Duh sak nak

Putar pa pakhat cu a mai hmuan ri te ah leilung a lai ih Hai kung fate pakhat a phun. Siangpahrang fapa cu hramlak a feh phah ah cui hmunri ah a thleng. Putar pa cun siangpahrang fapa cu a hmu ih upat nak a pek hnu ah a thaw ih a hmui zet mi Hai lawhtharte thawn a rak do. Siangpahrang fapa khal puar zet ih a ei hnu ah “Hai in do mi cu a thaw zet. Thu pakhat ka lo sut thei pei maw? Ka rat lai ah ka pu ziangmi kung te na phun” a ti. Putar pa cun “Hai kung fa te ka phun” a ti.

Siangpahrang fapa cun “Ka pu na kum kum ziat si thlang” a ti. Putar pa cun “80 ka kim thlang” ati. Siangpahrang fapa cun “Ka pu tuaihnu kum ziat na dam lai ding tin na ruat” a ti. Putar pa cun “Ka thih ding le ka dam ding cu thiltha ka tuah nakih zinzir a si ruangah ka sim cia thei lo” a ti.

Siangpahrang fapa cun “Cu a si le ka pu tu na phun mi hai fate cu a rah ei ngah ding na zum awlai maw? Mah hrang ih tha hnem lo mi hna tuan tuan cu a tha lo mi a si lo maw?” a ti. Putar pa cun “Tu ka ei rero mi Hai rah cu kan pu pa pawl ih an rak phun ruangah a si. Tu ka phun mi haikung a hung tum tikah ka tu le tesin fa pawl in an ei thei ding” a ti.

          Cutin putar pa in thu hman a sim ruangah siangpahrang fapa cu a lung a kim tuk ih “Ka pu na sim mi cu hminsin tlak tuk a si. Thuruat lo ih ka duhduh ka tong ngah mi par ah in ngaithiam aw. Kei cu tuisun ni ih si thok mah hrang lawng ka zoh nawn lo ding. Keimah thawn ka tesin fa tiangih a thah nem mi hnatuan lawng ka tuan thlang ding” a ti.

Ka pu “Upat nak ka lo pek ding” tiah a ti ih  cu ti a ti theh ah siangpahrang fapa cun lungmang khung zung hruk pakhat kha lak sawng ah a pe ta ih a to mi Rang parah cun lungawi zet in a kai ih a feh. Putar pa te cun lungawi zetin a ttong “Ka duhsak nak thawn ka phun mi thingfa te cun tu rori ah lungmang khung a rah zo.” tiah a ti.

          Duhsak nak…..duhsak nak….