(Padre Pio The Stigmatist) September-23

Hriamhma panga a tuar tu Fr. Padre Pio

(Padre Pio The Stigmatist) September-23

            Kumzabi 20 ah Catholic Pawlpi ah hminthang zet tu pawl sungin mi hminthang bik mi pawl in sim aw ti a si le Mithianghlim Bosco le Padre Pio hmuh a theih. Tui tarlang ding mi cu Padre Pio the Stigmatist ih thuhla a si.

            Pio cu kumzabi 20 a thok lam ihsin a lai hrawng tiang mi lar zet mi a si ih tu tiang Kohhran mipi pawl in an sim rel mi le an rinsan zet mi a si. Cu a si ruangah Kohhran mipi pawl ih siar thei in rinsan thei dingah har zet in hawl ih tarlang mi a si.

A nauhak lai nunram

            Fr. Pio cu 1887, May 5 ah a Pa Orazio Forgione le Maria Quiseppa De Nunzio pawl hnenin Italy ram, Benevento khayaing, Pietralcina khuapi ah a rak suak. Suahpi unau 8 a nei ih pathum cu an nauhak te lai ah an rak thi.

            A mah cu May 5, zaanlam nazi panga ah a rak suak. Pietralcina khuapi ah mipum 5000 an um ih Capuchin Yatih panga an rak um ti a si. A nauhak lai ih a hmin cu Francisco a si. Pope Pius V nak ih kilkhawinak ah a rak um. Francisco in Pio hmin a rak lak.

            Nela lam Capuchin a luh tikah a khaan 5 a rak um. Hmaisabik khaan khat ah thli thiang tha ten a ngah thei lo ruangah a khaan 5 ih a thawnnak a si. Curuangah Pio cu number 5 dinhmun ah a cang lanta.

            A pa cu fate a neih tamtuk ruangah hmun hlapi ah hna a rak tuan. Veihnih tiang Germeca tikulh a rak thleng ih Long Island khal a rak thleng. A nu cu ca a thiam lo nan nu tling a rak si. Pio ih a nauhak lai nunram malte lawng theih a si. Kum upa pawl ih sim mi vek a si le nuncan ziaza tha lo pawl thawn an komawk lo thu theih a si.

Fimthiamnak zirnak

            Hmaisabik ah siangbawi ihsin a suak ih Dondominnogotik ani thawn ca an rak zir. Hmaisabik a saya a si. A remcang lo nak cu a saya in Pio cu nitin ten Biakinn ah a khawm thei ih Siangbawi pawl a bawm theu ruangah tikcu a heu tiin a saya in a sim ih lo lawngah hnatuan ter a tul tiin a nui hnenah a rak sim.

            Pio cu a thinheng tuk. Cu lai ah kum sarih lawng a si lai. Cu tiin Pio in saya thluak hman lo ih a mah khal a thluak a that lo thu a sim. Cu tiin Pio cu tlawng kai nawn lo in lo a feh theu.

            A Pa in New York in ca a rak kuat. Pio cu a nu in a hawl ih a dan saya an sang ih a hnenah Pio cu a ap. A pahnihnak a saya cu Macstro Caccavo Mistrokhakhabo a si. A kut sungah Pio cu fimthiam nak lam ah a thangso zet. Cu tiin a pahnihnak a saya ih hminsinnak ah ‘na Fapa cu ca ka zirh ti hnak in a mah sawn in I zirh ding’ tiah a sim.

            Cu tiin Pio cu rei lo te ah Capuchin Yatih pawl zirhnak tlawng ah a rak kai. Tlawng ah tlawngta pawl le a zirh tu Yatih pawl in an duh zet. Tlawng uk tu in Pio parah thu pakhat a ret. ‘Hi nauhak cu kan daan pawl a thei deuhdeuh ih a thlunl’ ti a si.

            Nikhat ah cun tlawngpit ni nihnih an ngah. A rualpi pawl in tlawngpit ni tam deuh in an dil ter. Pio khal in a dil tikah tlawngpit ni tam deuh an rak ngah ngaingai.

Capuchin kaing sung a lut

            Pio cu 1902 ah Capuchin kaing hotu ah a lut ih a pa in Capuchin kaing sung luh a duh sak lo. Pio cu tikholhnak hmin ah Francisco tiah an ko. Kumzabi 13 ah St. Francisco rinsannak thawn an rak kawhnak a si.

            Assisi khuapi ih Mithianghlim Francis in Pio thawn pehtlaih awk nak an nei theu a bang. Cu tiin a kum 15 a kim tikah Foggia ah ca zir phah in Morcone khuapi ih um Siangbawi tlawng fate ah feh dingin tim a tuah.

            A nu cu a tin a nuam lo zet. Asinan, a nu in ‘ka fapa, ka thin a nuam lo tuk. Asinan, Mithianghlim Francis ih a lo kawh ruangah na feh a tul ko’ tiah riahsia zet in a rak lungkim pi.

            Pio cu Foggia khuapi ih um Siangbawi tlawngah nitin ten a thangso deuhdeuh ko nan a thlarau lam lamhmuhtu Fr. Padre Agostino ih lamhruainak a lak. Pio cun Bawi Jesuh a duh zet.

            Curuangah thlarau lam ah a dik mi lamhmuhnak a pek thei tu ding Siangbawi pakhat a rak tul. Cu lai ah Thlarau lam lamhmuhnak ah hminthang zet tu Fr. Padre Beneticto thawn an rak tongawk. Hi Siangbawi cu April 25, 1903 ah Marco khuapi ih Siangbawi tlawng ah ca a rak zirh dah.

            Fr. Benedicto cu thlarau lam lamhmuhtu Saya ah a rak cohlang ko nan Padre Agostino a rak pehtlaih.

            Pio cu Viana ih um tlawng ah besia zet in a rak na. Inn a tlun zik zawng te ah St. Francis in a veikhat nak Pio hnenah langnak a rak hmuh. Pio cu a thei awk lo. “Maw Bawipa, na pawlkom sungih sin I hnong thlang ding maw si? Kei cu na fapa ka si lo maw?” Hi mi cu Pathian ih duhnak a si lo maw? A hman ah cun Pathian ih duhnak vekin si ko seh” tiah a ti. Hi ti langnak a hmuhnak ah Fr. Agostino in a rak bawm. Pio cu inn hmai tiang a rak thlah.

Puithiam nunram

            Pio cu a kum a kim hrih lo. Kum 23 lawng a si lain an a mah cu 1910, September thla ah Puithiam cannak an rak pek. A dam hrih lo ruangah Siangbawi angki thawn inn ah a um. Fr. Pio cu Jesuh, Maria, Joseph, St. Francis le kilkhawitu Vancungmi pawl thawn tu le tu an rak tongawk theu. Satan in St. Francis vekin a rak hnaihnok theu.

            Mithianghlim Francis cu Bawi Jesuh duhdawt zet tu a si. Bawi Jesuih hriamhma pawl a ngah duh vek ruangah a rak dil. A dil vek in a rak ngah. Padre Pio khal St. Francis pawlkom sungtel a si.

            Cui Mithianghlim vekih um a duh. Cu tiin a kum nauhak te lai ah Bawi Jesuh in Pio hnenah a hriamhma pawl a rak pek. A taksa pum ah hriamhma pawl hmuh theih in a lang phah theu ih a can le a hlo sal theu.

            1914-1918 ah hmaisabik nak leitlunhuap ral a rak tho. Dinhmun vek in ralkap thu pek nak ruangah ralkap ah a rak lut. TB nat a neih ruangah ralkap lakah reipi a rak um lo. Fr. Benedicto in a kaih hruai mi tlawng cu Pio hnenah a rak ap. Curuangah thlarau lam lamhmuhtu a rak tuan.

Hriamhma pangan a ngah

            1918, September 20 ah a si. Missa sumnak theh ah Thinglamtah hmai ah Pathian thu a rak ruat. A mah khal Bawi Jesuh vek in a rak tuar. Thinglamtah zoh phah in Bawi Jesuh vek in a um. Thi luannak natnak vek ih a tuar kha a rak hmu.

            Hriamhma pawl lak ihsin fei le naam vek ih sunmi a tleu zet mi a rak suak. Padre Pio ih a kut. A hnak ah a peh cih. Pio cu a aw neih pa tawp in a au ruangah a dang Yatih Puithiam pawl a hnenah an va tlan ih an va tuamhlawm. Asinan, Fr. Pio in hi thuhla pawl a rak sim hai lo.

            Fr. Pio cu a tha a mal zet. Dai a ngah ih TB natnak ruangah a besia sinsin. A na ih a sunglam ah thli a um. Fr. Pio cu thlarau lam thawn pehpar mi Puithiam ih lungkimnak vekin a mah le a mah a hrem aw.

            October 14, 1912 ah Fr. Agostino hnenih ca a kuat mi ah hi vek in natnak a tuar hi a lungawi thu a rak ngan. Bawi Jesuh in Fr. Pio ih thlarau cu thlasuah tampi a coter thu le Bawipa ih duhdawtnak in a nuam ter.

            Bawi Jesuh in Fr. Pio ziang vek in a tuar ding ti a sim ih thinnau lo dingah le natnak a tuar nak in Bawi Jesuh a hnem ter ding thu a sim.

            Fr. Pio cu September 20, 1918 kim hlan kumnaga duhah natnak a rak tuar. Satan in Fr. Pio hnenah thlarau lam lamhmuhnak cawl dingah a rak hringhro. Fr. Pio in a mai hriamhma panga a tuar mi cu zohman a rak sim dah lo.

            Asinan, a karh ih khaupi pumpuluk in an thei ih an theih duh tuk ruangah an va zoh ih an va zingzoi theu. Hi mi sungah hmun hlapi ah a thawntiin khal thuthang a rak suak. Khua mipi pawl lungkim lo in an buai ih nitin thuthang ah an than.

Fr. Pio ih a hmuh mi mangbangza hrekkhat

            Fr. Pio in sualthlah tikah thlarau lam le taksa lam ih dam lo nak pawl tla a rak dam ter.

1. Nikhat ah ken a mi mina pakhat cu a feh thei lo ruangah kianghrol hmangin a rak feh. Hma tuamnak in a tuam aw ih zohman an um  nawn lo in sual a va thlah theu. Sual a thlah lai ah a ke natnak dam deuh dingah thlacam sak dingin a rak dil.

Fr. in a rak let sal lo. Sual a thlah theh hnu ah a kianghrol cu kun in a vun lak tum laifang ah kianghrol hmang lo ih feh dingah Fr. Pio in a rak sim. A  na tuk ko nan Fr. Pio ih a sim vekin a tho ih a zuam. Cu tikah a natnak a hloh kha a thei. A leng a thlen tikah hmasii lawng a tan kha a hmu ih lungawi aipuang in ‘mangbangza, mangbangaza!’ tiah au phah in a than vivo.

• Khua hmulo le Padre Pio

Khua hmu lo mipa pakhat cu a sual thlah phah in a mit dam ter dingah a dil. Padre Pio in tu cu a cang thei lo. Neta ah a cang thei leh ding tiah simphah in a thlah. Cu pa cu aipuang lo in a suak sal. Inn a tlunnak lamtluan ah puithiam pakhat thawn tlangleng an to tlang. Inn tlung phah in a tlunnak lamzin ah a mit khua a hmu thei sal ruangah a rak lungawi zet.

• Hmailam caan a sim thei.

Padre Pio a um nak khuapi cu khuapi uktu Siangpahrang pakhat in Padre hnenah tu le tu leng in lungawi ten thu an relh aw theu. Nikhat ah a mah cu hmundang ah a thawn ding tiin thuthang a thei. Curuangah riahsia zet in Padre Pio thawn thu an rel lai ah a rak sim.

            Cu tikah Padre in ‘na sual a si; Hi tawk ah reipi na um lai ding’ tiah a sim. A ti vek in a ngaingai khal ah cui khuapi uktu cu thawn lo in reipi tiang a um ti a si. Padre Pio cu ni 10 ah veikhat mangbangza pawl a tuah ti a si.

• Nicola ti mi cu tlangleng zung neitu acozah hnatuantu pakhat a si. 1947, February 2 zingpit ten a thawh tikah a ke a cang thei nawn lo kha a rak hmu. Cu veten Rome khuapi ih um thahri tuamhlawmnak siizung pi ah 1947, February 19 ihsin July 19 tiang thlanga rori siizung ah tuamhlawmnak a rak lak. Kianghrol hmangin kumkhua na um ding tiin siibawi pa in a sim ih siizung ihsin a rak suak.

Inn a thlen tikah kianghrol a hmang duh lo ih funghreu a rak hmang. A tawlh ih a ke a rak kiak. Curuangah tlangleng zung neitu cu hna a tuan thei nawn lo. Siivai vei tampi an rak dawt. Electric meisa thawn an em. Asinan, a dam thei cuang lo.

Fr. Pio thawn an tonawk tikah

            Foggia khuapi ih Fr. Plasido ih bawmnak thawn mawtaw thawn Fr. Pio hnenah an feh. An thlen in mawtaw parih an tum tikah Nocola cu a feh thei lo. Curuangah kum upa thlang mi Fr. Plasido in Nicola cu a cawi. Cui thilcang cu Fr. Pio in a zaangfah zet ih nel aw ten an biakawk hai. Cui thilcang cu a thok ihsin a cemnet tiang Nicola in a sim ih thinsau ten a rak ngai sak.

            A thaizing zinglam nazi 4:00 am ah Missa sumnak tuah ding a si ih Fr. Pio in Nicola ih to nak ding hmun a rak pek. Cui hmun ihsin Fr. Pio ih a hriamhma pawl Missa sumnak a tuah lai ah fiangten a rak hmu. Cui ni cu tlawngkai ninga ni a si. A tlun zik zawng te ah Fr. Pio cu cibai a buuk ta. Fr. Pio in hmai Zarhpi ni zinglam ah thirleng to in siikhaan ih hmuh aw dingah a cah ta.

            Cui hlei ah Fr. Plasido in Fr. Pio ih sim mi a zum ih tuah tengteng dingah tha ten a cah. Zarhpi ni a thlen tikah Nicola cu thirleng hngausan in a to. Lamzin ah thirleng a to ih tha ten a rak to thei. Asinan, mi pakhat danglam zet in a thleng ih thirleng parah a rak to ter. Hi mi ahcun a hlan vekin mi dam zet vekin a rak to thei. Cui hlei ah a hlan ah a mah a rak tuamhlawm tu siibawi pawl ih hmai ah thirleng to thiam zet tu vekin a cangvai thei.

            Cui hnu ah a hlan a hnatuan a si mi tlangleng zung nei tu dinhmun in hna a rak tuan sal thei. A mah cu 1955, a cawlh ni tiang dam cak zet in a rak tuan thei.

• Fr. Pio le Ralbawi Lamon

1944 ah American Ralbawi Lamon cu Italy ram a thleng ih Foggia khuapi ah Siangpahrang rian tu in tuanvo a rak lak. A mah cu Catholic Kohhran mipi pakhat a si. Cui khuapi ih Bisho thawn hna an rak tuan tlang. Ralbawi Lamon le Bishop pawl cu Fr. Pio hnenah an feh ih nel aw ten an biakawk hai.

Cu lai ah nisuahnak lam ah ralkap dinhmun in tuanvo a la rero tu a fapa ih thuhla tu le tu a sim. Cu tikah Fr. Pio in na thinphang hlah! Na fapa cu Puithiam dinhmun in a ra kir sal ding tiah a sim. Cui rei lo te ah a fapa hnenin cakuat a rak ngah. Cui cakuat sungah thlarau lam ih Puithiam pakhat dinhmun in tuanvo a lak rero lai thu a rak ngan. Cu tikah ralbawi cu a mangbang zet ti a si.

• Siivai phunsang tlawnta le Fr. Pio

Franserabolo cu Rome khuapi ah siivai tlawngta pakhat a si. A mah in an khaan sungih fala pakhat a rak uar ih an rak nei aw ih nuam ten um dingin thu an rak rel cat. Cui fala nu in a danglam zet mi nat pakhat a nei ih a dam thei lo ding ti a si. Ziangah tile tuamhlawmnak siivai a um lo.

Thisen nat a si ruangah thih ding lawng a tang thlang. Cu nu hrangah Fr. Pio in thla a cam sak ih a dam sal. Cu nu in Fr. Pio hnen lungawi rulhkir sal nak ah Fr. Pio ih thuanthu cu film in a zuk ih thawngtla pawl a hmuh.

Fr. Pio cu Bawinu Maria rak upat zet tu a si. Curuangah Bawinu hnen lungawi rulhkir nak ah tiin Bawinu Maria le Rosary pawl cu thawngtla pawl a rak zem.

• Fr. Pio le khua hmu lo nunau hmeltha pawl

1947, June 18 le 19 ni ah Milan khuapi ih suah mi magazine pakhat ah Fr. Pio ih mangbangza a tuah mi pawl thuhla a rak tel. Cui magazine ah Germa tiih kawh mi nunau pakhat cu a suahkeh in a mit ah a dum mi tel lo in a um ruangah damter a theih lo ih zianghman tuah a ngah lo.

Germar cu kumsarih lawng a si lai. Fr. Pio hnenah a pi thawn an rak feh. Hmaisabik nak Bawipai Thi le Sa sang dingah le Missa sumnak ah Bawipai Thi le Sa a rak sang. Germar cu sual a rak thlah. Missa sumnak ah Bawipai Thi le Sa a rak sang. Missa sumnak an theh tikah Fr. Pio in mipi hmaiah Germar cu a rak ko.

A pi in a mit khua hmu thei dingah si lo in thlarau lam thazaang a ngah nak dingah thla a rak cam sak. Fr. Pio in Germar hnenah ‘Kan nu Maria in thlasuah lo pe hram seh; Nunau tha dinhmun in um aw’ tiah a sim hnu ah a tlun ter. Germar cu cu veten khua a hmu thei sal. Hmaisabik ah Fr. Pio a rak hmu. Cu tikah nunau nu cu ‘khua ka hmu thei zo’ tiah a au. Siibawi pawl in an va cekfel tikah a hlan vekin mitcaw vek ih a um kha an hmu ih an mang a bang zet. Cui thilcang cu Fr. Pio a thih hlan kum 21 ih thilcang mi a si.

Hmakhat te ah hmunhnih, hmunthum ih um thei nak

            Fr. Pio cu Pathian hnenin a danglam zet mi thlasuah pawl a rak ngah. Pathian a duhdawt zet. Pathian khal in Fr. Pio cu a hleice in thlasuah pawl a co ter. Harsatnak a phunphun khal pe in a rak hninsak. Pathian thu a rak ruat ter. Hi a danglam zet mi thluasuah pawl sungin Fr. Pio cu hmakhat te ah leitlun ah hmunkhat, hmunhnih, hmunthum ih a thlen thei nak a si. Tahthimnak tampi a um. Cu mi pawl sungin tahthimnak malte lawng ka run tarlang ding.

• Mithianghlim Teresa Mithianghlim ih khaisan ni ah Fr. Pio cu Rome khuapi ah Bishopo pakhat thawn an um lai hmuh a theih. Cui tikcu caan tho tho ah Fr. Pio cu Pope Pius XI ih thlaan hmai ah thla a cam rero lai midang pakhat in a rak hmu. Cu laiah Fr. Pio cu a mai a umnak hmun siar lo khui hman ah a rak feh lo.
• Macono ti mi nunau pakhat cu a pasal siivai an tuamhlawmnak thlahnih a kim cuahco thlang. Ruahsan ding a um nawn lo thu pehpar awknak a nei mi siibawi pawl ih an sim lai a rak thei ngelcel. Nazi kar sung lawng a awh ding tiah an sim. Cui nunaunu cu Fr. Pio rinsan zet tu a si. Curuangah cui nunaunu cun Fr. Pio hnenah ca a rak kuat. Neta khal ah a kuat bet. A pasal cu a itthat. Cui zaan ah a natnak 102 F a um. A thaizing ah a dam sal.

Mina in a nupi Macono a sim mi ah mizaan ah Fr. pakhat le Brother pakhat in an va zoh ih a thinlung an rak cek thu, thaizing ah na natnak a dam ding tiin an rak sim thu, nili sungah ihnak in na tho thei sal ding tiih an rak sim tu, siivai cazin le sii pawl an rak cek fel thu, a khaan sungah zaanvar an rak um thu a sim.

      Thlakua a rei hnu ah an nupa ten Fr. Pio hnenih lungawi thu sim dingah an va feh. A pasal in Fr. Pio a hmu dah lo. An thlen in a pasal in zaanvar a mah thawn um in rak tuamhlawm tu a si kha a vun thei dukdi. Fr. Pio khal in mina hnenah ‘na thinlung in a lo hnaihnok tuk si lo maw?” tiah a rak sut. Hi mi cu mangbang thlak zet mi pakhat a si.

• A veihnihnak leitlunhuap ral a buai lai leh a reh sal hnu ah ralkap pawl in Fr. Pio ih a rak bawm ruangah lungawi thu an rak sim. Setsa vanzam hotu pakhat cu vanzam in lethi thawn a rak dawp. Lethi a ongawk thei lo ruangah a thih ding lawng a tang thlang. Setsa vanzam hotu cun Fr. Pio cu a hmu ih thihnak in a luat. Ziangah tile setsa ih nu cu Fr. Pio rak rinsan zet tu a si. A thlacam nak ruangah setsa vanzam hotu cu a nunnak a rak run thei sal.
• Nau a nei thei lo mi nupa te

Nupa te cu innsang an nei zo nan fa an nei thei lo. Curuangah nupa te cu Fr. Pio hnenah an feh ih fate an neih duh thu thla cam sak dingah zaangfah an rak dil. Cu tiin Fr. Pio in fapa pakhat nan nei ding.

      Fate nan neih a si le in ko uh la kei mah rori in Baptism ka pek ding tiah a sim. Cui nupa te cu lungawi zet in an tlung. Fr. Pio ih a sim vek cekci in fapa te an nei ngaingai. An fapa te cu Fr. Pio hnenah an feh pi ih mi tampi a thlerthler ih an din ruangah hmai ah an feh thei lo.

      Cu tikah a pasal in a nupi le naute cu pengkhat hrawng a hla mi Biakinn pakhat ah a tan sung. A mah lawng Fr. Pio hnenah a feh ih Fr. ih a sim vekin an ra ko nan Fr. thawn an tonawk thei lo ruangah tikcu a lak ah a heu in an hngah thei lo thu mawhpuh dingah a feh.

      Asinan, Fr. Pio cu a rak hmu lo. Cu tiin a nupi hnenah beidong zet in a rak feh. Mangbang zet cu Fr. Pio cu cui mipa in a nupi le naute a rak tannak pengkhat hrawng a hlatnak hmun ah a rak thleng ih naute cu Baptism a rak pek ti a si.

• Fr. Pio le Ms. Calandra

Ms. Calandra cu American ram, Noryit tlang par khuapi ah a um. Haro timi fapa pakhat te a nei. Suahkeh siivai thawn tuamhlawm theih lo mi nat a nei. Ni rei lo te sungah a thi thei ding mi natnak a si. A mah in Fr. Pio ih thuhla cu Magazine pakhat ah a rak siar dah.

      Cu tiin a fapa te cu Italy ram ih um mi Fr. Pio hnenah a fehpi. Asinan, Fr. Pio in leitlun vel in khualtlawng tu pawl dinhmun in a cohlang ih thluasuah a rak pek. Cu tiin Ms. Calandra in naute cu America ah a tlunpi sal. Inn an thlen hnu Zarhthum a rei hnu ah Fr. Pio a nunnak a liam thu a rak thei.

      Cui kum cu 1968 ah a si. Mangbang thlak zet mi cu a fapa Hari cu tha a nei sal ih a damnak hi a si. Fr. Pio ih thuhla an ral tlangih pakhat khat tuah in lungawi rulhkir sal a duh zet.

      Curuangah inn ah zungkhaan a din. Fr. Pio thawn pehpar mi ca pawl a zem. Fr. Pio ih nunram thuhla film zuk in a hmuh. Puithiam ih lungkimnak thawn Fr. Pio ih zuk an tuah ih Zarh tin Zarhte ni tinten thlacamnak thawn Fr. Pio parih a lungawinak a rak rul thei sal.

• Fr. Pio le Uruquay ih Fr. Damirani

Uruquay ram ih Fr. Damirani le Fr. Pio pawl cu an nel aw zet. 1929 ah Fr. Pio thawn an rak um tlang. Fr. Pio cu ‘ka thih zikte ah kiang ah um ter ka lo duh’ ti asi. Fr. Pio in ‘hi tawk ah na thi lo ding; Uruquay ah na thi ding’ tiah a sim. Cu tiin Fr. Damirani ih lungnat a besia deuhdeuh. Cu tikah Fr. Damirani in ‘na rat lo le ka lo hmu thei lo ding’ tiah a ti ih Fr. Pio in ‘na zumnak a va mal ve. Na thi lo ding. Uruquay ah na thi ding ka lo ti si’ tiah a ti.

      1949 ah Fr. Pio a um nak hmun ah Pathian thuruat tu pawlkom an rak thleng. Bishop Montevetio khal a tel. Fr. Pio an va tong ih an biakawk. Cu ti an biakawk lai ah Bishop in 1942 Uruquay ah Jubilee an tuah thu, Bishop panga an tel thu, an umnak cu pakhat khat in saangka a rak king thu, pi khat hrawng a on gawk ih Puithiam pakhat a rak luh thu, a mah in ‘Fr. Damirani a thi zik thlang. A khaan ah va feh aw’ tiah a sim ih Bishop hrekkhat a ko ih an feh.

A  mai cabuai parah Fr. Pio a rak thleng tiin Fr. Damirani a mah rori ih a rak ngan mi ca a rak hmuh thu, fiang ten theih a duh ruangah Fr. Pio rori a rak sut ih a umnak hmun ina  eh lo nan a thih zikte ah a kiangah a um ding thu Fr. Damirani hnenih thu a rak kam ruangah a ruangpum a rak thleng ih netabik Sacramentu a rak pek thu a phuang aw. Hi mi cu thil mangbang zet mi a si.

7. Fr. Pio le hnatuan tu Giovanni Savirosvino

            Savirosvino cu hnatuan tu pakhat asiih Fr. Pio tlawng kiang ah a um. Nitin Biakinn ah a khawm. Fr. Pio hnen in thluasuah a ngah. A kut khal a hnam. 1949 February 14 ah Dynamite an lak ih hna an tuan lai ah a vorhlam mit a ngah pang ih a siat. Cui thilcang a can hlan nithum hrawng Savirosvino hnen “Ralring zet in um aw. Tihphan nak nei hlah” tiin a ti. Ziangruangah hiti in a sim ti suh asile zianghman a tong lo.

            Savirosvino cu peng 25 a hla mi siizung ah reipi tuamhlawm a si. Savirosvino siizung a um laiah Fr. Pio cu zan ah a ra. Savirosvino ih vorhlam lu kha a zut ih a hlo. Cui thilcang hnu ni reilote ah Savirosvino ih a caw mi a mit cu tha zet in a hmu thei sal. Fr. Pio ih thlacam sak nak ruangah khua a hmu thei sal.

            Savirosvino siizung ihisn a suak tikah Fr. Pio hnen fehin cibai buk in lungawi thu a sim. Fr. Pio in “mi pakhat na si zo” tiin a tiih cibai a buk. Savirosvino siizung a um nak Photia khuapi cu Fr. Pio tlawng thawn peng 25 a hla. Savirosvino hnen a feh nak cu a leng ih a feh dah lo tu Fr. Pio cu mi pahnih ah cang in a va dam ter nak a si. A danglam nasa.

Fr. Pio ih a danglam zet mi rimhmui a pek thei nak

            Fr. Pio cu amai hnen thlacam in an thlacam mi a famkim mi pawl siseh, amah thawn thuhla pakhat khat a rel tu hnen siseh, rim hmui a pek theu.

1. Siibawi Gommanelli cu 1919 June thla ah Fr. Pio tlawng ih a feh laiah rim hmui a ngah. Cui tlawng ih Fr. Vernel Zano hnen Siangbawi tlawngah hitivek rim hmui ret lo ding tiin a soisel. Cui tlawngah nihnih sung a um. Rimhmui a pe tu thil a hmu lo. Inn par khal ah feh in a hawl nan a hmu lo. Himi thu thawn pehpar aw in science mifim pawl hnen thu an sut. An sim nak vekin thi cu rimhmui a pe thei tu sinak a um lo tiin an sim. Asinan Fr. Pio ih kut ihsin a luang mi thi cu mak zet in rimhmui a suak thei. Cutiin Fr. Pio ih thi a kop mi hnipuan pawl khalah rimhmui a um.

Fr. Pio le Franciscan a pathum nak pawlkom

(2) Fr. Pio ih din mi Franciscan a pathumnak pawlkom cu thurelkhawm nak an tuah tinten kilkhawi tu vancung mi hnen ihsin Fr. Pio hnen thu theih a si theu. Thurelkhawm nak an tuah laiah rimhmui an ngah asile an hnen ah Fr. Pio a um ti an thei.

            Nikhat ah palic thu nei pakhat asimi Thrumbetta ih inn ah thurelkhawmnak an tuah. Cui inn nei tu ih kum 5 ti an fapa pakhat cu rinlopi ah a nu hnen ah a tlan. “Ka tih Fr. Pio hi tawk hmun ah a um” tiin zate hmai ah a ti. Thurelkhawm nak ih a tel tu pawl in “khuitawkah, khuitawkah” tiin an sut ih, nauhak te cun a hmai hup in “khi nah a um. A tu hinah a um. A tu a suak zo” tiin a kut thawn a hmuh nan zo hman in an hmu lo.

            Thurelkhawmnak ih a tel tu pawl cu Fr. Pio thawn an tonawk tikah “thurelkhawm nak ah naute in a lo hmu tiin a timi a hman maw Bawipa” tiin an sut ih, “midang zo asi thei ding” tiin a sawn.

Fr. Pio ih Missa raithawinak

            Fr. Pio cu zing 3 le khui hrawng ah a tho. Missa raithawinak cu zing 5 cekci ah Missa raithawinak a tuah. Fr. Pio ih Missa raithawinak ih tel dingah zanlam 2 ihsin an hngak. Fr. Pio hnen sualthlah a duh tu pawl cu zarh khat asilole ni 10 hrawng timtuah cia in passpost an ret. A sangsang in sual an thlah.

            Fr. Pio Missa raithawinak a tuah tikah veikhat veihnih 1:30, 2 ihsin 4 a rei theu. Missa raithawinak a theh in ti khuat khat a in. Cuihnu ah sual thlah nak a tuah. Sin caw cu sa, arti telloin hanghnah hangrah a ei. Missa raithawinak tuah nak a rei tuk ruangah nazi khui luan lo dingah ralrin nak an pek. Asinan Fr. Pio in “hitivekin ka um thei lo ti Pathian in a thei tiin riahsia zet in a sim. A san cu tuletu dai ten thu a ruah ruangah a si.

            Fr. Pio Missa sumnak a tuah caan ah a kut ih a tem mi puan pawl a ret that. Curuangah hriamhma pawl hmuh a theih. Veikhat veihnih thi pawl luangih a tla mi thi hnul dingah puante an ret cia.

Khuavang ih hnaihnok nak pawl

            Fr. Pio cu Pathian thu tampi a ruat tu a si. Pathian thu tampi a ruat ruangah Pathian ih lungkimpi nak in hnaihnok nak khal tampi a tuar. Veikhat veihnih ahcun khuavang pawl khal an nasa zet.

            Fr. Pio ih a khaan zaten a linglet thluh dingah thilri pawl an hnok ter. Khuavang cu tidaan a phunphun in Fr. hnen an lang ih hnaihnok nak an pe. Cangan nak ti thawn cabuai pawl an siat suah. Phar pawl cangan nak ti thawn an siat suah. Tuletu Yatih vekin um hrim in an ra theu.

            Veikhat ah tihnung zet mi um daan in an ra kulh. “Zoh uh Mithianghlim a cawl zo” tiin an au. Fr. Pio khalin “Asi. Fih nan nung nak in ka cawl” ding tiin a ti.

            1912, December 14 ah Fr. Benedict hnen a ngan mi cu “khuavang cu keimah thawn nasa zet in kan do aw” tiin a sim. 1913, February 13 khalah “ka taksa zaten ka ral khuavang ih hmuhsuam nak ruangah hriamhma thawn a khat” tiin a sim. Cuihleiah Fr. Pio hnen a ra mi ca pawl cu cafang pawl um nawn lo ding in khuavang pawl in an tuah. Veikhat ah khuavang pawl cu Fr. Pio kha kai in an thing ih zial ah an deng. Cui thil cang pawl cu zo hman a sim lo.

            Zankhat ah a sual thlah nak a ngai sak tu Fr. Pio Augustine vekin ra in, Pathian thu ruat nawn hlah. Pathian in a duh lo tiin a sim ih Fr. Pio cu a sual thlah nak a ngai tu in ziangruangah hiti in i ti tiin a ruat ih rinhleh nak a nei. A mang a bang. Cutiin “Bawi Jesu  a san sau hram seh” tiin a au ter ih cui Yatih cu a hlo cih.

A dang thinnat za le hnaihnok nak pawl

            1918, September 10 ah Fr. Pio cu hriamhma 5 a ngah ruangah, hmun dang dang ih mi tampi in an ra zoh. Hitivekih thuthang a darh ruangah Vatican khal in a thei duh. Pope a mah rori zingzoi nak a thok. Paris khuapi ih siizung uk tu Dr. Luigi Homanelli in a zingzoi thok. Asinan cui Dr. ih zingzoi nak a di a riam loih Rome khuapi ih siitlawng ih thiam sang Dr. Amiko Begumi kha a zingzoi ter sal. Amah cu Pathian nei lo mi pakhat asi. Fr. Pio ih hriamhma pawl cu Pathian thil ti nak tiin a pom duh lo. Tuah cop mi khal a tel tiin ol sam zet in a ruat.

            Cutiin Fr. Pio cu biaknak lam pawlkom zate ih rinhleh nak a tuar. Dr. Amiko Gegumi cu Fr. Pio parah a hman lo mi thu a bot cat hnu reiloteah taksa zate thi nat a ngah. Tong khal a tong thei lo. Cui siibawi ih u nu cu Fr. Pio a zum hnget tu a si. Cui nunau cu siibawi dinhmun kha Fr. Pio hnen a sim ih ziang hman a let lo. Cutiin a thi asile hell ram a tla ding a phan ruangah thla cam sak dingah Fr. Pio hnen a dil. Thla a cam sak ding thu a tiam.

            Pasca ni ah cui nunau cu mi a bang lomi siibawi hnen feh in a kilkhawi lai ah Biakinn khawnglawng tum aw a thei ih, siibawi hnen pasca puai mang ding ah a sim ih mina ih um daan a thleng. Siibawi hnen “sual na thlah duh maw, na thlah duh asile ka kut hmet aw” a tiih a kut a hmet. Siangbawi pakhat a thleng ih um daan hmuh in sual a thlah. Thih tha in a thi. A ral a run.

            Fr. cu a tuah mi zaten upa lam ih lungkim nak lawngin a tuah. Tahthim nak cu sam met nak, kor thleng nak cutivek ihsin a si.

Rome ih cawhkuan a pek thok.

            1922, September 2 ah Rome thu nei tu pawlkom in Fr. Pio cu amai thlarau lam hmuh tu Fr. Benedict thawn an pehtlaih awk nak an phiat ter. Fr. Pio hrangah a ti tuk. Neta khalah pehtlaih awk nak tuah lo dingah an kham. Taksa thinlung in nasa zet in a tuar. Thlarau lam lamhmuh tu tiin a dang Puithiam an hril ter. Zingzoi nak khal kum tampi a tuah. Fr. Pio cu dik loin zingzoi tuar nak, hmuhsuam tuar nak le netabik ah cawhkuan tuar nak hrangah ningzah a rak tuar. Fr. Pio ih thil cang dik tak in an ruat sak lo.

            1931, May 13 ah Pope zung ihsin thusuah pakhat a thleng. Cui thusuah ah Fr. Pio cu Kohhran mipi pawl thawn siseh, Kohhran leng mi pawl siseh, ton nak on a si lo thu, Kohhran mipi pawl thawn Missa raithawinak neih lo ding thu, sual thlah ngai thei nak a neih lo thu le thluasuah pek nak a neih lo thu thawn kham a tuar. Zangfak za asimi Fr. Pio cu tlawngta vekin kum hnih sung rori amah ten a um. Fr. Pio ih tuar nak cu ziang tluk in a tum ti theih a theih. Bawi Jesuh cu Fr. Pio hnen a um ringring ruangah a tuar thei.

Thuhman timi cu,

            1933 ah Pope Pius XI cu Fr. Pio ih thuhla a zingzoi tel sal. A hlan zingzoi nak a sual ti a hmu ih Fr. Pio luat nak a pek.

Fr. Pio ih a ni netabik pawl

            Fr. Pio cu Bawinu a rinsan zet. Tangdor zet tu a si. Lar duh nak a nei lo lawlaw. Mi theih lo ding ten um a duh. A hnen ih thla a cam tu tinkim a bawm. 1968, September 22 zinglam 5 ah upa lam ih dil nak vekin Bawi Jesuh Thi le Sa a tuah. 10:30 ah sangka te in mipi pawl thluasuah a pek. Cuihnu ah a khan ah lut in Rosary cam phah in zanvar ten zau nak tohkham parah a cawl. 1968, September 23 zing 2:30 ah Jesuh, Maria tiin tong phah in daiten Pathian hnen ah a cawl.

A cem nak

            Fr. Pio vek Mithianghlim pawl cu hawl asile hmuh a har zet mi mi danglam pawl  an si. Ahleice in a tuvek caan ah Pathian nei lo, thudik pom loin zuk lem lawng biak in paisa dungthlun ih mai duh daan vekin um san a si. Thuhman timi a um lo, tlaitluang nak timi cu ca sung lawngah a um. Upa in nautat hmuhsuam “a thei lo tu lan in a thei tu langter nak” san ah Pathian cu a danglam mi minung pawl leipar ah a lang ter theu. Pathian in minung pawl a duh tuk ruangah mi zaten hnen a vancung sui khuapi co thei dingin, ti daan a phunphun thawn lamm in hmuh.

            A tlun ih thu siar nak in siseh, a hmai ih ngan mi Mithianghlim ih thuhla siarnak in siseh Pathian a duhdawt tu fa le pawl, minung khat le khat zangfah thiam in mai nunram ah a tuah taktak thei tu fale pawl le Pathian ih ram tim Gospel thuthangtha kha mitinkim hnen a sim thei tu fa le pawl si hram uh tiin thla lo cam sak phah in ka cawl ta ding.