Bawi Jesuh in harsatnak a tuar hlan ah Peter, John le Jeim pawl a ko hai ih Galile ram ih um Tabor tlangpar ah thlacam dingah an kai. Dungthluntu pathum a hril nak cu daan le mipi pawl hmai ah a hngetkhoh zet mi tette pawl si ter a duh ruangah a si.
Peter cu Pawlpi hotu dinhmun in an mah thawn a rak um. Rin lo paral ah Bawi Jesuih hmuihmel cu a thleng aw ih a kawrfual khal tleu zet in a um. Cui hnu ah Moses le Elizah pawl cu thawmhuham thawn langnak an hmu ih Bawipa thawn an biakawk lai ah Jerusalem khuapi ah a rei hlan ih a thleng ding mi suahhlannak thuhla pawl an rel khawm.
Moses in daan hmang in siseh, cun Elizah in Prophet pawl hmang in siseh, Bawi Jesuih sinak cu Bible hlun ah fiang ten an sim cia vek in Messiah Bawi a si thu an lang suak ter.
An relkhawm mi suahhlannak thuhla in Bawi Jesuh ih harsat tuar nak le thawhsalnak a hmuh. Peter in Jesuh hnenah, “Bawipa, hi tawk ih kan um hi a tha tuk. Bawipa, nangmai hrangah pakhat, Moses hrangah pakhat, Elizah hrangah pakhat riahbuuk pathum in na duh mi a si ah cun ka sak ding” tiah a ti. Cui catlang cu Mt 17:4 ah kan hmu thei.
Asinan, Peter in ziang ka tong ti a thei lo. Jesuh Khrih ih hmuihmel thleng nak cun dungthluntu pathum lungawi ter dingih tumtah mi lawng si lo in an hmailam hrangih dungthluntu hnatuan pawl hrangih timtuah cia dingah tumtah mi a si. Cui hnu ah mero in a run zeel hai ih, “Hi Pa cu ka duhdawt zet mi ka Fapa a si; a thu ngai uh,” tiah Van in aw pakhat in a rak ti.
Cui hnu ah Bawi Jesuh a mah lawng an hmu. Dungthluntu pawl in an kaa ciip in an hmuh mi hmuahhmuah cu zohman an sim lo. Bawi Jesuh ih hmuihmel thlengawknak ih tumtah mi cu Bawi Jesuh cu Messiah le Pathian ih Fapa a si thu teette langter dingah le harsat a tuar hlan ah dungthluntu pawl ih zumnak hngetkhoh ter dingah a si.
Bawi Jesuh in ziang in sim ti mi hi ngai in thlun uh si. Kan mah thawn biakawk ringring thei nak dingah Pope hmang in siseh, Bishop pawl le Puithiam pawl le Pathian thu sim tu pawl in pek a si.
