Mithianghlim Cornelius cu kum 251, ram uk tu Siangpahrang Dekhyius in Pawlpi a hrem lai ih Pope ah an hril mi a si. Pope a cang hnu rei lo te ah Africa ram ih zumnak a thentheek aw mi karlak ah elawknak pawl a um ciamco.

          Zumnak el in Catholic pawlpi in a tlan tu pawl cu a hrekkhat Puithiam pawl in an sual sir in pawlpi sung an lut duh sal a si le rak cohlang sal dingah Katik Mithianghlim Pope Cyprian in a rak rel cat.

          Curuangah Pope in cu mi pawl rak cohlang sal dingih a rak relcat hnu ah Novatian in Pope ih a thu relcat mi pawl a rak el ih a mah le mah cu Pope ih ral a ti aw. A mah cu pawlpi thuanthu ah a hmaisabik Pope rak dodal tu a si.

          Curuangah pawlpi in an dawi. Asinain, a hruai mi pawlkom cu kumza leng lo a rung tang. Kum 253 ah ram uk tu Siangpahrang Gallus cu nasazet in pawlpi a hrem sal.

Cornelius cu Civitacchia ah dawi a tuar ih cui khuapi ah cui harsat nak thawn a rak thi. Neta hnu ah a ruak cu Mithianghlim Calistus thlaan ah an thawn.

          Cui hnu kumnga rei ah Bawi Jesuh ih thudik phuangtu dingah Cyprian kha a mai si nak hrangah ram uk tu Siangpahrang hrang biak dingah a forhfial. Asinain, a nih in thudik hrangah si le zianghman ruat a tul lo tiah a rak sim.

          Cu tin a tong ruangah Siangpahrang ai-awh tu in Cyprian cu naam thawn that dingah thu a pek. Cyprian that dingih thu a pek hnu ah Pathian hnen lungawi thu a rak sim bet. Cu tawk ah Christian pawl karlak ah hnaihnok nak tampi a thleng ih miburpi in a dung an thlun.

 Cu le a mah that tu ding kha ngun tangka fang 25 a pek ta ih an thah hlan te ah cui hmun ah thla a rak cam. A mah cu biak nak hrangah thah a tuar ih cui rei lo te ah Siangpahrang ai-awh tu Gallarius Maximus tla a rung thi ve.

Pawlpi nasa zetih an rak hrem lai ah tih lo in ral tha zet in Bawipa thu ah a nunnak tiang a rak liam tu Mithianghlim an si vek in zumnak ah raltha le tei mak nun kan neih thei nak dingah thla in cam sak aw tiah zaangfah bawm nak dil tlang uh si.