang ai in hleice ih ka tuar caan ah Bawipa Jesuh kha ka run ih “A ngaingai ih in dam ter lo ding ti ka theih cia a si le hi tluk tampi in thla ka cam lo ding” tin ka phunzia pang.
Cutheh in ka sim bet “Ziangruangah so kei hi hi vek harsat nak in tuar ter tin”
I kilkhawi tu vancung mi in in ngaih in i sim “Bawipa Jesuh in na ruangpi kha harsat nak ruangah a lo har ter a si le na thlarau kha a thiangfai ter a si tha ten in cohlang aw” in ti.
It khum ih ka thoh veten i kilkhawi tu vancungmi cu ka Bawipa a si. Sual nak pakhat khat ka tuah pang tin ten nun in sim ih in rem sak. Tul caan lawng ih tong ding ah khal in zirh.”
St. John Vianney ih sim mi ah “Kilkhawi tu vancung mi cu kan kiang te ah khukbil in Bawipa Jesuh thi le sa ih a um mi kumkhua Pathian kha a biak rero ti kha theih ngah a si le ziangti tluk ih thinniam nak thawn Missa raithawi nak kha ngai a tul, ziangtluk kan thinlung ngaingai in thlacam nak pawl kha Bawipa Jesuh hnen in sim sak dingin dil lo dingih kan um nak ding san.
Kilkhawi tu vancung mi hnen ih thlacam nak Pathian Bawipa ih fial nak in keimah i kil tu aw vancungmi keimah tlun ah sun le zaan cat lo in i kilkhawi i bawm aw. Amen.
