A hlan ih sual hremnak le thihnak tiih duhsan a nei mi Thinglamtah cu Bawi Jesuh thawn Vancungram ih thlen theinak lilawn vek a si. Mithianghlim Paul ih cakuat (1Kor 1:23-24) sungah, “kan nih cun Thinglamtah ih khen mi Khrih kan phuang ih cui thu cu Judah mi pawl hrangah rilhbahnak a si ih Grik mi hrangah cun aat-hna a si. Sikhal sehla Pathian ih a kawh cia mi pawl hrangah cun Judah mi siseh, Zential mi khal siseh la, cu ti kan phuan mi cu Khrih a si ih Khrih cu Pathian cahnak le Pathian fimnak a si. (Lk 9:23) sungah, “zokhal siseh la, ka dung I thlun tu cun nitin ten a mai thinglamtah phur in I thlun she” tiin Bawi Jesuh a mah rori ih ti mi a si. Bawi Jesuh thinglamtah a neh nak puai cu kum (629) ih an tonsal mi a thianghlim zet mi Thinglamtah rothil thawn pehtlaihnak an nei.

          Jesuh Khrih an phum theh hnu a mai thinglamtah cu a dungthluntu pawl ih hmuh lo dingah kua pakhat ah an thlak ih leilung le lungto thawn an khuh. Kum (326) ah Constantine Siangpahrang ih Nu, Mithianghlim Helena in Thinglamtah an thuhnak a rak hmu ih a thianghlim zet mi Biakinn pakhat ah a rak ap. Kum (614) ah Persian miphun in Palestine an neh ih man nei zet mi thinglamtah rothil an lak sak. KUm (629) ah Constantinople Siangpahrang Heraclius in Persian miphun pawl an neh hnu ah a thianghlim zet mi thinglamtah  cu Jerusalem ah an phur sal. A mah rori in thinglamtah cu a phur duh ko nan khuapi luhnak saangkaa a tleng hnu cun a feh pi thei nawn lo. a kiang ih um mi Purgatory Zakhri cun Siangpahrang kha a sunglawi zet mi sinfen le thinglamtah (Bawi Jesu ih ) thinniamnak a bangawk lo mi kha ruahnak thawn thawn a rak sim. Cu mi ih ruahnak a pek vekin a mai sinfen pawl hlit in buri hnipuan a hruk lawngah hi Christu Thinglamtah cu a mai umnak kel ah a ret thei sal.

          Hi Thinglamtah neh puai thu kan zoh tikah Siangpahrang in a mai Siangpahrang sinak thawn Thinglamtah a phurh tikah a fehpi thei lo. Hnipuan tha lemlo thawn a fe pi lawngah a phur thei a si. Bawipa duhnak tuah dingah minung sinak le lennak thawn kan tuah a si ahcun Bawipai duh daan thawn a mil aw lo ti khal kan hmu thei. Mi hrekkhat cun Biakinn le khawmnak ti vekih kan feh tikah Bawipai duh daan thawn a kaih aw maw ti khal cuu tun kan ruah ding mi pakhat a si. cu ruangah nitin kan thinglamtah phur thei dingah zuam tlang uhsi. Thinglamtah phur phah in Bawipai duhnak thlun tlang uh si.