Inn sungsang pakhatah a tlangpi in Nu le Pa, fale tin dinsuak mi kha inn sang pakhat tin kan ko thei. Inn sungsangah a hmai sabikah duhdawtnak hi a tul bik mi a si ti cu mi zo khal ih thei a si. Duhdawt nakih a khat mi innsang cu inn sang nuam kan ti. Duhdawt nak a um mi inn sangah tangdor nak, thinniam nak, zawiawk thei nak a um a si.

Innsang pakhatah a tam sawn cun duhdawt nak a um vek nan zawiawk thei lo nak le hmuh thiam awk lo nak a suah nak cu duhdawtnak ngaingai a um lo ruangah a si. Cun vei khat khat cu milai lamih tlak sam nak ruangah ngaidamaw thei lo in a mawhtu  lam khalin ka mawh ngai ti mi a um lo tikah inn sangah buai nak a suak ter a si. Cun mai thu lawngih nun duhnak le pakhat le pakhat mawh thluk nak ruangah a tam bikin buai nak a suah ter a si. Cun innsang nuam le zoh thim tlak inn sang si thei nak dingah cun Fa le pawl nun sim thiam le zirh thiam a tul a si. Fa pawl hi a zirhih zirh thiam mi Nu le Pa a tul a si. Biaknak lam, nun phung lam, ziaza mawi, mi upat thiamnak, annka mawi te le pumcawm nakih a tul mi hnatuan daan te te tiangih zirh thiam a tul a si. Cu ti te te ih a zirh thiam mi inn sang hrangah buai nak a mal a si.

Kan Christian innsang thu kan zoh tikah fale pawl hi zirh ding tuan vo Nu le Pa in a nei a si. An duh nak lawng thlun loin hmai lam an khua saknak ding tiang ruatin zirh a tul a si. Mi puitling an si thei nak dingah sumpai hman daan le hawl daan tiangin le mahte todelh aw thei mi mi pui tling an si thei nak dingah Nu le Pa in tuan vo tum pi a nei a si. Inn hnen kiangkap thawn peh parawthiam ding le kom aw thei ding tiangih kan zirh a tul a si.

Mi rin um mi le mi upat tihzah thiam nak tiangih a zirh tu Nu le Pa a tul asi. Cutin a zirh thiam tu Nu le Pa hrangah fa le pawlih hmai lam hrangah khuaruah har ding a um lo a si. Curuangah Nu le Pa in kan innsungsangah tuan vo tum pi kan nei ti mi hi kan theih tul mi le kan nun ih a cuang ding mi a si tin Falam RVA in kan lo thang phawk a si.