Rome khua ih um mithianghlim Mary Major biakinn pi cu Pope Sixtus III nak in Ephesus councit 431 kha hngilh lo nak ah tiin kum 435 ah a rak hlu. Cui biakinn ah fala thiang nu Maria cu Pathian ih nu tin a rak than. A thianghlim mi Bawinu hnen ih a hmaisa bik an rak hlan mi Rome khua ih biakinn a si ruangah Major tin hmin an pek nak a si.

Bawinu Maria ih a rak tuah mi mangbangza lang nak kha khih hmuh in (Our lady of Snow) tin tla an ko. Hlan lai tidan vek in a thianghlim mi Bawinu cu John ti mi hnen ah lang nak a hmuh ih a mah sunlawih nak ah hmun lawng pakhat ah biakinn pakhat kha a mai hrang ah ti tum tah in sak ding ah a duh thu kha a sim. Cui hmun lawng ah thaal caan ah vur pawl kha danglam zet ih tlak ter nak in a hmuh. Cu thu ruangah Pope Liberius cu kum 352 ah Esquiline tlang par ah biakinn pakhat a sak.

Nehhnu cun cui biakinn cu an sak bet ih kum 435 ah Pope Sixtus III nak in Puithiam pawl thlasuah pek nak thawn a rak hlu. Bawipa Jesuh a suak nak ih an hlum nak cu cui biakinn pi sung ah a um.