Hih hlan kan pu kan pa pawl cu conlaamnak, sakah nak le ral nehnakin hmintha an ngah theu. Conlaamnak a phun phunin an neih, veikhat laam ah ngah mi cu a samtom paarah vapual re pakhat a ton thei. Conlaam veihnih a tuah thei asile vapual re pahnih a ton thei ve. Cuihhrangah laimi pawlin vapual cu an sunsak zet mi le an upat zet mi vate a si.

            Vapual cu pumrua umdaan le a nun-can daan cu vate dang hnakin a phundang zet, upat tlak zetnak a nei. A pumrua cu ar-cang-pi hnakin a tum ih mei sau ngai pi a nei. A mei le a thla cu a raang le a dum polhin a tial. A ruang pumpi ngai cu a hmuldum a tam deuh nan, a taang cu a ngo nawn mi hmulin a khuh thluh a si. A hmur cu vate dang vek si lo in, a hmur ngai tlunah hnak vek piin a bo sin mi a um. A hmur zatein sen-aire pian a keng. Vahai le Kawlhawk vate pawl thawn an bang aw zik zik a si.

            Vapual cu thingthei lawng lawng ei mi vate a siih a burin an tlang. Asinan veihnih veikhat cu a nupa lawng tlain an tlang theu. Falam ramah thingthei hmin tik cuah Tio kam, Leilet ram hrawng ah an tong theu. Fuur ruahpi tlak zikah thingkung  kua ah buu an tuah. A cuih buu ah a nu in a hriing zet mi tii pahnih a tii theu. A tii parah a nu a awp thok ihsin a buu cu a pa in rawl pek nak a hmur tlem ceu lawng a ongih a dang cu a phit thluh. A nu cu a fate a keuhih an zam thei hlan lo a buu sungah a to ring ring. Cuih sung hmuah cu a kiang kapin a pa in suun zaan in a kil ring ring. Rawl khal a pa in a hawl sak thluh. A pa cu pakhat khat a cang ih rawl a pek nawn lo asile a nu cu amah ten suakin rawl hawl loin, a fate thawn a buu sungah an thih tiang an tuar cih theu. A pum le a nunnak lawng si loin, a fate tiang in a pa hnen ah a ap thluh a si. Cu vek tho tho in a nu cu a pa  dangih rawl pek mi a saang pang a sile, a pa cu vaansangpiah a zamih a thlakhupin lei-lungah a deng awih thihnak a hawl theu. Cun sadawi pawlin a nu si maw, a pa si maw, pakhat khat an kap that pang a sile a tang lai mi a nu maw a pa maw cu vaansangpiah a zamih a thlakhupin lei-lungah an deng aw theu a si, an ti. Cuih hrangah a duhdaw aw bik, a dik fel bik mi vate an si tiin kan pu kan  pa pawlin sunglawi zetih an zohnak a si.

            Hih hlanah tlangval in fala hnenah vapual re a pek asile ka thih tiang nangmah lawng ka lo duhdaw ding ti nak a si theu.

            Cu vek tho tho in kan thih tik ah a tang lai tu in vapual re a ken asile na thih tiang in, in duhdaw ih, ka thih tiang nangmah lawng ka lo duhdaw ding asi tiih thukam dikfelternak a si theu.