Mithianghlim Andrew Kim Taegeon le Pawl Chong Hasang le a hnatuan pi pawl (September 20)
Siangbawi Andrew Kim, Siangbawi cangtu ding Paul Chong le Pawlpi sungtel minung (78) cu kum (1839) le (1846) sungah Pathian thu ruangih nunnak a rak liam tu an si. Cui Korea martyr pawl cu luu tan nak, hngawng rek nak le hrem nak pawl an rak tuar. Anmah cu Korea Pathian hnatuan nak pawl thawn hrem nak a tuar tu minung thawng leng lo sungin aiawh tu an si. Korea ih a hmaisabik Siangbawi Andrew Kim cu kum 1821 ah Seoul khuapi kiangah a rak suak. Kum 1845 ah Shianwai ih Siangbawi a can hnu ah a thup ten Korea ah a kir sal ih ramdang Pathian hnatuan pawl an thleng nak ding tuah sak nak dingah tuanvo an pek. Cuvekih Pathian hna an tuan laiah ramri ih pawlkom in an kai ih Seoul khuapi Shiyan tiva ah a luu an rak tan. A ruangpum khal le ni thum a rei hnu ah thu pheh um loin mizapi in an run thei. Cui Siangbawi cu Korea ram ih Siangbawi pawl kilkhawi tu Mithianghlim tiih an nemhnget mi a si. Thlang Korea ram Pathian thu sim pawl le Missionary pawl lut thei dingih a rak zuam tu pawl Mithianghlim ni hi tui sun ah kan hman nakin kan nitin nunah Khrist thuthangtha a phuang tu le a keng tu kan si ve thei nak dingin thla in cam sak aw tin zangfah dil thlang uh si.
